ഇരിങ്ങാലക്കുട ജനറല്‍ ആശുപത്രിയിലെ മുൻവശത്തെ മതിലിൻ്റെയും ഗേറ്റ് വേയുടെയും നിർമ്മാണ പ്രവർത്തനങ്ങൾക്ക് തുടക്കമായി
ഇരിങ്ങാലക്കുട : ഇരിങ്ങാലക്കുട ജനറല്‍ ആശുപത്രിയുടെ മുന്‍വശത്തെ മതിലിന്റെയും ഗേറ്റ് വേയുടെയും നിര്‍മ്മാണോദ്ഘാടനം ഉന്നത വിദ്യാഭ്യാസ, സാമൂഹികനീതി വകുപ്പ് മന്ത്രി ഡോ. ആര്‍. ബിന്ദു നിര്‍വഹിച്ചു. മന്ത്രിയുടെ ആസ്തി വികസന ഫണ്ടില്‍ നിന്നും 16 ലക്ഷം രൂപ വിനിയോഗിച്ചാണ് ഇരിങ്ങാലക്കുട ജനറല്‍ ആശുപത്രിയുടെ മുന്‍വശത്തെ മതിലും ഗേറ്റ് വേയും നിര്‍മിക്കുന്നത്. 24 മീറ്റര്‍ നീളത്തില്‍ മതിലിന്റെ പ്രവൃത്തിയും ആറ് മീറ്റര്‍ വീതിയുമുള്ള ഗേറ്റ് വേയുമാണ് ഈ പ്രവൃത്തിയില്‍ ഉള്‍പ്പെടുന്നത്.
നഗരസഭ ചെയര്‍പേഴ്‌സണ്‍ മേരിക്കുട്ടി ജോയ് അധ്യക്ഷത വഹിച്ചു. നഗരസഭ വൈസ് ചെയര്‍പേഴ്‌സണ്‍ ബൈജു കുറ്റിക്കാടന്‍, സ്റ്റാന്‍ഡിംഗ് കമ്മിറ്റി ചെയർമാൻമാരായ അംബിക പള്ളിപ്പുറത്ത്, ഫെനി എബിന്‍ വെള്ളാനിക്കാരന്‍, ജെയ്‌സണ്‍ പാറേക്കാടന്‍, വാര്‍ഡ് കൗണ്‍സിലര്‍ പി.ടി ജോര്‍ജ്, ഇരിങ്ങാലക്കുട ജനറല്‍ ആശുപത്രി സൂപ്രണ്ട് ഡോ. എം.ജി. ശിവദാസ്, പി.ഡബ്ല്യു.ഡി അസിസ്റ്റന്റ് എക്‌സിക്യുട്ടീവ് എഞ്ചിനീയര്‍ നിമേഷ് പുഷ്പന്‍, അസിസ്റ്റന്റ് എഞ്ചിനീയര്‍ സുജേഷ് എന്നിവര്‍ പങ്കെടുത്തു.
