39 – മത് കൂടിയാട്ട മഹോത്സവത്തിന് ഇരിങ്ങാലക്കുടയിൽ തുടക്കമായി
ഇരിങ്ങാലക്കുട :അമ്മന്നൂർ ഗുരുകുലത്തിൻ്റെ നേതൃത്വത്തിൽ 39- മത് കൂടിയാട്ടമഹോത്സവത്തിന് തുടക്കമായി. മാധവനാട്യ ഭൂമിയിൽ നടന്ന ചടങ്ങിൽ പബ്ലിക് പ്രോസിക്യൂട്ടർ അഡ്വ. ജോജി ജോർജ് കൂടിയാട്ട മഹോൽസവം ഉദ്ഘാടനം ചെയ്തു. വേണുജി അദ്ധ്യക്ഷത വഹിച്ചു. യോഗത്തിൽ പി .നന്ദകുമാർ പരമേശ്വരചാക്യാർ അനുസ്മരണവും കേളിരാമ ചന്ദ്രൻ എടനാട് സരോജിനി നങ്ങ്യാരമ്മ അനുസ്മരണവും നടത്തി. അമ്മന്നൂർ കുട്ടൻ ചാക്യാരുടെ ആചാര്യ വന്ദനത്തോടെ ആരംഭിച്ച യോഗത്തിന് ഗുരുകുലം വൈസ് പ്രസിഡൻ്റ് കലാമണ്ഡലം രാജീവ് സ്വാഗതവും ഗുരുകുലം ട്രഷറർ സരിത കൃഷ്ണകുമാർ നന്ദിയും പറഞ്ഞു തുടർന്ന് ഡോ. അപർണനങ്ങ്യാർ കംസവധം നങ്ങ്യാർകൂത്ത് അവതരിപ്പിച്ചു. നങ്ങ്യാർ കൂത്തിലെ നവരസാഭിനയവും മല്ലയുദ്ധവും കംസവധവും പ്രധാന അഭിനയ ഭാഗങ്ങളായിരുന്നു. രണ്ടാം ദിവസമായ വെള്ളിയാഴ്ച സുഭദ്രാധനഞ്ജയം അഞ്ചാമങ്കത്തിലെ സുഭദ്രയുടെ നിർവ്വഹണം അരങ്ങേറും. സുഭദ്രയായി സരിതകൃഷ്ണകുമാർ രംഗത്തെത്തും. കലാമണ്ഡലം രാജീവ്, കലാമണ്ഡലം ഹരിഹരൻ, കലാമണ്ഡലം നാരായണൻ നമ്പ്യാർ എന്നിവർ മിഴാവിലും കലാനിലയം ഉണ്ണികൃഷ്ണനു ഇടക്കയിലും സരികൃഷ്ണകുമാർ, ഗുരുകുലം അക്ഷര ,മേധാ നങ്ങ്യാർ എന്നിവർ താളത്തിലും നങ്ങ്യാർകൂത്തിന് പശ്ചാത്തലമൊരുക്കി
