ആഘോഷത്തിരയിളക്കി കരോള് സംഘങ്ങള്; നഗരം കീഴടക്കി പാപ്പാമാരും മാലാഖമാരും
ഇരിങ്ങാലക്കുട: ചുവപ്പന് കുപ്പായമണിഞ്ഞ് നഗരത്തില് പാപ്പക്കൂട്ടവും മഞ്ഞിന്റെ നിറമുള്ള ചിറകും തൂവെള്ള വസ്ത്രമണിഞ്ഞ് മാലാഖമാരും നൃത്തചുവടുകളുമായി നഗരം കീഴടക്കി. മണ്ണില് വിരിഞ്ഞ നക്ഷത്രങ്ങളെ സാക്ഷിയാക്കി നഗരവീഥിയില് കരോള് ഗാനത്തിനൊപ്പം നിശ്ചലദൃശ്യത്തിന്റെ അകമ്പടിയോടെ പാപ്പാമാരും മാലാഖമാരും ചുവടുവെച്ച് നീങ്ങിയപ്പോള് നിറഞ്ഞ മനസ്സോടെ ജനം വരവേറ്റു. കത്തീഡ്രല് പ്രഫഷണല് സിഎല്സി സീനിയര് സിഎല്സിയുമായി സംഘടിപ്പിച്ച മെഗാ ഹൈടെക് ക്രിസ്മസ് കരോള് മത്സര ഘോഷയാത്ര ടൗണ് ഹാള് പരിസരത്ത് നടന്ന ചടങ്ങിൽ കത്തീഡ്രല് വികാരി ഫാ ഡോ. ലാസര് കുറ്റിക്കാടന് ഉദ്ഘാടനം ചെയ്തു. ബിഷപ്പ് മാര് പോളി കണ്ണൂക്കാടന് അനുഗ്രഹപ്രഭാഷണം നടത്തി. കത്തീഡ്രല് അസിസ്റ്റന്റ് വികാരി ഫാ. ആന്റണി നമ്പളം അധ്യക്ഷത വഹിച്ചു. കെഎല്എഫ് നിര്മല് ഇന്ഡസ്ട്രീസ് മാനേജിംഗ് ഡയറക്ടര് സണ്ണി ഫ്രാന്സിസ് കണ്ടംകുളത്തി, പ്രഫഷണല് സിഎല്സി പ്രസിഡന്റ് ഫ്രാന്സിസ് കോക്കാട്ട്, അസിസ്റ്റന്റ് വികാരിമാരായ ഫാ. ഓസ്റ്റിന് പാറയ്ക്കല്, ഫാ. ബെല്ഫിന് കോപ്പുള്ളി, പ്രോഗ്രാം ജനറല് കണ്വീനര് ഒ.എസ്. ടോമി, സീനിയര് സിഎല്സി പ്രസിഡന്റ് കെ.ബി. അജയ്, വാര്ഡ് കൗണ്സിലര് ജോസഫ് ചാക്കോ, കത്തീഡ്രല് ട്രസ്റ്റിമാരായ അഡ്വ. എം.എം. ഷാജന് മാണിക്കത്തുപറമ്പില്, പി.ടി. ജോര്ജ്, ഓര്ഗനൈസിംഗ് സെക്രട്ടറി ഡേവിസ് പടിഞ്ഞാറക്കാരന്, സംസ്ഥാന സിഎല്സി ജനറല് സെക്രട്ടറി ഷോബി കെ. പോള്, കണ്വീനര് വിനു ആന്റണി എന്നിവര് സംസാരിച്ചു.
