ഇരിങ്ങാലക്കുട:കുട്ടംകുളം സമരത്തിൻ്റെ സമരവാർഷിക ദിനം ആചരിച്ചു. സിപിഐ മണ്ഡലം കമ്മിറ്റിയുടെ നേതൃത്വത്തിൽ നടന്ന പരിപാടി ജില്ലാ സെക്രട്ടറി കെ ജി ശിവാനന്ദൻ ഉദ്ഘാടനം ചെയ്തു. .കുട്ടംകുളം സമരത്തിൻ്റെ സ്മാരകം യാഥാർത്ഥ്യമാക്കാൻ ആവശ്യമായ നടപടികൾ അടിയന്തിരമായി സ്വീകരിക്കണമെന്ന് കെ ജി.ശിവാനന്ദൻ ആവശ്യപ്പെട്ടു

സിപിഐ ജില്ലാ എക്സിക്യൂട്ടീവ് അംഗം പി.മണി അദ്ധ്യക്ഷത വഹിച്ചു. മണ്ഡലം സെക്രട്ടറി എൻ കെ.ഉദയപ്രകാശ്,മുൻ സ്റ്റേറ്റ് കൗൺസിൽ അംഗം കെ.ശ്രീകുമാർ,മണ്ഡലം അസി:സെക്രട്ടറി അഡ്വ:പി ജെ.ജോബി എന്നിവർ സംസാരിച്ചു . മണ്ഡലം സെക്രട്ടേറിയറ്റ് അംഗങ്ങളായ കെ കെ.ശിവൻ,അനിതാ രാധാകൃഷ്ണൻ,കെ.എസ്.പ്രസാദ്,വി ആർ.രമേശ്,മിഥുൻ പോട്ടേക്കാരൻ

എന്നിവർ നേതൃത്വം നൽകി

ഇരിങ്ങാലക്കുട : ആളൂരിൽ പോലീസ് ജീപ്പ് ഇടിച്ച് ഗുരതരമായി പരിക്കേറ്റ് ചികിത്സയിലായിരുന്ന വിദ്യാർഥി മരിച്ചു. ആളൂർ പീണിക്കപ്പറമ്പിൽ രാജു മകൻ ജുവിൻ ( 16 വയസ്സ് ) ആണ് മരിച്ചത്. ജൂൺ 15 ന് രാവിലെ പോട്ട മൂന്നുപീടിക റോഡിൽ ആളൂർ എടത്താടൻ സെൻ്ററിന് അടുത്ത് വച്ചായിരുന്നു അപകടം. ജുവിനും സുഹൃത്ത് ആളൂർ തയ്യിൽ വീട്ടിൽ അനന്തകൃഷ്ണനും ചാലക്കുടി ക്രസൻ്റ് സ്കൂളിൽ പോയി ഇലക്ട്രിക് സ്കൂട്ടറിൽ മടങ്ങുമ്പോൾ പുറകിൽ വരികയായിരുന്ന ഡാൻസാഫ് പോലീസ് സംഘം സഞ്ചരിച്ചിരുന്ന ജീപ്പ് ഇടിക്കുകയായിരുന്നു . എറണാകുളത്തെ സ്വകാര്യ ആശുപത്രിയിൽ ചികിത്സയിലായിരുന്ന ജുവിൻ ഇന്ന് രാവിലെ എഴരയോടെയാണ് മരിച്ചത്. വണ്ടി ഓടിച്ചിരുന്ന അനന്തകൃഷ്ണനും ചികിത്സയിലാണ് . പത്താം ക്ലാസ് പഠനം പൂർത്തിയാക്കി പ്ലസ് വണ്ണിന് ചേരാനുള്ള തയ്യാറെടുപ്പിലായിരുന്നു ജൂവിൻ . ബീനയാണ് അമ്മ . ജുനിയ സഹോദരിയാണ്

ഇരിങ്ങാലക്കുട : എൽഡിഎഫ് ആവിഷ്ക്കരിച്ച പദ്ധതികൾ മാത്രമാണ് സംസ്ഥാന ബജറ്റിൽ ഇരിങ്ങാലക്കുട മണ്ഡലത്തിന് ലഭ്യമായിട്ടുള്ളതെന്നും 300 കോടി രൂപയുടെ പദ്ധതികൾ എന്ന അഡ്വ തോമസ് ഉണ്ണിയാടൻ എംഎൽഎ യുടെ അവകാശവാദം രാഷ്‌ട്രീയ കാപട്യമാണെ വിമർശനവുമായി സിപിഎം. നടവരമ്പ് സ്കൂൾ കെട്ടിടത്തിന് 5 കോടി , ഇരിങ്ങാലക്കുട വെറ്റിനറി ആശുപത്രി കെട്ടിടത്തിന് 5 കോടി , എഡ്യൂക്കേഷൻ ഹബ്ബിന് 6 കോടി, അച്യുതമേനോൻ സ്മാരക ലൈബ്രറിക്ക് ഒരു കോടി, ഗേൾസ് സ്കൂൾ കെട്ടിടത്തിന് 5 കോടി എന്നീ പദ്ധതികൾക്ക് നേരത്തെ തന്നെ 20 % തുക അനുവദിച്ചിരുന്നു. ഇതൊഴിച്ച് മറ്റൊരു പ്രവൃത്തിക്കും ഇപ്പോഴത്തെ ബജറ്റിൽ 20 % സംഖ്യ മാറ്റി വച്ചിട്ടില്ലെന്ന് സിപിഎം ഏരിയ സെക്രട്ടറി വി എ മനോജ്കുമാർ പത്രസമ്മേളനത്തിൽ പറഞ്ഞു. 36 പദ്ധതികൾക്ക് ആകെ മാറ്റി വച്ചിരിക്കുന്നത് 5200 രൂപ മാത്രമാണ്. ലോനപ്പൻ നമ്പാടൻ എംഎൽഎ ആയിരുന്ന ഘട്ടത്തിൽ തുടക്കം കുറിച്ച പദ്ധതികൾ അല്ലാതെ പുതിയതായി ഒന്നും ആരംഭിക്കാൻ നേരത്തെയും ഉണ്ണിയാടന് കഴിഞ്ഞിട്ടില്ല. നീണ്ട 15 വർഷം എംഎൽഎ ആയിരുന്ന ഘട്ടത്തിൽ ഠാണാ ചന്തക്കുന്ന് വികസനം തമസ്‌കരിക്കുകയും റോഡിൻ്റെ വീതി 17 മീറ്റർ വീതിയിൽ നിന്നും 14 മീറ്ററാക്കി കുറയ്ക്കാനുള്ള ശ്രമം നടത്തുകയുമായിരുന്നു . നിരവധി കടമ്പകൾ കടന്ന് ഡോ ആർ ബിന്ദുവിൻ്റെ തുടർച്ചയായ ഇടപെടലികളിലൂടെയാണ് ഠാണാ വികസന പദ്ധതി ഇപ്പോൾ അന്തിമ ഘട്ടത്തിൽ എത്തിയിട്ടുള്ളത്. ഠാണാ സെൻ്ററിലെ മുനിസിപ്പൽ കെട്ടിടം പൊളിച്ച് മാറ്റാതെ പദ്ധതി വൈകിപ്പിച്ചത് യുഡിഎഫ് ഭരിക്കുന്ന നഗരസഭയാണ്. കഴിഞ്ഞ ബജറ്റുകളിൽ 20 % സംഖ്യ അനുവദിച്ച് ഉൾപ്പെടുത്തിയ ഇരിങ്ങാലക്കുട ബൈപ്പാസ് റോഡ് , കാട്ടൂർ മിനി സിവിൽ സ്റ്റേഷൻ, എഡ്യൂക്കേഷൻ ഹബ്ബ് തുടങ്ങിയ പ്രവൃത്തികൾ അടിയന്തരമായി ആരംഭിക്കണമെന്നും ജനങ്ങളെ തെറ്റിദ്ധരിപ്പിക്കുന്ന എം എൽ എ യെയും യുഡിഎഫിനെയും ജനങ്ങൾ തിരിച്ചറിയണം. എരിയ കമ്മിറ്റി അംഗങ്ങളായ അഡ്വ കെ ആർ വിജയ , ആർ എൽ ശ്രീലാൽ എന്നിവരും പത്രസമ്മേളനത്തിൽ പങ്കെടുത്തു .

ഇരിങ്ങാലക്കുട : മുനിസിപ്പാലിറ്റി ആരോഗ്യ വിഭാഗവും പൊറത്തിശ്ശേരി പ്രാഥമികരോഗ്യ കേന്ദ്രവും സംയുക്തമായി നടത്തിയ പരിശോധനയിൽ ഇരിങ്ങാലക്കുട മിനി സിവിൽ സ്റ്റേഷൻ പരിസരത്തുള്ള ഹോട്ടൽ വിനയനിൽ ഭക്ഷ്യ യോഗ്യമല്ലാത്ത ഫ്രീസറിൽ സൂക്ഷിച്ചിരുന്ന ഭക്ഷണ പദാർഥങ്ങൾ കണ്ടെത്തി. തദ്ദേശ സ്ഥാപന ലൈസൻസോ, ജീവനക്കാർക്കുള്ള ഹെൽത്ത്‌ കാർഡോ ഇല്ലാതെയാണ് വീട്ടിലെ ഊണ് എന്ന പേരിൽ സ്ഥാപനം പ്രവർത്തിച്ചിരുന്നത്.

നഗരസഭ സീനിയർ പബ്ലിക് ഹെൽത്ത്‌ ഇൻസ്‌പെക്ടർ നിസാർ, പൊറത്തിശ്ശേരി പ്രാഥമികരോഗ്യ കേന്ദ്ര ഹെൽത്ത്‌ ഇൻസ്‌പെക്ടർ ടി കെ . അജീഷ്, ജൂനിയർ ഹെൽത്ത്‌ ഇൻസ്‌പെക്ടർമാരായ എൻ ആർ രതീഷ്, വി എസ് സുജിത്, ലേഖ എന്നിവരും പരിശോധനയിൽ പങ്കെടുത്തു.

വരും ദിവസങ്ങളിൽ നഗരസഭ പരിധിയിൽ പരിശോധന തുടരുമെന്നും കർശന നടപടി സ്വീകരിക്കുമെന്നും ക്ലീൻ സിറ്റി മാനേജർബേബി എസ് വ്യക്തമാക്കിയിട്ടുണ്ട്.

ഭക്ഷ്യയോഗ്യമല്ലാത്ത ഭക്ഷണത്തിൽ വില്പന നടത്തി വന്നിരുന്ന ഇരിങ്ങാലക്കുട ഠാണാവിലെ ജമുനാ ബേക്കറി പരിശോധന നടത്തി കഴിഞ്ഞ ദിവസം ആരോഗ്യ വിഭാഗം അടച്ചിട്ടിരുന്നു. ന്യൂനതകൾ പരിഹരിക്കാൻ ആവശ്യപ്പെട്ട് ബൈപ്പാസ് റോഡിൽ പ്രവർത്തിക്കുന്ന വിംബീസ് ഹോട്ടൽ, ക്രൈസ്റ്റ് എഞ്ചിനീയറിംഗ് കോളേജിലെ രണ്ട് കാൻ്റീനുകൾ, ക്രൈസ്റ്റ് കോളേജ് റോഡിൽ പ്രവർത്തിക്കുന്ന കെഎൽ 45 എന്നിവയ്ക്ക് നോട്ടീസും നൽകിയിരുന്നു. ലൈസൻസ് ഇല്ലാതെയാണ് ക്രൈസ്റ്റ് എഞ്ചിനീയറിംഗ് കോളേജിലെ കാൻ്റീനുകൾ പ്രവർത്തിച്ചിരുന്നതെന്ന് ആരോഗ്യ വിഭാഗം ഉദ്യോഗസ്ഥർ അറിയിച്ചു.

ഇരിങ്ങാലക്കുട : ” ഓർമ്മ ഉള്ള കാലം മുതൽ എല്ലാ വർഷക്കാലത്തും വീട്ടിൽ വെള്ളമാണ്. കഴിഞ്ഞ കൊല്ലവും അരയ്ക്കൊപ്പം വീട്ടിൽ വെള്ളം കയറി . കിണർ മുങ്ങി . സ്വന്തം പൈസ ചിലവഴിച്ചാണ് വൃത്തിയാക്കിയത്. 2018 ൽ വെള്ളം കയറിയ ഘട്ടത്തിലും ഒരു പൈസയും കിട്ടിയില്ല. ഈ വെള്ളത്തിലേക്കാണോ പട്ടികളെയും കൊണ്ട് കൊണ്ട് വരാൻ പോകുന്നത്? ഇത്രയെങ്കിലും പറഞ്ഞില്ലെങ്കിൽ ശരിയാകില്ല ” പറയുന്നത് 82 വയസ്സ് പിന്നിട്ട മൂർക്കനാട് സ്വദേശി നീരോലി വീട്ടിൽ ജനകൻ. നഗരസഭയുടെ ഡോഗ് ഷെൽട്ടർ പദ്ധതി പ്രദേശത്തിൻ്റെ എറ്റവും അടുത്താണ് ജനകൻ കുടുംബത്തോടൊപ്പം താമസിക്കുന്നത് . ജലം കൊണ്ട് മുറിവേറ്റ അമ്പത് വർഷത്തെ ഓർമ്മകൾ പ്രവാസത്തിലൂടെയും മെക്കാനിക്ക് ജോലിയിലൂടെയും ജീവിതം കെട്ടിപ്പടുത്ത ജനകൻ്റെ ഉള്ളിൽ തിളച്ച് മറയുന്നുണ്ട്. വെള്ളം കയറുന്ന വള്ളിക്കാഞ്ഞിരത്ത് നഗരസഭ ഭരണകൂടം നിർമ്മിക്കുന്ന ഡോഗ് ഷെൽട്ടറിന് എതിരെ പ്രദേശവാസികൾ നടത്തിയ ധർണ്ണയിലാണ് വയോധികൻ രോഷം കൊണ്ടത്. ചെറിയ ജോലികൾ എല്ലാം ഉപേക്ഷിച്ചാണ് പിറന്ന നാടിൻ്റെ മണ്ണും ജലവും മലിനമാകാതെ സംരക്ഷിക്കാൻ വാടകയ്ക്ക് വിളിച്ച സ്വകാര്യ ബസിൽ വള്ളിക്കാഞ്ഞിരവാസികൾ ഭരണകൂടത്തിൻ്റെ മുന്നിലേക്ക് എത്തിയത്. പ്രതിഷേധധർണ്ണ ജനകീയ കൂട്ടായ്മ പ്രസിഡണ്ട് അബ്‌ദുൾ കബീർ ഉദ്ഘാടനം ചെയ്തു . ബഷീർ മാളിയേക്കൽ, ഗോപാലകൃഷ്ണൻ, ഗിരീഷ്, എൽഡിഎഫ് കൗൺസിലർമാരായ പി വി ശിവകുമാർ, അൽഫോൺസ തോമസ്, വിഷ്ണു പ്രഭാകരൻ , സി സി ഷിബിൻ ,ലേഖ ഷാജി , മുൻ കൗൺസിലർ നസീമ കുഞ്ഞുമോൻ എന്നിവർ പ്രസംഗിച്ചു. പ്രദേശവാസികളുടെ സമരത്തിന് ബിജെപിയും പിന്തുണ പ്രഖ്യാപിക്കുകയാണെന്ന് പൊറത്തിശ്ശേരി എരിയ പ്രസിഡൻ്റ് സൂരജ് കടുങ്ങാടനും ധർണ്ണയെ അഭിസംബോധന ചെയ്ത് അറിയിച്ചു.

ഇരിങ്ങാലക്കുട : ഭക്ഷ്യയോഗ്യമല്ലാത്ത ഭക്ഷണസാധനങ്ങൾ വില്പന നടത്തി വന്നിരുന്ന ഇരിങ്ങാലക്കുട ഠാണാവിലെ ജമുനാ ബേക്കറി താത്കാലികമായി അടച്ചിടാൻ നഗരസഭ ആരോഗ്യവിഭാഗത്തിൻ്റെ ഉത്തരവ്. ഷിഗെല്ല, ഡെങ്കിപ്പനി ഉൾപ്പെടെയുള്ള രോഗങ്ങൾ വ്യാപകമാകുന്ന സാഹചര്യത്തിൽ സീനിയർ പബ്ലിക് ഹെൽത്ത് ഇൻസ്പെക്ടർ എ നിസ്സാറിൻ്റെ നേതൃത്യത്തിൽ ഹോട്ടൽ, കൂൾബാർ , കാൻ്റീൻ ഉൾപ്പെടെ 15 ഓളം സ്ഥാപനങ്ങളിൽ നടത്തിയ പരിശോധനയിലാണ് നടപടി. ന്യൂനതകൾ പരിഹരിക്കാൻ ആവശ്യപ്പെട്ട് അഞ്ച് സ്ഥാപനങ്ങൾക്ക് നോട്ടീസ് നൽകിയിട്ടുണ്ട്. പി എച്ച്ഐ മാരായ രജിത , ഹസ്‌ന എന്നിവരും പരിശോധന സംഘത്തിൽ ഉണ്ടായിരുന്നു. വരും ദിവസങ്ങളിലും പരിശോധന തുടരുമെന്ന് അധികൃതർ പത്രക്കുറിപ്പിൽ അറിയിച്ചു.

ഇരിങ്ങാലക്കുട : കടുത്ത സുരക്ഷയിൽ നീറ്റ് – യു ജി പരീക്ഷ . ചോദ്യക്കടലാസ് ചോർച്ചയെ തുടർന്ന് റദ്ദാക്കിയ പരീക്ഷയാണ് വിപുലമായ ക്രമീകരണങ്ങളോടെ ഞായറാഴ്ച നടന്നത് . തൃശ്ശൂർ റൂറൽ പോലീസിൻ്റെ കീഴിൽ ഇരിങ്ങാലക്കുട ബോയ്‌സ്, നടവരമ്പ് ഗവ ഹയർ സെക്കൻഡറി സ്കൂൾ , എസ് എൻ ഹയർ സെക്കൻഡറി സ്കൂൾ തുടങ്ങിയ ഒൻപത് കേന്ദ്രങ്ങളിലാണ് പരീക്ഷ ഉച്ചയ്ക്ക് നടന്നത്. ഒൻപത് കേന്ദ്രങ്ങളിലെയും കളക്ഷൻ സെൻ്ററായ ഇരിങ്ങാലക്കുട ബോയ്‌സ് ഹയർ സെക്കൻഡറി സ്കൂളിൽ രജിസ്റ്റർ ചെയ്ത 384 കുട്ടികളിൽ 286 പേരാണ് പരീക്ഷ എഴുതിയത് . എസ് എൻ സ്‌കൂളിൽ രജിസ്റ്റർ ചെയ്ത 360 കുട്ടികളിൽ 252 പേരും നടവരമ്പിൽ രജിസ്റ്റർ ചെയ്ത 360 കുട്ടികളിൽ 265 പേർ മാത്രമാണ് പരീക്ഷ എഴുതിയത്. മൂന്ന് കേന്ദ്രങ്ങളിലായി മാത്രം 301 കുട്ടികൾ പരീക്ഷ എഴുതിയിട്ടില്ല. കഴിഞ്ഞ തവണത്തെ അപേക്ഷിച്ച് പരീക്ഷയ്ക്ക് എത്താതിരുന്ന വിദ്യാർഥികളുടെ എണ്ണം ഇരട്ടിയിൽ അധികമാണെന്ന് അധികൃതർ ചൂണ്ടിക്കാണിക്കുന്നണ്ട്. എൻടിഎ യുടെ നിരീക്ഷകനും സ്ഥലത്ത് ഉണ്ടായിരുന്നു. സിറ്റി കോർഡിനേറ്ററും ബോയ്‌സ് സ്കൂൾ പ്രിൻസിപ്പലുമായ എം കെ മുരളിയുടെ നേതൃത്വത്തിൽ സിആർപിഎഫ് പോലീസ് സംഘം , റവന്യൂ , ആരോഗ്യ വകുപ്പ് ഉദ്യോഗസ്ഥർ , 16 ക്ലാസ്സ് മുറികളിലായി 32 അധ്യാപകർ തുടങ്ങിയവർ സ്‌കൂളിൽ ഉണ്ടായിരുന്നു . സ്‌കൂളിന് മുന്നിൽ ആശങ്കയോടെ കാത്ത് നിന്ന രക്ഷിതാക്കൾക്ക് മുന്നിലേക്ക് പരീക്ഷ കഴിഞ്ഞ് 5. 40 ഓടെയാണ് വിദ്യാർഥികൾ എത്തിയത് .

ഇരിങ്ങാലക്കുട : ഇരിങ്ങാലക്കുട സേവാഭാരതിയുടെ നേതൃത്വത്തിൽ കൊമ്പൊഴിഞ്ഞാമാക്കൽ ലയൺസ് ക്ലബ്ബിൻ്റെയും അമൃത ആശുപത്രിയുടെയും സഹകരണത്തോടെ സംഘടിപ്പിച്ച സൗജന്യ മെഗാ മെഡിക്കൽ ക്യാമ്പിൽ ചികിൽസകൾ തേടി എത്തിയത് ആയിരത്തോളം പേർ. ടൗൺ ഹാളിൽ നടന്ന ക്യാമ്പ് അഡ്വ തോമസ് ഉണ്ണിയാടൻ എംഎൽഎ ഉദ്ഘാടനം ചെയ്തു . സേവാഭാരതി പ്രസിഡണ്ട് നളിൻ ബാബു അധ്യക്ഷത വഹിച്ചു. സ്വാമി അമോഘാമൃത ചൈതന്യ , ആർ എസ്എസ് ഉത്തര പ്രാന്ത കാര്യവാഹ് പി എൻ ഈശ്വർജി , ക്യാമ്പ് കോർഡിനേറ്റർ ജോൺസൻ കോലങ്കണ്ണി, ഡോ ബിന്ദു രാംദാസ് , എം ഡി ജയൻ ,ജഗദീഷ് പണിക്കവീട്ടിൽ, ഹരികുമാർ തളിയക്കാട്ടിൽ തുടങ്ങിയവർ സംസാരിച്ചു . രാവിലെ 9 മുതൽ 2.30 വരെ നീണ്ടു നിന്ന ക്യാമ്പിന് 35 ഓളം ഡോക്ടർമാർ നേതൃത്വം നൽകി.

ഇരിങ്ങാലക്കുട : വൈവിധ്യമാർന്ന പരിപാടികളോടെ മേഖലയിൽ പന്ത്രണ്ടാമത് അന്താരാഷ്ട്ര യോഗ ദിനാചരണം. ശ്രീ കൂടൽമാണിക്യം ക്ഷേത്ര നടയിൽ സ്വസ്തി പവർ യോഗ സെൻ്ററിലെ യോഗ അദ്ധ്യാപിക ശരണ്യയുടെ നേതൃത്വത്തിൽ യോഗ സെൻ്ററിലെ വിദ്യാർത്ഥികളും അധ്യാപികയും ചേർന്ന് നടത്തിയ ” യോഗതരംഗ് ” അഡ്വ തോമസ് ഉണ്ണിയാടൻ എം എൽ എ ഉദ്ഘാടനം ചെയ്തു .ദേവസ്വം ഭരണ സമിതി അംഗം

അഡ്വക്കേറ്റ് കെ ജി അജയ്കുമാർ സ്വാഗതവും കുമാരി ആർദ്ര നന്ദിയും പറഞ്ഞു . അഞ്ച് മിനിറ്റിനുള്ളിൽ 60 ഓളം യോഗാസനകളാണ് പരിപാടിയുടെ ഭാഗമായി അവതരിപ്പിച്ചത് . 6 മുതൽ 65 വയസ്സ് വരെയുള്ള 35 ഓളം പേർ പങ്കെടുത്തു .

ഇരിങ്ങാലക്കുട : ബ്ലോക്ക് പഞ്ചായത്തിന്റെ ആഭിമുഖ്യത്തിൽ നടപ്പിലാക്കുന്ന അക്ഷരോന്നതി പദ്ധതിയുടെ ഭാഗമായി വിവിധ സ്ഥാപനങ്ങളിൽ നിന്നും വ്യക്തികളിൽ നിന്നും ശേഖരിച്ച 650 ഓളം പുസ്തകങ്ങൾ ബ്ലോക്ക് പഞ്ചായത്തിന്റെ പരിധിയിൽ പ്രവർത്തിക്കുന്ന വെള്ളാനി, ആനന്ദപുരം വിജ്ഞാനവാടികളിലേക്ക് കൈമാറി. ബ്ലോക്ക് പഞ്ചായത്ത് പ്രസിഡന്റ് ടി. ജി. ശങ്കരനാരായണൻ ഉദ്ഘാടനം നിർവഹിച്ചു.

വിജ്ഞാനവാടി കോർഡിനേറ്റർമാരായ മാളവിക, ആതിര എന്നിവർ പുസ്തകങ്ങൾ ഏറ്റുവാങ്ങി.

ചടങ്ങിൽ കാറളം ഗ്രാമപഞ്ചായത്ത് പ്രസിഡന്റ് കെ. കെ. ശിവൻകുട്ടി, മുരിയാട് ഗ്രാമപഞ്ചായത്ത് പ്രസിഡന്റ് സരള വിക്രമൻ, മുരിയാട് ഗ്രാമപഞ്ചായത്ത് ആരോഗ്യ സ്റ്റാൻഡിങ് കമ്മിറ്റി ചെയർപേഴ്സൺ സുനിത മുരളി,ക്ഷേമകാര്യ സ്റ്റാൻൻറിംഗ് കമ്മിറ്റി ചെയർപേഴ്സൺ എ.എം.ജോൺസൺ, ബ്ലോക്ക് ഡിവിഷൻ മെമ്പർമാരായ പ്രസീന സജയൻ, അജയൻ തറയിൽ, വാർഡ് മെമ്പർ നിജി ലിജു, ബ്ലോക്ക് പഞ്ചായത്ത് സെക്രട്ടറി നിഖിൽ കെ. കെ, ജോയിന്റ് ബി.ഡി.ഒ രാജേഷ് എൻ,പട്ടികജാതി വികസന വകുപ്പ് ഡെവലപ്മെന്റ് ഓഫീസർ പ്രിയ പി. എസ്, ആർ.ജി.എസ്.എ ബ്ലോക്ക് കോർഡിനേറ്റർ അനീഷ കെ. എ., എസ്.സി പ്രൊമോട്ടർമാരായ ആര്യ, സനിത, പട്ടികജാതി വികസന ഓഫീസിലെ ജീവനക്കാർ എന്നിവർ പങ്കെടുത്തു