അമിത വേഗതയിൽ വന്ന സ്വകാര്യ ബസ്സ് കാറിൽ തട്ടിയതിനെ ചോദ്യം ചെയ്തതിന് കാർ ഉടമയെ മർദ്ദിച്ച കേസിൽ തൃശ്ശൂർ – കൊടുങ്ങല്ലൂർ റൂട്ടിൽ സർവീസ് നടത്തുന്ന ലിമിറ്റഡ് സ്റ്റോപ്പ് ബസ് ജീവനക്കാർക്കെതിരെ പോലീസ് കേസെടുത്തു
ഇരിങ്ങാലക്കുട : അമിത വേഗതയിൽ വന്ന സ്വകാര്യ ബസ്സ് കാറിൽ തട്ടിയതിനെ ചോദ്യം ചെയ്ത കാർ യാത്രക്കാരനെ മർദ്ദിച്ച കേസിൽ ബസ്സ് ജീവനക്കാർക്കെതിരെ ഇരിങ്ങാലക്കുട പോലീസ് കേസെടുത്തു. ആഗസ്റ്റ് 19 ന് രാവിലെ 9.30 യോടെ ആയിരുന്നു സംഭവം. സഹകരണ ആശുപത്രി സ്റ്റോപ്പിൽ വച്ച് എറിയാട് മാടവന വടക്കേ വീട്ടിൽ മുഹമ്മദ് അസ്ലാം ഓടിച്ച് വന്ന കാറിനെ മറികടക്കുന്നതിനിടയിൽ തൃശ്ശൂർ – കൊടുങ്ങല്ലൂർ റൂട്ടിൽ സർവ്വീസ് നടത്തുന്ന ശിൽപ്പി ബസ്സ് തട്ടുകയായിരുന്നു. തുടർന്ന് ബസ്സിന് പോകാൻ വഴി നൽകിയില്ലെന്ന് ആരോപിച്ച് കാർ യാത്രക്കാരനെ ബസ് ഡ്രൈവർ നടവരമ്പ് വിരുത്തിയിൽ വീട്ടിൽ പ്രിൻസ് (48) , കണ്ടക്ടർ അർഷാദ് എന്നിവർ മർദ്ദിച്ചതായിട്ടാണ് പരാതി. മുഹമ്മദ് അസ്ലമിൻ്റെ പരാതിയിൽ ജീവനക്കാർക്കെതിരെ പോലീസ് കേസെടുത്തു. ഡ്രൈവർ പ്രിൻസ് നിരവധി കേസുകളിൽ പ്രതിയാണെന്ന് പോലീസ് പറഞ്ഞു.സ്വകാര്യ ബസ്സും പോലീസ് കസ്റ്റഡിയിൽ എടുത്തിട്ടുണ്ട്.
