ഇരിങ്ങാലക്കുട : കൂടൽമാണിക്യം ക്ഷേത്രത്തിലെ പ്രസിദ്ധമായ തണ്ടിക വരവ് , തൃപ്പൂത്തരി, മുക്കുടി ആഘോഷങ്ങൾക്ക് മുന്നോടിയായി നടന്ന കലവറ നിറക്കൽ ചടങ്ങ് ഭക്തിസാന്ദ്രം. ക്ഷേത്രം മേൽശാന്തി പുത്തില്ലത്ത് നീലകണ്ഠൻ നമ്പൂതിരി ശ്രീകോവിൽ നിന്നും പകർന്നു കൊണ്ടുവന്ന ദീപം തെളിച്ചാണ് ചടങ്ങുകൾക്ക് തുടക്കമായത്.

ദേവസ്വം ചെയർമാൻ അഡ്വ. സി.കെ. ഗോപി അദ്ധ്യക്ഷം വഹിച്ച ചടങ്ങിന് മെമ്പർമാരായ അഡ്വക്കേറ്റ് അജയകുമാർ സ്വാഗതവും രാഘവൻ മുളങ്ങാടൻ നന്ദിയും പറഞ്ഞു. ക്ഷേത്ര ഭൂമിയിൽ വിളഞ്ഞ നെല്ല് കൊയ്തെടുത്തുണ്ടാക്കിയ അരി ദേവസ്വം ചെയർമാൻ ഭഗവാന് സമർപ്പിച്ചുകൊണ്ട് കലവറ നിറയ്ക്കലിന് തുടക്കം കുറിച്ചു. ദേവസ്വം മെമ്പർമാരായ ഡോക്ടർ മുരളി ഹരിതം, കെ ബിന്ദു, അഡ്മിനിസ്ട്രേറ്റർ പ്രീതി സി , ക്ഷേത്രം ജീവനക്കാർ, ഭക്തജനങ്ങൾ എന്നിവർ ചടങ്ങിൽ സംബന്ധിച്ചു

ഇരിങ്ങാലക്കുട : പുല്ലൂർ ചമയം നാടകവേദിയുടെ വാർഷികാഘോഷങ്ങളുടെ ഭാഗമായി സംഘടിപ്പിക്കുന്ന പുല്ലൂർ നാടക രാവിന് ഇരിങ്ങാലക്കുട ടൗൺ ഹാളിൽ തുടക്കമായി. അഡ്വ തോമസ് ഉണ്ണിയാടൻ ഉദ്ഘാടനം നിർവ്വഹിച്ചു. മുൻ മന്ത്രി ഡോ ആർ ബിന്ദു അദ്ധ്യക്ഷത വഹിച്ചു. സിനിമ നാടക നടൻ ടി ജി രവി, സംഗീത നാടക അക്കാദമി സെക്രട്ടറി എൻ വി പ്രദീപ് കുമാർ, ജില്ലാ പഞ്ചായത്ത് വൈസ് പ്രസിഡൻ്റ് ടി കെ സുധീഷ് എന്നിവർ സംസാരിച്ചു . ചമയം ചെയർമാൻ എ എൻ രാജൻ സ്വഗതവും സെക്രട്ടറി വേണു എളന്തോളി നന്ദിയും പറഞ്ഞു. തുടർന്ന് ഡ്രീ കേരള അവതരിപ്പിച്ച ഊരുവലം എന്ന നാടകം അരങ്ങേറി.

ഇരിങ്ങാലക്കുട: കാറളം അരുമ്പുള്ളി വിജയന്റെ ഭാര്യ സാവിത്രിയെ കൊലപ്പെടുത്തിയ കേസിലെ പ്രതിക്ക് പരമാവധി ശിക്ഷ വാങ്ങി നല്കുന്നതിനാവശ്യമായ നടപടികൾ സർക്കാരിന്റെ ഭാഗത്തുനിന്ന് ഉണ്ടാകുമെന്ന് ആഭ്യന്തര വകുപ്പ് മന്ത്രി രമേശ് ചെന്നിത്തല പറഞ്ഞു. പ്രതിയെ 48 മണിക്കൂറിനകം പിടികൂടിയ ആഭ്യന്തരവകുപ്പിന് നന്ദി പറയുന്നതിന് തോമസ് ഉണ്ണിയാടൻ എം എൽ എ ക്കൊപ്പം എത്തിയ സാവിത്രിയുടെ മക്കളായ സുഭാഷ്, സുമേഷ് എന്നിവർക്കാണ് മന്ത്രി ഉറപ്പ് നൽകിയത്. കെ പി സി സി ജനറൽ സെക്രട്ടറി സോണിയ ഗിരി, വാർഡ് അംഗം കെ.ബി.ഷമീർ എന്നിവരും ഒപ്പമുണ്ടായിരുന്നു.

ഇരിങ്ങാലക്കുട : പുല്ലൂർ സെന്റ് സേവ്യേഴ്സ് സി.എം.ഐ. സ്കൂളിൽ നടന്ന തൃശ്ശൂർ സെൻട്രൽ സഹോദയ സി.ബി.എസ്.ഇ. കലോത്സവത്തിൽ ചെന്ത്രാപ്പിന്നി എസ്.എൻ. വിദ്യാഭവൻ 1113 പോയിന്റ് നേടി ഓവറോൾ ചാമ്പ്യൻഷിപ്പ് കരസ്ഥമാക്കി. 1077 പോയിന്റുമായി മാള ഹോളി ഗ്രേസ് അക്കാദമി രണ്ടാം സ്ഥാനവും 1063 പോയിന്റുമായി മാള ഡോ. രാജു ഡേവിസ് ഇന്റർനാഷണൽ സ്കൂൾ മൂന്നാം സ്ഥാനവും നേടി.

സമാപന സമ്മേളനത്തിൽ അഡ്വ തോമസ് ഉണ്ണിയാടൻ എംഎൽഎ സമ്മാനദാനം നിർവഹിച്ചു. ചീഫ് പാട്രൺ രാജു ഡേവീസ് അധ്യക്ഷത വഹിച്ചു. ഡോ പി എൻ ഗോപകുമാർ, ബിനുരാജ്, ഫാ വർഗ്ഗീസ് പി ജെ , ഫാ ജോയ് പയ്യപ്പിള്ളി , ഫാ അരുൺ പൈനാടത്ത് എന്നിവർ സംസാരിച്ചു.

ഇരിങ്ങാലക്കുട : ഇരിങ്ങാലക്കുട കൂടൽമാണിക്യം ദേവസ്വം അഡ്മിനിസ്ട്രേറ്ററായി സി പ്രീതി ചുമതലയേറ്റു. അഡ്മിനിസ്ട്രേറ്ററായി പ്രവർത്തിച്ചിരുന്ന ജി എസ് രാധേഷ് ഡെപ്യൂട്ടേഷൻ കാലാവധി കഴിഞ്ഞ് മാത്യ വകുപ്പായ റവന്യൂവിലേക്ക് ആഗസ്റ്റ് മാസത്തിൽ മടങ്ങിയതോടെ ജില്ലാ കളക്ടർ ശിഖ സുരേന്ദ്രനാണ് അഡ്മിനിസ്ട്രേറ്റരുടെ ചുമതല വഹിച്ചിരുന്നത്. കളക്ടറേറ്റിൽ നടന്ന ചടങ്ങിൽ ജില്ലാ കളക്ടറിൽ നിന്നും സി പ്രീതി ചുമതലയേറ്റു. തൃശ്ശൂർ മുളങ്കുന്നത്ത്കാവ് സ്വദേശിയായ സി പ്രീത സെക്രട്ടറിയേറ്റിൽ പൊതുഭരണ വകുപ്പിലാണ് പ്രവർത്തിച്ചിരുന്നത്

ഇരിങ്ങാലക്കുട : ശ്രീകണ്‌ഠേശ്വരം ക്ഷേത്ര കമ്മിറ്റിയുടെ കീഴിൽ പ്രവർത്തിക്കുന്ന കണ്ഠേശ്വരം ആർട്സ് അക്കാദമിയുടെ പ്രഥമരുദ്രപ്രഭ പുരസ്കാരത്തിന് കഥകളി ആചാര്യൻ കലാനിലയം ഗോപിയും ചെണ്ട കലാകാരൻ കലാമണ്ഡലം ശിവദാസും അർഹരായി. 10000 രൂപയും ഉപഹാരവും പൊന്നാടയും അടങ്ങുന്നതാണ് പുരസ്കാരം. ഒക്ടോബർ 20 ന് വൈകീട്ട് 5 ന് നടക്കുന്ന ചടങ്ങിൽ പുരസ്കാരങ്ങൾ സമ്മാനിക്കുമെന്ന് ക്ഷേത്ര കമ്മിറ്റി പ്രസിഡണ്ട് എൻ വിശ്വനാഥൻ, അക്കാദമി പ്രസിഡണ്ട് ജനാർദ്ദനൻ കാക്കര , പ്രിൻസിപ്പൽ പി നന്ദകുമാർ എന്നിവർ പത്ര സമ്മേളനത്തിൽ അറിയിച്ചു. അക്കാദമിയുടെ രണ്ടാം വാർഷികാഘോഷം ഒക്ടോബർ 21 ന് നടക്കും. 85 ഓളം വിദ്യാർഥികൾ വിവിധ കലകൾ അഭ്യസിച്ച് വരുന്നുണ്ട്. എൻ മോഹൻദാസ് , ടി ഉണ്ണികൃഷ്ണമേനോൻ, ഹേമചന്ദ്രൻ കൂപ്പാട്ട്, ജയലക്ഷ്മി എന്നിവരും പത്ര സമ്മേളനത്തിൽ പങ്കെടുത്തു

ഇരിങ്ങാലക്കുട : ഇരിങ്ങാലക്കുട താലൂക്ക് ആശുപത്രിക്ക് മുൻവശത്തായി പ്രവർത്തിക്കുന്ന കൈരളി നാട്യകലാക്ഷേത്രത്തിൻ്റെ 44 -ാം വാർഷികാഘോഷം ഒക്ടോബർ 21 ന് നടക്കും. വൈകീട്ട് 6.30 ന് ശ്രീനാരായണഹാളിൽ നടക്കുന്ന വാർഷികാഘോഷം അഡ്വ തോമസ് ഉണ്ണിയാടൻ എംഎൽഎ ഉദ്ഘാടനം ചെയ്യുമെന്ന് ഡയറക്ടർ മുരിയാട് മുരളീധരൻ പത്ര സമ്മേളനത്തിൽ അറിയിച്ചു. ബ്രഹ്മ കുമാരി വാസന്തി ബെഹൻജി അനുഗ്രഹ പ്രഭാഷണം നടത്തും. നഗരസഭ ചെയർമാൻ എം പി ജാക്സൻ മുഖ്യാതിഥി ആയി പങ്കെടുക്കും. സമ്മളാനന്തരം നാട്യകലാക്ഷേത്രത്തിലെ വിദ്യാർഥികളുടെ നേതൃത്വത്തിൽ കലാപരിപാടികൾ അരങ്ങേറും.

ഇരിങ്ങാലക്കുട : കാറളം മൃഗാസ്പത്രിക്ക് പിന്നിൽ അരുമ്പുള്ളി വിജയൻറെ ഭാര്യ സാവിത്രിയെ (79 വയസ്) അതിദാരുണമായി കൊലപ്പെടുത്തിയ പ്രതിയെ 48 മണിക്കൂറിനുള്ളിൽ പിടികൂടിയ അന്വേഷണ സംഘത്തെ തോമസ് ഉണ്ണിയാടൻ എം എൽ എ. അഭിനന്ദിച്ചു. സംഘത്തിന് നേതൃത്വം നൽകിയ റൂറൽ എസ് പി മുഹമ്മദ് നദീം, എ എസ്‌ പി ടി.എസ്. സിനോജ്, ഡി വൈ എസ് പി എം.കെ. ഷാജി എന്നിവരെയാണ് എം എൽ എ അഭിനന്ദിച്ചത്. നാടിനെ നടുക്കിയ കൊലപാതകത്തിന്റെ പ്രതിയെ പിടികൂടിയതോടെ ജനങ്ങൾക്കുണ്ടായിരുന്ന ആശങ്കകൾ ദൂരീകരിക്കാൻ സാധിച്ചിട്ടുണ്ടെന്ന് റൂറൽ എസ്പി ഓഫീസിൽ നടന്ന ചടങ്ങിൽ എംഎൽഎ അറിയിച്ചു.

ഇരിങ്ങാലക്കുട : സിപിഎം മുൻ ജില്ലാ സെക്രട്ടറിയേറ്റ് അംഗവും സിഐടിയു സംസ്ഥാന കമ്മിറ്റി അംഗവുമായിരുന്ന മാപ്രാണം ചെമ്പാറ കൊച്ചക്കൻ മകൻ സി കെ ചന്ദ്രൻ അന്തരിച്ചു . 72 വയസ്സായിരുന്നു . അർബുദരോഗത്തെ തുടർന്ന് ദീർഘനാളായി ചികിൽസയിലായിരുന്നു . പതിനൊന്ന് വർഷം സിപിഎം ഇരിങ്ങാലക്കുട ഏരിയ സെക്രട്ടറിയായി പ്രവർത്തിച്ചു . 2006 ൽ ഇരിങ്ങാലക്കുട മണ്ഡലത്തിൽ നിന്നും നിയമസഭയിലേക്ക് മൽസരിച്ചു . ഇരിങ്ങാലക്കുട ബ്ലോക്ക് ബിഡിസി ചെയർമാൻ, കേരള ഫീഡ്സ് ഡയറക്ടർ എന്നീ സ്ഥാനങ്ങളും വഹിച്ചിട്ടുണ്ട്. ശകുന്തളയാണ് ( റിട്ട. അസി സെക്രട്ടറി, കരുവന്നൂർ ബാങ്ക്) ഭാര്യ. വിന്നി ( മുരിയാട് സഹകരണ ബാങ്ക്) , സുമിക്കോ (നേഴ്‌സ്, മെഡിക്കൽ കോളേജ് , തൃശൂർ ) എന്നിവർ മക്കളും റെനീഷ് ( തദ്ദേശവകുപ്പ് ) , അരുൺ ( അപ്പോളോ ടയേഴ്സ് ) എന്നിവർ മരുമക്കളുമാണ് . സംസ്കാരം ഇന്ന് വൈകീട്ട് 5 ന് വീട്ടുവളപ്പിൽ

ഇരിങ്ങാലക്കുട : പട്ടണത്തിൽ യാതൊരു നിയന്ത്രണങ്ങളുമില്ലാതെ പ്രവർത്തിക്കുന്ന ഹോം സ്‌റ്റേകൾക്ക് കടിഞ്ഞാണിടാൻ നഗരസഭ. ആരോഗ്യവിഭാഗത്തിൻ്റെ നേതൃത്വത്തിൽ പ്രത്യേക സ്‌ക്വാഡ് രൂപീകരിച്ച് ഹോം സ്‌റ്റേകളിൽ പരിശോധന നടത്താനാണ് ലക്ഷ്യമിടുന്നത് . ലേബർ ക്യാമ്പിന് സമാനമായ സാഹചര്യങ്ങളിലാണ് ക്രൈസ്റ്റ് കോളേജിനെ ചുറ്റിപ്പറ്റി ഹോം സ്‌റ്റേകൾ പ്രവർത്തിക്കുന്നതെന്നും വാർഡൻ ഇല്ലാതെയും ആവശ്യത്തിന് കെട്ടിട സുരക്ഷയോ ഇല്ലാതെയുമാണ് പ്രവർത്തിക്കുന്നതെന്ന് ക്രൈസ്റ്റ് നഗർ റെസിഡൻ്റ്സ് അസോസിയേഷൻ ചൂണ്ടിക്കാട്ടിയിരുന്നു. ഹോം സ്‌റ്റേകളുമായി ബന്ധപ്പെട്ട വിഷയത്തിൽ കോളേജിന് അടുത്ത് താമസിക്കുന്ന ഒരു ഗ്യഹനാഥന് മർദ്ദനമേല്ക്കുകയും നാല് വിദ്യാർഥികൾക്ക് എതിരെ പോലീസ് കേസ്സെടുക്കുകയും ഇവർക്കെതിരെ ക്രൈസ്റ്റ് മാനേജ്മെൻ്റ് അച്ചടക്ക നടപടി സ്വീകരിക്കുകയും ചെയ്തിരുന്നു. ഈ സാഹചര്യത്തിലാണ് അധികൃതർ ആരോപണങ്ങൾ ഉയർന്നിട്ടുള്ള വിഷയങ്ങളിൽ പരിശോധനയ്ക്ക് ഒരുങ്ങുന്നത്. അതേ സമയം ഹോം സ്റ്റേകൾക്ക് ലൈസൻസ് ആവശ്യമാണെന്ന് ഹോം സ്‌റ്റേകൾ എറെയുള്ള വർക്കല നഗരസഭയിലെ ആരോഗ്യ വിഭാഗം ഉദ്യോഗസ്ഥൻ ഫസ്റ്റ് എഡീഷ്യൻ ന്യൂസിനോട് പറഞ്ഞു. മാലിന്യ സംസ്കരണത്തിന് കൃത്യമായ സംവിധാനങ്ങൾ ഉണ്ടാകേണ്ടതുണ്ടെന്നും പരിധി വിട്ടുള്ള അന്തേവാസികൾ ഉണ്ടെങ്കിൽ മലിനീകരണ നിയന്ത്രണ ബോർഡിൻ്റെ അനുമതിയും അനിവാര്യമാണെന്നും തദ്ദേശസ്വയംഭരണ സ്ഥാപനങ്ങളുടെ അംഗീകാരത്തോടെ മാത്രമേ ഹോം സ്റ്റേ/ പേയിംഗ് ഗസ്റ്റ് സംവിധാനങ്ങൾക്ക് പ്രവർത്തിക്കാൻ കഴിയുകയുള്ളുവെന്നും ഉദ്യോഗസ്ഥൻ വ്യക്തമാക്കി.