ഹരിത കേരളം മിഷൻ പുരസ്കാരം മുരിയാടിന് ജില്ലയിൽ മൂന്നാം സ്ഥാനം
ഇരിങ്ങാലക്കുട : ഹരിത കേരളം കർമ്മ പദ്ധതിയുടെ ഭാഗമായി എർപ്പെടുത്തിയിട്ടുള്ള മുഖ്യമന്ത്രിയുടെ പുരസ്കാരം ജില്ലാ അടിസ്ഥാനത്തിൽ മൂന്നാം സ്ഥാനം മുരിയാട് പഞ്ചായത്തിന് ലഭിച്ചു.തിരുവനന്തപുരം വഴുതക്കാട് ടാഗോർ സെന്റിനറി ഹാളിൽ വച്ച് മുഖ്യമന്ത്രി ഉദ്ഘാടനം ചെയ്ത പുരസ്കാര വിതരണ ചടങ്ങിൽ ഹരിത കേരളം മിഷൻ ഉപാധ്യക്ഷ ഡോ : ടി എൻ സീമ ,
ജൂറി കമ്മിറ്റി ചെയർമാൻ ബയോ ഡൈവേർസിറ്റി ബോർഡ് ചെയർമാൻ കൂടിയായ ഡോ: എൻ അനിൽ കുമാർ എന്നിവരിൽ നിന്നും പഞ്ചായത്ത് പ്രസിഡൻറ് ജോസ് ചിറ്റിലപ്പള്ളി പുരസ്കാരം ഏറ്റുവാങ്ങി .
വൈസ് പ്രസിഡണ്ട് രതി ഗോപി, ആരോഗ്യ വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ കെ യു വിജയൻ, പഞ്ചായത്ത് അംഗങ്ങളായ തോമസ് തൊകലത്ത് ,സുനിൽകുമാർ എ.എസ്,നിജി വത്സൻ ,നിഖിത അനൂപ് , മണി സജയൻ, സെക്രട്ടറി എം. ശാലിനി ശ്രീധ പ്രിയേഷ് എന്നിവർക്കൊപ്പം ആണ് പുരസ്കാരം ഏറ്റുവാങ്ങിയത്
കാലാവസ്ഥാ വ്യതിയാനത്തെ ചെറുക്കുന്നതിനും പരിസ്ഥിതി പുനസ്ഥാപന പ്രവർത്തനങ്ങളുടെ ഭാഗമായും സംസ്ഥാനത്ത് ഹരിത കേരളം മിഷന്റെ നേതൃത്വത്തിൽ ഗ്രാമ പഞ്ചായത്തുകൾ പച്ചത്തുരുത്തുകൾ സ്ഥാപിച്ചിട്ടുണ്ട് .
ആനന്ദപുരം വാർഡ് 2 ലെ പാലക്കുഴിയിൽ തരിശായി കിടന്നിരുന്ന 35 സെൻ്റ് സ്ഥലം ലീസിനെടുത്ത്
30 ൽപരം ഫാമിലിയിൽപ്പെട്ട
150 വൃക്ഷതൈകൾ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി പ്രകാരം വച്ച് പിടിപ്പിച്ചാണ് 2019 ൽ പച്ചത്തുരുത്ത് സ്ഥാപിച്ചത്.
പച്ചതുരുത്തിൻ്റെ സംരക്ഷണവും പരിപാലനത്തിനുമൊപ്പം കാലാവസ്ഥാ വ്യതിയാനത്തെ പ്രതിരോധിക്കാനുള്ള
കർമ്മപദ്ധതി കിലയുടെ സഹകരണത്തോടെ നടപ്പാക്കുന്ന ജില്ലയിലെ പ്രഥമപഞ്ചായത്ത്, മാന്തോപ്പുകൾ രൂപപ്പെടുത്തുന്ന പദ്ധതി, ചങ്ങാതിക്കൊരം മരം പരിപാടിയിലൂടെ 3000 കശുമാവിൻ തൈകളുടെ വിതരണം, ഓർമ്മമരം പദ്ധതിയിൽ 1000 ഫലവൃക്ഷങ്ങൾ വച്ച് പിടിപ്പിക്കൽ, തരിശു ഭൂമിയിൽ ഔഷധ കൃഷി എന്നിവയും ജൈവ വൈവിധ്യ സംരക്ഷണത്തിൻ്റെ ഭാഗമായുള്ള മുരിയാട് പഞ്ചായത്തിൻ്റെ പദ്ധതികളാണ്.
