എല്‍.ഇ.ഡി വോളും സൗണ്ട് സിസ്റ്റവും ഇരിങ്ങാലക്കുട സെന്റ് ജോസഫ്സ് കോളജിന് മന്ത്രി ഡോ.ആര്‍.ബിന്ദു കൈമാറി
ഇരിങ്ങാലക്കുട : ഇരിങ്ങാലക്കുട സെന്റ് ജോസഫ്സ് (ഓട്ടോണമസ്) കോളജിലേക്ക് ഇരിങ്ങാലക്കുട എം.എല്‍.എ യും ഉന്നതവിദ്യാഭ്യാസ സാമൂഹ്യനീതി വകുപ്പ് മന്ത്രിയുമായ ഡോ.ആര്‍.ബിന്ദുവിന്റെ 2023- 24 വര്‍ഷത്തെ പ്രത്യേക വികസന ഫണ്ടില്‍ നിന്നും അനുവദിച്ച എല്‍.ഇ.ഡി വോളിന്റെയും സൗണ്ട് സിസ്റ്റത്തിന്റെയും ഉദ്ഘാടനം മന്ത്രി ഡോ.ആര്‍.ബിന്ദു നിര്‍വ്വഹിച്ചു. സെന്റ് ജോസഫ്സ് കോളജ് ഓഡിറ്റോറിയത്തില്‍ വെച്ച് നടന്ന ചടങ്ങില്‍ മന്ത്രി ഡോ.ആര്‍. ബിന്ദു എല്‍.ഇ.ഡി വോളും സൗണ്ട് സിസ്റ്റവും കോളജിന് കൈമാറി. ഇരിങ്ങാലക്കുട എം.എല്‍.എയുടെ 2023- 24 വര്‍ഷത്തെ പ്രത്യേക വികസന ഫണ്ടില്‍ നിന്നും 25 ലക്ഷം രൂപ ഉപയോഗിച്ചാണ് 15.75 അടി നീളവും 8.4 അടി വീതിയുമുള്ള എല്‍.ഇ.ഡി വോളും 12000 വാട്ട് സൗണ്ട് സിസ്റ്റവും കോളജിന് നല്‍കിയത്. ഇരിങ്ങാലക്കുട നഗരസഭാ ചെയര്‍പേഴ്‌സണ്‍ മേരിക്കുട്ടി ജോയ് അധ്യക്ഷത വഹിച്ചു. പ്രിന്‍സിപ്പല്‍ ഡോ.സി.ബ്ലെസി, കൗണ്‍സിലര്‍ ഫെനി അബിന്‍ വെള്ളാനിക്കാരന്‍, റെയ്ച്ചല്‍ റോസ്, ഐ.ക്യു.എ.സി കോര്‍ഡിനേറ്റര്‍ ഡോ. ബിനു ടി.വി എന്നിവര്‍ പങ്കെടുത്തു.
