സമ്മാനാർഹമായ ലോട്ടറിയുടെ കളർ ഫോട്ടോസ്റ്റാറ്റ് നൽകി കാട്ടൂരിൽ ലോട്ടറി എജൻ്റിൽ നിന്ന് 15000 രൂപ കവർന്നു.
ഇരിങ്ങാലക്കുട : സമ്മാനാർഹമായ ലോട്ടറിയുടെ കളർ ഫോട്ടോസ്റ്റാറ്റ് നൽകി 15,000 രൂപ തട്ടിയതായി പരാതി ഉയർന്നു. സംസ്ഥാന ഭാഗ്യക്കുറിയുടെ കളർ ഫോട്ടോസ്റ്റാറ്റ് നൽകിയാണ് തട്ടിപ്പ് നടത്തിയത്. നറുക്കെടുപ്പിൽ നാലാം സമ്മാനമായ 5000 രൂപ നേടിയ ലോട്ടറിയുടെ കളർ ഫോട്ടോസ്റ്റാറ്റ് നൽകി ഏജൻ്റിൽ നിന്ന് തട്ടിയത് 15,000 രൂപയാണ്. ലോട്ടറി ഏജന്റ് നെല്ലിപ്പറമ്പിൽ തേജസിനാണ് പണം നഷ്‌ടമായത്. കാട്ടൂർ ഹൈസ്കൂളിന് സമീപത്തെ തേജസിന്റെ ലോട്ടറി കടയിൽ ബൈക്കിലെത്തിയ യുവാവ് സമ്മാനം നേടിയ ടിക്കറ്റിന്റെ കളർ കോപ്പി നൽകുകയായിരുന്നു. കഴിഞ്ഞ 21 ന് നറുകെടുത്ത കേരള സർക്കാറിന്റെ സമൃദ്ധിയുടെ മൂന്ന് ടിക്കറ്റ് ആണ് യുവാവ് നൽകിയത്. ക്യൂആർ കോഡ് ഉപയോഗിച്ചുള്ള പരിശോധനയിൽ ടിക്കറ്റിന് നാലാം സമ്മനമായ 5000 രൂപ ലഭിച്ചതായി കാണിക്കുകയും ചെയ്തു.ഇതിനെ തുടർന്ന് കമ്മീഷൻ കഴിച്ചുള്ള തുക തേജസ് യുവാവിന് നൽകുകയും ചെയ്‌. എന്നാൽ ടിക്കറ്റ് മാറാൻ തേജസ് എജൻസിലെത്തിയപ്പോൾ ഈ ലോട്ടറി 23 ന് ആലപ്പുഴ ട്രഷറിയിൽ മാറിയതായി കണ്ടെത്തിയതിനെ തുടർന്നാണ് കബളിപ്പിക്കപ്പെട്ടതായി തിരിച്ചറിഞ്ഞത്. ബൈക്കിൽ യുവാവ് എത്തുന്നതിന്റെ സിസിടിവി ദൃശ്യങ്ങൾ ലഭിച്ചിട്ടുണ്ട്. ഇത് സംബന്ധിച്ച് കാട്ടൂർ പോലീസ് പോലീസിൽ പരാതി നൽകിയിട്ടുണ്ട്.
