ജില്ലാ പഞ്ചായത്ത് തിരഞ്ഞെടുപ്പ്; വെള്ളാങ്ങല്ലൂർ ഡിവിഷൻ വേദിയാകുന്നത് ശക്തമായ ത്രികോണ മത്സരത്തിന്
ഇരിങ്ങാലക്കുട : ജില്ലാ പഞ്ചായത്ത് വെള്ളാങ്ങല്ലൂർ ഡിവിഷൻ നിലവിൽ വന്നതിന് ശേഷമുള്ള ആദ്യ പോരാട്ടത്തിനാണ് ഇത്തവണ വേദിയാകുന്നത്. വെള്ളാങ്ങല്ലൂർ പഞ്ചായത്തിലെ 18 വാർഡുകളും പുത്തൻചിറയിലെ 10 ഉം വേളൂക്കരയിലെ 6 ഉം പൂമംഗലത്തെ 6 ഉം പടിയൂർ പഞ്ചായത്തിലെ 2 ഉം ഉൾപ്പെടെ 42 വാർഡുകളാണ് വെളളാങ്ങല്ലൂർ ഡിവിഷൻ്റെ പരിധിയിൽ വരുന്നത്.
മുപ്പത് വർഷത്തോളം അധ്യാപന രംഗത്ത് പ്രവർത്തിക്കുകയും മികച്ച അധ്യാപികയ്ക്കുള്ള സംസ്ഥാന, ദേശീയ അവാർഡുകൾ നേടുകയും ചെയ്ത സി ബി ഷക്കീല ടീച്ചറെയാണ് എൽഡിഎഫ് സ്ഥാനാർഥി ആക്കിയിരിക്കുന്നത്. അധ്യാപനകാലഘട്ടത്തിൽ ആർജ്ജിച്ച അനുഭവങ്ങൾ നാടിൻ്റെ വികസനത്തിനായി ഉപയോഗപ്പെടുത്താനുള്ള അവസരം ചോദിച്ചാണ് എൽഡിഎഫ് സ്ഥാനാർഥി വോട്ടർമാരെ സമീപിക്കുന്നത്.
വെള്ളാങ്ങല്ലൂർ പഞ്ചായത്ത് സിഡിഎസ് ചെയർപേഴ്സൻ,മഹിള കോൺഗ്രസ്സിൻ്റെ വെള്ളാങ്ങല്ലൂർ , കൊടുങ്ങല്ലൂർ മണ്ഡലങ്ങളുടെ പ്രസിഡണ്ട് എന്നീ നിലകളിൽ പ്രവർത്തിച്ചിട്ടുള്ള റസിയ അബുവാണ് യുഡിഎഫ് സ്ഥാനാർഥി. വിലക്കയറ്റവും സംസ്ഥാന സർക്കാരിൻ്റെ ഭരണ പരാജയങ്ങളുമാണ് യുഡിഎഫ് ചർച്ചാവിഷയമാക്കുന്നത്.
മഹിളമോർച്ച മണ്ഡലം വൈസ് പ്രസിഡണ്ട് , ഭാരതീയ അഭിഭാഷക പരിഷത്ത് കൊടുങ്ങല്ലൂർ യൂണിറ്റ് സെക്രട്ടറി എന്നീ നിലകളിൽ പ്രവർത്തിച്ചിട്ടുള്ള അഡ്വ സിജിനി സന്തോഷിനെയാണ് ഡിവിഷൻ്റെ പ്രതിനിധിയാകാൻ ബിജെപി നിയോഗിച്ചിട്ടുള്ളത്. പുത്തൻചിറ പഞ്ചായത്തിലേക്കും വെള്ളാങ്ങല്ലൂർ ബ്ലോക്കിലേക്കു മുൻപ് ജനവിധി തേടിയിട്ടുള്ള അഡ്വ സിജിനി ശബരിമലയിലെ സ്വർണ്ണക്കൊള്ള ഉൾപ്പെടെയുള്ള വിഷയങ്ങളും കാർഷിക മേഖലയോടുള്ള അവഗണനയും കേന്ദ്ര പദ്ധതികൾ നടപ്പിലാക്കുന്നതിലെ അലംഭാവവുമാണ് പ്രചരണവേദികളിൽ ഉന്നയിക്കുന്നത്. ശക്തമായ ത്രികോണ മത്സരത്തിന് തന്നെയാണ് വെള്ളാങ്ങല്ലൂർ ഡിവിഷൻ വേദിയാകുന്നത്
