ചിങ്ങമാസപുലരിയിൽ മാപ്രാണം സ്വദേശിയായ വയോധികയ്ക്ക് യാഥാർഥ്യമായത് വീടെന്ന സ്വപ്നം; അന്തിയുറങ്ങാനുള്ള ഇടം സാധ്യമായത് ജനപ്രതിനിധികളുടെ ഇടപെടലുകളെ തുടർന്ന്
ഇരിങ്ങാലക്കുട : ചിങ്ങമാസപുലരിയിൽ വയോധികയ്ക്ക് യാഥാർഥ്യമായത് വീടെന്ന സ്വപ്നം. എകാന്ത ജീവിതം നയിക്കുന്ന മാപ്രാണം ചെമ്മണ്ട വീട്ടിൽ പരേതനായ വിനോദ് ഭാര്യ മല്ലികയ്ക്ക് (65) അന്തിയുറങ്ങാനുള്ള ഇടം സാധ്യമായത് ജനപ്രതിനിധികളുടെയും സുമനസ്സുകളുടെയും ഇടപെടലുകളെ തുടർന്ന്.നഗരസഭയുടെ വാർഡ് ആറിൽ പിഎംഎവൈ ലൈഫ് ഭവന പദ്ധതിയിലൂടെ ലഭിച്ച നാലുലക്ഷം രൂപ കൊണ്ട് വീടിന്റെ പണികൾ പൂർത്തീകരിക്കാൻ കഴിയാതെ വന്ന സാഹചര്യത്തിൽ വാർഡ് കൗൺസിലർ ബൈജു കുറ്റിക്കാടൻ, അഞ്ചാം വാർഡ് കൗൺസിലർ അജിത്കുമാർ എന്നിവർ ബിരിയാണി ചലഞ്ചിലൂടെ നിർമ്മാണപൂർത്തീകരണത്തിന് ആവശ്യമായ ഫണ്ട് കണ്ടെത്തുകയായിരുന്നു. തുടർച്ചയായ മഴയെ തുടർന്ന് വീട് ഇടിഞ്ഞ് താമസയോഗ്യമല്ലാതെ ആയ സാഹചര്യത്തിൽ ഇവർ വിവിധയിടങ്ങളിലാണ് കഴിഞ്ഞ് വന്നിരുന്നത്. ഒന്നര ലക്ഷത്തിൽ അധികം രൂപ ചിലവാക്കിയാണ് നിർമ്മാണ പ്രവർത്തനങ്ങൾ പൂർത്തീകരിച്ചത്. താക്കോൽ ദാന ചടങ്ങിൽ മാപ്രാണം പള്ളി വികാരി ഫാ ജോണി മേനാച്ചേരി,
മുൻ ട്രസ്റ്റി മിൽസൺ പാറേമ്മൽ , സി ഡി ജോസ്, ആന്റണി മഞ്ഞളി, ഫിജോ കാഞ്ഞിരക്കാടൻ നിക്സൺ ആലപ്പാടൻ, ജോൺസൺ മഞ്ഞളി,രാജു തളിയക്കാട്ടിൽ, സജീവൻ പ്ലാവിൻ കൂട്ടത്തിൽ, ലിന്റോ അറക്കൽ, ജോയ് ഔസേപ്പ് മാറോക്കി തുടങ്ങിയവർ പങ്കെടുത്തു.
