ഇരിങ്ങാലക്കുട മാർക്കറ്റിൽ പച്ചക്കറി വ്യാപാരി ഉൾപ്പെടെ മൂന്ന് പേർക്ക് തെരുവുനായയുടെ കടിയേറ്റു.
ഇരിങ്ങാലക്കുട : ഇരിങ്ങാലക്കുട മാർക്കറ്റിൽ പച്ചക്കറി വ്യാപാരി ഉൾപ്പെടെ മൂന്ന് പേർക്ക് തെരുവുനായയുടെ കടിയേറ്റു. മാർക്കറ്റ് റോഡിൽ ചാതേലി വീട്ടിൽ പൗലോസ് ( 84) , ജീവനക്കാരനായ മന്ത്രിപുരം സിയാത്ത് വീട്ടിൽ ലിജോ (46) , ലോട്ടറി വില്പനക്കാരനായ കോടാലി വാസുപുരത്ത് സണ്ണി ( 49) എന്നിവർക്കാണ് കടിയേറ്റത്. രാവിലെ 6.45 ഓടെയായിരുന്നു സംഭവം. കടിയേറ്റ പൗലോസും ലിജോയും ഇരിങ്ങാലക്കുട ജനറൽ ആശുപത്രിയിലും സണ്ണി കൊടകരയിലെ സ്വകാര്യ ആശുപത്രിയിലും ചികിൽസ തേടി. മാർക്കറ്റിലേക്ക് പ്രവേശിക്കുന്ന റോഡിനോട് ചേർന്ന കഴിഞ്ഞ 25 വർഷങ്ങളായി പൗലോസും ഭാര്യ സിസിലിയും ചേർന്ന് പച്ചക്കറി കച്ചവടം നടത്തി വരികയാണ്. എഴ് വർഷങ്ങൾക്ക് മുമ്പ് വീടിൻ്റെ പരിസരത്ത് വച്ച് കടിയേറ്റിരുന്നതായും പൗലോസ് പറഞ്ഞു.തെരുവുനായയെ ഉടൻ തന്നെ നാട്ടുകാർ പിടികൂടി ചാക്കിലാക്കി സ്ഥലത്ത് എത്തിയ നഗരസഭ അധികൃതർക്ക് കൈമാറി. അല്പ സമയത്തിന് ശേഷം ചത്ത നിലയിൽ കണ്ടെത്തിയ നായയെ തൃശ്ശൂർ വെറ്റിനറി ആശുപത്രിയിൽ പോസ്റ്റ്മോർട്ടത്തിന് കൊണ്ട് പോയതായി നഗരസഭ അധികൃതർ അറിയിച്ചു.
