വീണ്ടും സമരവേദിയായി ഇരിങ്ങാലക്കുട ടൗൺ സഹകരണ ബാങ്ക് ; ഫൊറൻസിക് ഓഡിറ്റിൻ്റെ അടിസ്ഥാനത്തിൽ കാരണം കാണിക്കൽ നോട്ടീസ് അയച്ചത് 21 പേർക്ക്; നാല് ബ്രാഞ്ചുകൾ ലയിപ്പിക്കാൻ ആർബിഐ അനുമതി
ഇരിങ്ങാലക്കുട : നിക്ഷേപങ്ങളുടെ 20 % ഇടക്കാലാശ്വാസമായി അനുവദിക്കുക, ഫൊറൻസിക് ഓഡിറ്റിൻമേൽ കുറ്റക്കാർക്കെതിരെ നടപടികൾ സ്വീകരിക്കുക, തുടങ്ങിയ ആവശ്യങ്ങൾ ഉന്നയിച്ച് ഇരിങ്ങാലക്കുട ടൗൺ ബാങ്ക് നിക്ഷേപകരുടെ സമരം . ആവശ്യങ്ങൾ അംഗീകരിക്കുന്നത് വരെ ബാങ്കിൽ തുടരുമെന്ന പ്രഖ്യാപനത്തോടെ ആരംഭിച്ച സമരത്തിന് മണിക്കൂറുകൾ നീണ്ട ചർച്ചയ്ക്ക് ശേഷം വൈകീട്ട് എഴരയോടെയാണ് തിരശ്ശീല വീണത്. ഇടക്കാലാശ്വാസം അനുവദിക്കാൻ തങ്ങൾക്ക് അധികാരമില്ലെന്ന് വ്യക്തമാക്കിയ അഡ്മിനിസ്ട്രേറ്റീവ് കമ്മിറ്റി ഫൊറൻസിക് ഓഡിറ്റ് പ്രകാരം മുൻ ചെയർമാൻ, ഭരണസമിതി അംഗങ്ങൾ, മുൻ ജനറൽ മാനേജർ, മറ്റ് മാനേജർമാർ, ലോൺ എടുത്ത വ്യക്തികൾ , വാല്യുവേഷൻ നടത്തിയവർ എന്നിവർ ഉൾപ്പെടെ 21 പേർക്ക് കാരണം കാണിക്കൽ നോട്ടീസ് അയച്ച് കഴിഞ്ഞതായും നടപടികൾ തുടരുമെന്നും വ്യക്തമാക്കി . അത്താണി , ചേലക്കര , ചാലക്കുടി, ചെറുത്തുരുത്തി എന്നീ ബ്രാഞ്ചുകൾ ലയിപ്പിക്കാൻ ആർബിഐ അനുമതി ലഭിച്ച് കഴിഞ്ഞതായും എന്നാൽ ജോയിൻ്റ് രജിസ്ട്രാറുടെ അനുമതി ലഭിച്ചിട്ടില്ലെന്നും നിക്ഷേപങ്ങളിൽ മേലുള്ള പലിശ നിരക്ക് കൂട്ടുന്ന കാര്യം ആലോചിക്കാമെന്നും നിക്ഷേപകരാണ് ബാങ്കിൻ്റെ നട്ടെല്ലെന്ന് ബോധ്യമുണ്ടെന്നും നിക്ഷേപകകൂട്ടായ്മയ്ക്ക് കൈമാറിയ മറുപടിയിൽ വ്യക്തമാക്കി. രാവിലെ നടന്ന ചർച്ചയിൽ ബാങ്കിനെ പുനരുജ്ജീവിപ്പിക്കാനുള്ള പദ്ധതിയ്ക്കും മറ്റ് അർബൻ ബാങ്കുകളുമായി ലയിപ്പിക്കാനുള്ള പദ്ധതിക്കും ഭാവി കാണുന്നില്ലെന്നും സൊസൈറ്റിയായി മാറ്റാനുള്ള സാധ്യതകൾ പരിശോധിക്കാമെന്നും നിക്ഷേപകർക്ക് ഗുണകരമാകുമെന്നും അഡ്മിനിസ്ട്രേറ്റർ സൂചിപ്പിച്ചു . വിവിധ വിഭാഗങ്ങളിലായി ബാങ്ക് നൽകാനുള്ളത് 952 കോടിയും ലഭിക്കാനുള്ളത് 1175 കോടിയാണെന്നും അഡ്മിനിസ്ട്രേറ്റർ സി ആർ ഗോപീകൃഷ്ണൻ അറിയിച്ചു . ബാങ്ക് ജീവനക്കാരുടെ ശമ്പളം കുറയ്ക്കാൻ ആർബിഐ പറഞ്ഞിട്ടില്ലെന്നും കോടതി പറഞ്ഞാൽ കുറയ്ക്കാമെന്നും കമ്മിറ്റി വ്യക്തമാക്കി.കമ്മിറ്റി അംഗങ്ങളായ കെ മോഹനൻ , ഇ ജെ കുര്യൻ, ജനറൽ മാനേജർ വി സി ജോൺ , നിക്ഷേപക കൂട്ടായ്മ പ്രസിഡണ്ട് ബിബിൻ ജോൺ,സെക്രട്ടറി ലിയോ പി ആൻ്റണി, ട്രഷറർ ടി സി സഞ്ജീവൻ, ഫിനാൻഷ്യൽ അഡ്വൈസർ പി കെ ജോസ്,കമ്മിറ്റി അംഗങ്ങളായ സുനിൽകുമാർ, പ്രേമരാജൻ,തുടങ്ങിയവർ സംസാരിച്ചു
