ഇരിങ്ങാലക്കുട ജനറല് ആശുപത്രി പുതിയ ഒ.പി ബ്ലോക്ക് കെട്ടിടം നാടിന് സമര്പ്പിച്ചു
ഇരിങ്ങാലക്കുട : ഇരിങ്ങാലക്കുട ജനറല് ആശുപത്രി പുതിയ ഒ.പി, ഐ.പി, ഓപ്പറേഷന് തിയേറ്റര് കെട്ടിടം ആരോഗ്യ-വനിത, ശിശു വികസന വകുപ്പ് മന്ത്രി വീണാ ജോര്ജ്ജ് നാടിന് സമര്പ്പിച്ചു. ആശുപത്രി പരിസരത്ത് നടന്ന ചടങ്ങില് മന്ത്രി വീണാ ജോര്ജ് ഓണ്ലൈനായി കെട്ടിടം ഉദ്ഘാടനം നിര്വ്വഹിച്ചു. സംസ്ഥാനത്ത് ആര്ദ്രം മിഷനിലൂടെ ആരോഗ്യ മേഖലയില് വിസ്മയകരമായ മാറ്റമാണ് സാധ്യമാക്കിയിട്ടുള്ളതെന്ന് മന്ത്രി പറഞ്ഞു.ഉന്നത വിദ്യാഭ്യാസ, സാമൂഹിക നീതി വകുപ്പ് മന്ത്രി ഡോ. ആര്. ബിന്ദു അധ്യക്ഷത വഹിച്ചു
സംസ്ഥാന സര്ക്കാരിന്റെ വാര്ഷിക പദ്ധതിയില് ഉള്പ്പെടുത്തി എട്ടു കോടി രൂപയും, നബാര്ഡ് പദ്ധതിയില് ഉള്പ്പെടുത്തി പന്ത്രണ്ട് കോടി രൂപയും വിനിയോഗിച്ച് രണ്ടു ഘട്ടങ്ങളിലായി നിര്മ്മാണ പ്രവര്ത്തനങ്ങള് നടത്തിയാണ് ഒ.പി, ഐ.പി കം ഓപ്പറേഷന് തിയേറ്റര് കെട്ടിടം നിര്മാണം പൂര്ത്തീകരിച്ചത്.
ബേസ്മെന്റ് ഫ്ലോര്, ഗ്രൗണ്ട് ഫ്ളോര്, ഒന്നു മുതല് നാല് വരെയുള്ള നിലകള് എന്നിങ്ങനെ ആറ് നിലകളിലായാണ് കെട്ടിടം സജ്ജീകരിച്ചിരിക്കുന്നത്. ഒന്നാം ഘട്ടത്തില് ബേസ്മെന്റ് ഫ്ളോറില് അത്യാഹിത വിഭാഗവും ഗ്രൗണ്ട് ഫ്ലോറില് ഒ.പി, ഫാര്മസി, ലബോറട്ടറി എന്നീ വിഭാഗങ്ങളും ഒന്നാം നിലയില് വാര്ഡുകളുമായാണ് വിഭാവനം ചെയ്തിരുന്നത്. രണ്ടാം ഘട്ടത്തില് ഓപ്പറേഷന് തിയേറ്റര് ബ്ലോക്ക് രണ്ടാം നിലയിലും ഐ.സി.യു. അഡ്മിനിസ്ട്രേഷന് ബ്ലോക്ക് മൂന്നാം നിലയിലുമായിട്ടാണ് നിര്മ്മാണം പൂര്ത്തീകരിച്ചത്. പൊതുമരാമത്ത് കെട്ടിട വിഭാഗം എക്സിക്യൂട്ടീവ് എഞ്ചിനീയര് ടി കെ സന്തോഷ് കുമാര് റിപ്പോര്ട്ട് അവതരിപ്പിച്ചു. ജില്ലാ മെഡിക്കല് ഓഫീസര് (ആരോഗ്യം) ഡോ. ടി.പി ശ്രീദേവി, ആരോഗ്യ കേരളം ജില്ലാ പ്രോഗ്രാം മാനേജര് ഡോ. പി. സജീവ് കുമാര് എന്നിവര് വിശിഷ്ടാതിഥികളായി. ജില്ലാ പഞ്ചായത്ത് വൈസ് പ്രസിഡന്റ് ലത ചന്ദ്രന്, ഇരിങ്ങാലക്കുട നഗരസഭ ചെയര്പേഴ്സണ് മേരിക്കുട്ടി ജോയ്, ഇരിങ്ങാലക്കുട ബ്ലോക്ക് പഞ്ചായത്ത് പ്രസിഡന്റ് ലളിത ബാലന്, വെള്ളാങ്കല്ലൂര് ബ്ലോക്ക് പഞ്ചായത്ത് പ്രസിഡന്റ് സുധ ദിലീപ്, ഇരിങ്ങാലക്കുട നിയോജകമണ്ഡലത്തിലെ ഗ്രാമപഞ്ചായത്ത് പ്രസിഡന്റുമാര്, ഇരിങ്ങാലക്കുട നഗരസഭ വൈസ് ചെയര്മാൻ ബൈജു കുറ്റിക്കാടന്, നഗരസഭ ക്ഷേമകാര്യ സ്റ്റാന്ഡിംഗ് കമ്മിറ്റി ചെയര്പേഴ്സണ് സി.സി ഷിബിന്, നഗരസഭ പൊതുമരാമത്ത് സ്റ്റാന്ഡിംഗ് കമ്മിറ്റി ചെയര്പേഴ്സണ് ജെയ്സണ് പാറേക്കാടന്, ജനറല് ആശുപത്രി സൂപ്രണ്ട് ഡോ. എം.ജി ശിവദാസ്, ജനപ്രതിനിധികള്, വിവിധ രാഷ്ട്രീയ പാര്ട്ടി പ്രതിനിധികള് തുടങ്ങിയവര് പങ്കെടുത്തു.
