കെ വി ചന്ദ്രൻ സ്മാരക പ്രഥമ “ചന്ദ്രപ്രഭ” പുരസ്കാരം പള്ളം ചന്ദ്രന്
ഇരിങ്ങാലക്കുട : കെ വി ചന്ദ്രൻ സ്മാരക പ്രഥമ *ചന്ദ്രപ്രഭ* പുരസ്കാരം പള്ളം ചന്ദ്രന്. കേരള കലാമണ്ഡലം മുൻ വൈസ് ചാൻസലർ ഡോക്ടർ ടി കെ നാരായണൻ (ചെയർമാൻ), പദ്മ ശ്രീ പുരസ്‌കൃതൻ പെരുവനം കുട്ടൻമാരാർ (മുഖ്യ ഉപദേഷ്ടാവ്), ഡോക്ടർ നാരായണൻ പിഷാരടി, അനിയൻ മംഗലശ്ശേരി, രമേശൻ നമ്പീശൻ, അഡ്വക്കേറ്റ് രാജേഷ് തമ്പാൻ, ടി നന്ദകുമാർ എന്നിവരടങ്ങുന്ന പുരസ്ക്കാരനിർണ്ണയസമിതിയാണ് തിരഞ്ഞെടുത്തത്. പതിനയ്യായിരം രൂപയും, ഫലകവും, കീർത്തിപത്രവും, അംഗവസ്ത്രവും അടങ്ങുന്നതാണ് പുരസ്കാരം. കോട്ടയം ‘കളിയരങ്ങ്’ എന്ന കലാസ്ഥാപനത്തിന്റെ സ്ഥാപക സെക്രട്ടറിയായി നാലരപ്പതിറ്റാണ്ടിലേറെക്കാലമായി പ്രവർത്തിക്കുന്ന പള്ളം ചന്ദ്രന്
കേരള കലാമണ്ഡലത്തിൻ്റെ എം കെ കെ നായർ സ്മാരക സമഗ്രസംഭാവനാപുരസ്ക്കാരം ലഭിച്ചിട്ടുണ്ട്. 2026 ജനുവരി 24, 25, 26 തിയ്യതികളിലായി നടക്കുന്ന ക്ലബ്ബിൻ്റെ അമ്പത്തിയൊന്നാമത് വാർഷികാഘോഷത്തിലെ സമ്മേളനത്തിൽ പുരസ്ക്കാരം സമർപ്പിക്കുമെന്ന് ഡോക്ടർ കെ എൻ പിഷാരടി സ്മാരക കഥകളി ക്ലബ്ബ് പ്രസിഡണ്ട് രമേശൻ നമ്പീശൻ, സെക്രട്ടറി അഡ്വ രാജേഷ് തമ്പാൻ എന്നിവർ പത്രക്കുറിപ്പിൽ അറിയിച്ചു.
