കേരള പ്രിൻ്റേഴ്സ് അസോസിയേഷൻ തൃശ്ശൂർ ജില്ലാ സമ്മേളനം ആഗസ്റ്റ് 17 ന് ഇരിങ്ങാലക്കുടയിൽ
ഇരിങ്ങാലക്കുട : കേരള പ്രിന്റേഴ്‌സ് അസ്സോസിയേഷൻ തൃശ്ശൂർ ജില്ലാ സമ്മേളനം ആഗസ്റ്റ് 17 ഞായറാഴ്ച ഇരിങ്ങാലക്കുട കല്ലട റീജൻസിയിൽ നടക്കും. രാവിലെ 9.30 ന് ഉന്നതവിദ്യാഭ്യാസ സാമൂഹ്യനീതി വകുപ്പ് മന്ത്രി ഡോ ആർ. ബിന്ദു സമ്മേളനം ഉദ്ഘാടനം ചെയ്യും. 150 ഓളം പേർ സമ്മേളനത്തിൽ പങ്കെടുക്കുമെന്ന് ജില്ലാ പ്രസിഡണ്ട് സണ്ണി കുണ്ടുകുളം, ജില്ലാ സെക്രട്ടറി പി ബിജു എന്നിവർ പത്ര സമ്മേളനത്തിൽ അറിയിച്ചു. സംസ്ഥാന ജനറൽ സെക്രട്ടറി വൈ. വിജയൻ മുഖ്യപ്രഭാഷണം നടത്തും. ചെറുകിട പ്രസ്സുകളെ മലിനീകരണ നിയന്ത്രണ ബോർഡിൻ്റെ പരിധിയാൽ നിന്ന് ഒഴിവാക്കണമെന്ന് അസോസിയേഷൻ ഭാരവാഹികൾ ആവശ്യപ്പെട്ടു.
അച്ചടി ഉൽപ്പന്നങ്ങൾക്ക് 12% ജി.എസ്.ടി. നിരക്ക് ബാധകമാക്കുക, സർക്കാർ – അർദ്ധ സർക്കാർ സ്ഥാപനങ്ങളിലെ അച്ചടി ജോലികൾ കേരളത്തിലെ പ്രസ്സുകൾക്ക് മാത്രം നൽകുക, അച്ചടി സ്ഥാപനങ്ങൾക്ക് പ്രത്യേകം ലൈസൻസ് സമ്പ്രദായം ഏർപ്പെടുത്തുക, കോട്ടയം വെള്ളൂരിലുള്ള കേരള പേപ്പർ പ്രൊഡക്ട്‌സ് ലിമിറ്റഡിൽ പ്രിന്റിങ്ങിനാവശ്യമായ എല്ലാ പേപ്പറുകളും ഉൽപ്പാദിപ്പിക്കുക, കേന്ദ്ര-സംസ്ഥാന സർക്കാരുകളുടെ അച്ചടിവിരുദ്ധ നയം തിരുത്തുക തുടങ്ങിയ ആവശ്യങ്ങൾ ഉന്നയിച്ച് അസോസിയേഷൻ സമര രംഗത്താണ്.
സംസ്ഥാന വൈസ് പ്രസിഡണ്ട് രാജീവ് ഉപ്പത്ത്, ഇരിങ്ങാലക്കുട മേഖലാ പ്രസിഡണ്ട് ബൈജു ജോസഫ്,
ഇരിങ്ങാലക്കുട മേഖലാ സെക്രട്ടറി ടി. എസ്. ബൈജു, മേഖല ട്രഷറർ എം.കെ. കാർത്തികേയൻ, മേഖല ജോ.സെക്രട്ടറി സെബി ജോസഫ് എന്നിവരും പത്ര സമ്മേളനത്തിൽ പങ്കെടുത്തു.
