ഇരിങ്ങാലക്കുട മാർക്കറ്റിൽ വയോധികനായ പച്ചക്കറി വ്യാപാരിയെ ഉൾപ്പെടെ മൂന്ന് പേരെ കടിച്ച തെരുവുനായക്ക് പേവിഷബാധ സ്ഥിരീകരിച്ചു.
ഇരിങ്ങാലക്കുട : ഇരിങ്ങാലക്കുട മാർക്കറ്റിൽ വയോധികനായ പച്ചക്കറി വ്യാപാരി ഉൾപ്പെടെ മൂന്ന് പേരെ കടിച്ച തെരുവുനായക്ക് പേവിഷബാധ സ്ഥിരീകരിച്ചു. മണ്ണുത്തി വെറ്ററിനറി സർവകലാശാലയിൽ നിന്നും പോസ്റ്റ്മാർട്ടം റിപ്പോർട്ട് വന്നതോടെയാണിത്. കഴിഞ്ഞ ദിവസം രാവിലെയാണ് മാർക്കറ്റ് റോഡിൽ ചാതേലി പൗലോസ് (84) , പച്ചക്കറി കടയിലെ ജീവനക്കാരനായ മന്ത്രിപുരം തീതായി ലിജോ (46), ലോട്ടറി വില്പനക്കാരനായ കോടാലി വാസുപുരത്ത് സണ്ണി (49) എന്നിവർക്ക് കടിയേറ്റത്.നാട്ടുകാർ പിടികൂടി ചാക്കിലാക്കിയ നായയെ അല്പസമയത്തിന് ശേഷം ചത്ത നിലയിൽ കണ്ടെത്തിയിരുന്നു. തുടർന്ന് നഗരസഭ അധികൃതരുടെ നേതൃത്വത്തിൽ നായയെ പോസ്റ്റ്മാർട്ടത്തിനായി മണ്ണുത്തി വെറ്ററിനറി സർവകലാശാലയിലേക്ക് മാറ്റിയിരുന്നു. പേ വിഷ ബാധ സ്ഥിരീകരിച്ച സാഹചര്യത്തിൽ കടിയേറ്റ മൂന്ന് പേരും ചികിൽസ തേടിയതായി അധികൃതർ ഉറപ്പ് വരുത്തിയിട്ടുണ്ട്. നാളെ രാവിലെ 7 മുതൽ ഇരിങ്ങാലക്കുട വെറ്ററിനറി ആശുപത്രിയുടെയും നഗരസഭയുടെയും നേതൃത്വത്തിൽ മാർക്കറ്റ് പരിസരത്ത് നായകളെ പിടികൂടി പേവിഷ പ്രതിരോധ കുത്തിവെപ്പ് നടത്താനുള്ള നടപടികൾ സ്വീകരിക്കുമെന്നും നഗരസഭ അധികൃതർ അറിയിച്ചു.
