യുഡിഎഫ് തിരഞ്ഞെടുപ്പ് കമ്മിറ്റി ഓഫീസ് പ്രവർത്തനം തുടങ്ങി; പിണറായി സർക്കാർ കേരളത്തെ സർവനാശത്തിലേക്ക് നയിക്കുകയാണെന്ന് വി എം സുധീരൻ
ഇരിങ്ങാലക്കുട : കേരളത്തെ സർവനാശത്തിലേക്ക് നയിക്കുന്ന ഭരണകൂടമായി പിണറായി സർക്കാർ മാറിയെന്ന് കെപിസിസി മുൻ പ്രസിഡണ്ട് വി എം സുധീരൻ. ജനങ്ങൾ ഭരണമാറ്റം ആഗ്രഹിക്കുന്നുവെന്നത് വ്യക്തമാണെന്നും കോൺഗ്രസ്സ് നേതാവ് പറഞ്ഞു. രാജീവ് ഗാന്ധി മന്ദിരത്തിൽ യുഡിഎഫ് തിരഞ്ഞെടുപ്പ് കമ്മിറ്റി ഓഫീസിൻ്റെ ഉദ്ഘാടനവും പ്രകടനപത്രികയുടെ പ്രകാശനവും നിർവഹിച്ച് സംസാരിക്കുകയായിരുന്നു അദ്ദേഹം. അയ്യപ്പൻ്റെ സ്വർണ്ണം വരെ കൊളളയടിക്കുന്ന സർക്കാരാണ് നാട് ഭരിക്കുന്നത്. ജയിലിലായ ദേവസ്വം ബോർഡ് പ്രസിഡണ്ടുമാരെ തള്ളിപ്പറയാൻ സിപിഎം ഇത് വരെ തയ്യാറായിട്ടില്ല. ഇടതുപക്ഷ സഹയാത്രികരായ എഴുത്തുകാരും സാമ്പത്തിക ശാസ്ത്രജ്ഞരും വരെ സർക്കാരിൻ്റെ അതിദരിദ്ര മുക്ത പ്രഖ്യാപനത്തെ ചോദ്യം ചെയ്യുന്ന സാഹചര്യമാണുണ്ടായത്. അധികാരങ്ങൾ കവർന്നും ഫണ്ടുകൾ വെട്ടിക്കുറച്ചും ത്രിതല പഞ്ചായത്ത് സംവിധാനങ്ങളെ സർക്കാർ തകർത്തു. ബിജെപിയുടെ ബീഹാർ വിജയം അട്ടിമറിയിലൂടെ നേടിയതാണ്. ഇന്നലെങ്കിൽ നാളെ ദേശീയതലത്തിൽ മാറ്റമുണ്ടാകുമെന്നും വി എം സുധീരൻ പറഞ്ഞു. മണ്ഡലം കമ്മിറ്റി പ്രസിഡൻ്റ് സി എസ് അബ്ദുൾഹഖ് അധ്യക്ഷത വഹിച്ചു. മുൻ എം പി പ്രൊഫ സാവിത്രി ലക്ഷ്മണൻ, കെപിസിസി മുൻ സെക്രട്ടറി എം പി ജാക്സൻ, കെപിസിസി ജനറൽ സെക്രട്ടറി സോണിയഗിരി, ബ്ലോക്ക് പ്രസിഡൻ്റ് സോമൻ ചിറ്റേത്ത് , മണ്ഡലം പ്രസിഡൻ്റ് പി കെ ഭാസി തുടങ്ങിയവർ സംസാരിച്ചു
