മാർക്കറ്റ് പരിസരത്ത് മൂന്ന് പേരെ കടിച്ച തെരുവുനായക്ക് പേവിഷബാധ; പ്രതിരോധ കുത്തിവെപ്പ് നടപടികളുമായി അധികൃതർ; നഗരസഭ ഓഫീസ് പരിസരത്ത് ഭക്ഷണാവിഷ്ടങ്ങൾ നിക്ഷേപിച്ച സംഭവത്തിൽ പിഴ ഈടാക്കി നഗരസഭ
ഇരിങ്ങാലക്കുട : ഇരിങ്ങാലക്കുട മാർക്കറ്റ് പരിസരത്ത് മൂന്ന് പേരെ കടിച്ച തെരുവുനായക്ക് പേവിഷബാധ സ്ഥിരീകരിച്ച സാഹചര്യത്തിൽ നായ്ക്കൾക്കുള്ള പേവിഷ പ്രതിരോധകുത്തിവെപ്പ് നടപടികളിലേക്ക് കടന്ന് അധികൃതർ. പട്ടണത്തിലെ മാർക്കറ്റ്, നഗരസഭ ഓഫീസ് പരിസരം, വിശ്വനാഥപുരം ക്ഷേത്രം പരിസരം തുടങ്ങി എഴോളം കേന്ദ്രങ്ങളിലായി 48 തെരുവ് നായ്ക്കൾക്ക് കുത്തിവെപ്പ് നടത്തിയതായി നഗരസഭ അധികൃതർ അറിയിച്ചു. ഇതിൽ 36 എണ്ണം മാർക്കറ്റ് പരിസരത്ത് നിന്ന് ഉള്ളവയാണ്. വെറ്റിനറി ആശുപത്രിയിലെ ഡോ സജേഷ്, പിഎച്ച്ഐ മാരായ സൂര്യ എ എസ്, നീതു പി എം , ലൈവ് സ്റ്റോക്ക് ഇൻസ്പെക്ടർമാരായ അമ്പിളി, സൂര്യ, ലാബ് അറ്റണ്ടർ പ്രമീള എന്നിവരുടെ നേതൃത്വത്തിൽ രാവിലെ 7 മുതൽ 11.30 ആയിരുന്നു നടപടികൾ. വരും ദിവസങ്ങളിലും വാക്സിനേഷൻ നടപടികൾ തുടരുമെന്ന് അധികൃതർ അറിയിച്ചു.
പൊതുയിടങ്ങളിൽ ഭക്ഷണാവിഷ്ടങ്ങൾ നിക്ഷേപിക്കുന്നവർക്കെതിരെ നടപടികൾ തുടരുമെന്ന് നഗരസഭ അധികൃതർ വ്യക്തമാക്കിയിട്ടുണ്ട്. നഗരസഭ ഓഫീസ് പരിസരത്ത് ഭക്ഷണാവിഷ്ടങ്ങൾ നിക്ഷേപിച്ചതുമായി ബന്ധപ്പെട്ട് നഗരസഭ നൽകിയ നോട്ടീസിൻ്റെ അടിസ്ഥാനത്തിൽ കയ്പമംഗലം സ്വദേശി മനോഹരൻ 5000 രൂപ പിഴ അടച്ചതായി നഗരസഭ അധികൃതർ അറിയിച്ചു. മുൻ നഗരസഭ കൗൺസിലർ അഡ്വ പി ജെ തോമസ് നൽകിയ പരാതിയെ തുടർന്നായിരുന്നു നടപടി. ഭക്ഷണം വലിച്ച് എറിഞ്ഞ വ്യക്തി എത്തിയ വണ്ടി മോട്ടോർ വാഹന വകുപ്പിൻ്റെ സഹായത്തോടെ തിരിച്ചറിഞ്ഞാണ് വാഹന ഉടമയ്ക്ക് നഗരസഭ നോട്ടീസ് നൽകിയത്.
