ഇരിങ്ങാലക്കുട:കേരള സർക്കാരിന്റെ കായിക രംഗത്തെ മികവിനുള്ള ജി വി രാജ പുരസ്‌ക്കാരം ഇരിങ്ങാലക്കുട സെന്റ് ജോസഫ്സ് കോളേജിന്. കായികരംഗത്ത് വർഷങ്ങളായി പുലർത്തിവരുന്ന മികവിനും ദേശീയ–അന്തർദേശീയ തലങ്ങളിൽ താരങ്ങളെ വളർത്തിയെടുക്കുന്നതിൽ കോളേജ് നൽകുന്ന മികച്ച സംഭാവനകൾക്കുമുള്ള അംഗീകാരമാണ് ഈ പുരസ്കാരം.വൈസ് പ്രിൻസിപ്പാൾ ഡോ. സി അഞ്ജന റോസ്, സി. ജോമരിയ, കായിക വിഭാഗം മേധാവി ഡോ. സ്റ്റാലിൻ റാഫേൽ , കായിക അധ്യാപിക തുഷാര ഫിലിപ്പ്, ഡോ. ബിനോയ് ആനന്ദ്, വർഷ ജി നായർ, കായിക താരങ്ങളായ ജിഷില, മിത്ര പി , ശ്രീയസായി ടി എന്നിവർ ചേർന്ന് കായിക വകുപ്പ് മന്ത്രി അഡ്വ. ഒ ജെ ജനീഷിൽ നിന്നും അവാർഡ് സ്വീകരിച്ചു.

കാലിക്കറ്റ് സർവകലാശാലയുടെ 2025–26 അധ്യയന വർഷത്തെ മികച്ച വനിതാ കായിക കോളേജ് പുരസ്കാരവും സെന്റ് ജോസഫ്‌സ് കോളേജ് നേടിയിരുന്നു.

ചാലക്കുടി : ചാലക്കുടി കാർമ്മൽ ഹയർ സെക്കൻഡറി സ്കൂളിൽ നടന്ന 16-മത് ഇരിങ്ങാലക്കുട ഉപജില്ല കായിക മേളയിൽ 232 പോയിൻ്റ് നേടി ജേതാക്കളായി. 101 പോയിൻ്റ് നേടി പുതുക്കാട് സെൻ്റ് ആൻ്റണീസ് സ്കൂളാണ് രണ്ടാം സ്ഥാനത്ത് . സമാപന ചടങ്ങിൽ അഡ്വ തോമസ് ഉണ്ണിയാടൻ എംഎൽഎ സമ്മാനദാനം നിർവഹിച്ചു. ബ്ലോക്ക് പഞ്ചായത്ത് പ്രസിഡൻ്റ് ടി ജി ശങ്കരനാരായണൻ അധ്യക്ഷത വഹിച്ചു. എഇഒ എം എസ് രാജീവ്, കെ എ വർഗ്ഗീസ്, എൻ പി രജനി, ഡോ കെ ആർ സുധീർ , സി പി ജോബി , സന്ദീപ് മേനോൻ , മെൽവിൻ ദേവസ്സി തുടങ്ങിയവർ സംസാരിച്ചു

ഇരിങ്ങാലക്കുട: ഇരിങ്ങാലക്കുട സെന്റ് ജോസഫ്‌സ് കോളേജിന് കാലിക്കറ്റ് സർവകലാശാലയുടെ 2025–26 അധ്യയന വർഷത്തിലെ മികച്ച വനിതാ കായിക കോളേജ് പുരസ്കാരം .

2025–26 അധ്യയന വർഷത്തിൽ കോളേജിൽ നാല് അന്തർദേശീയ താരങ്ങൾ ഉണ്ടായിരുന്നു. ഇവരിൽ സീയ മെൽറ്റിൽഡ ബൈജു പവര്‍ലിഫ്ടിങ്ങില്‍ ഏഷ്യൻ ജൂനിയർ ചാമ്പ്യൻഷിപ്പിൽ മെഡൽ നേടി കോളേജിനും രാജ്യത്തിനും, സംസ്ഥാനത്തിനും അഭിമാനമായി. കൂടാതെ 20 ദേശീയ താരങ്ങൾ, 48 ഇന്റർ യൂണിവേഴ്സിറ്റി താരങ്ങൾ, 17 ഖേലോ ഇന്ത്യ യൂണിവേഴ്സിറ്റി ഗെയിംസ് താരങ്ങൾ എന്നിവരെ വാര്‍ത്തെടുക്കാന്‍ കോളേജിന് കഴിഞ്ഞു.

കാലിക്കറ്റ് യൂണിവേഴ്സിറ്റി ഇൻ്റർ കോളേജ് മത്സരങ്ങളിൽ വിവിധ കായിക ഇനങ്ങളിൽ ഒന്നും, രണ്ടും, മൂന്നും സ്ഥാനങ്ങളിലായി 13 ചാമ്പ്യൻഷിപ്പുകളും കോളേജ് സ്വന്തമാക്കി. കേരള സ്റ്റേറ്റ് സ്പോർട്സ് കൗൺസിലിന്റെ മൂന്ന് അക്കാദമികൾ കോളേജിൽ പ്രവർത്തിക്കുന്നുണ്ട്. ഇന്ത്യയിലെ വിവിധ ഡിപ്പാർട്ട്മെന്റുകളിലായി കോളേജിലെ ധാരാളം കായികതാരങ്ങൾ സ്പോട്ട്സ് കോട്ടയിലൂടെ ജോലി ലഭിച്ചിട്ടുണ്ട്. സർവകലാശാല ആസ്ഥാനത്ത് നടന്ന ചടങ്ങിൽ വൈസ് പ്രിൻസിപ്പൽ സിസ്റ്റർ ക്ലെയർ, കായിക വിഭാഗം മേധാവി പ്രൊഫ സ്‌റ്റാലിൻ റാഫേൽ , കായിക അധ്യാപകർ, വിദ്യാർഥികൾ എന്നിവർ ചേർന്ന് പുരസ്കാരം എറ്റുവാങ്ങി

തൃശ്ശൂർ: കാലിക്കറ്റ് യൂണിവേഴ്സിറ്റി സ്പോർട്സ് ഓവറോൾ ചാമ്പ്യൻഷിപ്പ് തുടർച്ചയായ പത്താം തവണയും ഇരിങ്ങാലക്കുട ക്രൈസ്റ്റ് കോളേജിന് സ്വന്തം. ക്രൈസ്റ്റ് കോളേജിനുവേണ്ടി കായിക താരങ്ങളോടൊപ്പം മാനേജർ ഫാ. ജോയി പീണിക്കപറമ്പിൽ, ഫിസിക്കൽ എഡ്യൂക്കേഷൻ വിഭാഗം മേധാവി ഡോ ബിന്റു ടി കല്യാൺ, അദ്ധ്യാപകരായ ഡോ. സെബാസ്റ്റ്യൻ കെ എം, ഡോ. നിധിൻ, കോച്ചുമാർ, മറ്റ് അധ്യാപകർ എന്നിവർ ചേർന്ന് കായിക കിരീടം സ്പോർട്സ് വകുപ്പ് മന്ത്രി ഒ ജെ ജനീഷിൽ നിന്നും ഏറ്റുവാങ്ങി . കഴിഞ്ഞ വര്‍ഷം ഇന്റര്‍ യൂണിവേഴ്‌സിറ്റി, യൂണിയന്‍ നാഷണല്‍, സീനിയര്‍ നാഷണല്‍ എന്നിങ്ങനെ ദേശീയതലത്തില്‍ 200 താരങ്ങളെയാണ് ക്രൈസ്റ്റ് രംഗത്തിറക്കിയത്. ഇതില്‍ 80 താരങ്ങള്‍ ദേശീയതലത്തില്‍ മെഡല്‍ സ്വന്തമാക്കി. ബാഡ്മിന്റണില്‍ കോളേജിലെ ഒമ്പത് താരങ്ങള്‍ അന്തര്‍ദേശീയ താരങ്ങളായി.

ഓള്‍ ഇന്ത്യ ഇന്റര്‍ യൂണിവേഴ്‌സിറ്റി ഷോട്ട്പുട്ടില്‍ സ്വര്‍ണ്ണമെഡല്‍ നേടിയ വി.എസ്. അനുപ്രിയ, 400 മീറ്റർ ഹാർഡിൽസിൽ സ്വർണം നേടിയ ഡെൽമ ഫിലിപ്പ്, പവര്‍ ലിഫ്റ്റിങ്ങില്‍ സ്വര്‍ണ്ണമെഡല്‍ നേടിയ പ്രതിക്ഷ സജികുമാർ , അതുല്‍ എന്നിവര്‍ ക്രൈസ്റ്റ് കോളേജിലെ താരങ്ങളാണ്. ഖേലോ ഇന്ത്യ വോളിബോള്‍ ടൂര്‍ണ്ണമെന്റില്‍ സ്വര്‍ണ്ണം നേടിയ കാലിക്കറ്റ് യൂണിവേഴ്‌സിറ്റി ടീമിലെ അഞ്ച് താരങ്ങള്‍ ക്രൈസ്റ്റില്‍ നിന്നുള്ളവരാണ് കൂടാതെ റഗ്ബി, ബാഡ്മിന്റൺ, അത്ലറ്റിക്സ്, പഞ്ചഗുസ്‌തി, നെട്ബോൾ, വടം വലി എന്നീ ഇനങ്ങളിലും നാഷണൽ മെഡൽ നേടി.

ഇരിങ്ങാലക്കുട: ഡോൺ ബോസ്കോ സ്കൂൾസ് ഇരിങ്ങാലക്കുട സംഘടിപ്പിച്ച 41-ാമത് ഡോൺ ബോസ്കോ അഖില കേരള ഇന്റർസ്കൂൾ ബാസ്കറ്റ്ബോൾ ടൂർണമെൻ്റിൽ ആൺകുട്ടികളുടെ വിഭാഗത്തിൽ ലിറ്റിൽ ഫ്ളവർ എച്ച്എസ്എസ് കൊരട്ടിയെ 83- 62 എന്ന സ്‌കോറിന് മാന്നാനം സെൻ്റ് എഫ്രേം ജേതാക്കളായി. പെൺകുട്ടികളുടെ വിഭാഗത്തിൽ മൗണ്ട് ടാബോർ പത്തനാപുരത്തെ 68-52 എന്ന സ്കോറിന് പരാജയപ്പെടുത്തി പ്രൊവിഡൻസ് ജി എച്ച് എസ് എസ് കോഴിക്കോട് ജേതാക്കളായി. മികച്ച താരങ്ങൾക്കുള്ള ഡോ രാജു എൻ കുര്യൻ അവാർഡ് പെൺകുട്ടികളിൽ പ്രൊവിഡൻസ് കോഴിക്കോടിലെ ശ്രിയക്കും ആൺകുട്ടികളിൽ സെന്റ് എഫ്രേം മാന്നാനത്തിലെ അക്ഷയ് അലക്സിനും ലഭിച്ചു.സമാപന സമ്മേളനത്തിൽ മുൻ ഇന്ത്യൻ ബാസ്കറ്റ്ബോൾ താരം ടി.കെ. ശേഷാദ്രി മുഖ്യാതിഥിയായി. ഡോൺ ബോസ്കോ സെൻട്രൽ സ്കൂൾ പ്രിൻസിപ്പൽ റവ. ഫാ. ജിതിൻ മൈക്കിൾ , ഡോൺ ബോസ്കോ ഹയർ സെക്കൻഡറി സ്കൂൾ പ്രിൻസിപ്പൽ ഫാ. ഷിനോ കളപ്പുരയ്ക്കൽ എന്നിവർ സംസാരിച്ചു.

ഇരിങ്ങാലക്കുട : ഡോൺ ബോസ്കോ സ്കൂൾസ് ഇരിങ്ങാലക്കുടയുടെ ആഭിമുഖ്യത്തിൽ സംഘടിപ്പിക്കുന്ന 41-ാമത് ഓൾ കേരള ഇന്റർസ്കൂൾ ബാസ്കറ്റ്ബോൾ ടൂർണമെൻ്റിന് തുടക്കമായി.കേരള ബാസ്കറ്റ്ബോൾ അസോസിയേഷൻ ജനറൽ സെക്രട്ടറി പി.സി ആന്റണി ഉദ്ഘാടനം നിർവഹിച്ചു .

പ്രിൻസിപ്പൽ ഫാ ഷിനോ കളപ്പുരയ്ക്കൽ ,ഫാ. സെബാസ്റ്റ്യൻ ഒറ്റപ്ലാക്കൽ, എൽ.പി ഹെഡ്മിസ്ട്രസ് ശോഭ ജെയിംസ്, പൂർവ വിദ്യാർത്ഥി കൂട്ടായ്മ സെക്രട്ടറി സുധീർ ബാബു,

പി.പി ജോണി, സ്കൂൾ കോർഡിനേറ്റർ സിൽജി ജോൺസൺ, പരിശീലകൻ പ്രേംകുമാർ വി.എം, ഫാ ജിതിൻ മൈക്കിൾ തുടങ്ങിയവർ പങ്കെടുത്തു.

ആദ്യ മത്സരത്തിൽ ക്രൈസ്റ്റ് വിദ്യാനികേതനെ പരാജയപ്പെടുത്തി, ഡോൺ ബോസ്കോ സ്കൂൾസ് ഇരിങ്ങാലക്കുട (61 – 42) വിജയികളായി. മത്സരത്തിൽ ഡോൺ ബോസ്കോ സ്ക്കൂളിലെ സവിനയ് ഷാനിഷ് 22 പോയിൻ്റ് നേടി മികച്ച പ്രകടനം കാഴ്ച വച്ചു.

ഇരിങ്ങാലക്കുട : സെൻ്റ് തോമസ് കത്തീഡ്രൽ എകെസിസിയുടെ നേതൃത്വത്തിൽ മൂന്നാമത് മാർ ജെയിംസ് പഴയാറ്റിൽ മെമ്മോറിയൽ അഖിലകേരള സെവൻസ് ഫുട്ബോൾ ടൂർണ്ണമെൻ്റ് മാർച്ച് 15 മുതൽ 22 വരെ മുൻസിപ്പൽ മൈതാനിയിയിലെ ഫ്ലഡ്ലൈറ്റ് സ്റ്റേഡിയത്തിൽ നടക്കും. 15 ന് വൈകീട്ട് 7 ന് രൂപത ബിഷപ്പ് മാർ പോളി കണ്ണൂക്കാടൻ ടൂർണ്ണമെൻ്റ് ഉദ്ഘാടനം ചെയ്യും. വിവിധ ജില്ലകളിൽ ദേശീയ, അന്തർദേശീയ ഫുട്ബോൾ താരങ്ങൾ അണിനിരക്കുന്ന നിന്നായി 8 ടീമുകൾ ടൂർണ്ണമെൻ്റിൽ പങ്കെടുക്കുമെന്ന് എകെസിസി യൂണിറ്റ് ഡയറക്ടർ ഫാ ഡോ ലാസർ കുറ്റിക്കാടൻ, ജനറൽ കൺവീനർ രഞ്ജി അക്കരക്കാരൻ , ചെയർമാൻ ഷാജു എബ്രഹാം കണ്ടംകുളത്തി എന്നിവർ പത്ര സമ്മേളനത്തിൽ അറിയിച്ചു. 22 ന് നടക്കുന്ന സമാപന സമ്മേളനത്തിൽ ഉന്നത വിദ്യാഭ്യാസ വകുപ്പ് മന്ത്രി ഡോ ആർ ബിന്ദു സമ്മാനദാനം നിർവഹിക്കും. സംഘാടകരായ റോബി കാളിയങ്കര , അഡ്വ ഹോബി ജോളി, ഡേവിസ് ചക്കാലക്കൽ, പി ടി ജോർജ്ജ് , ടെൽസൻ കോട്ടോളി, വർഗ്ഗീസ് ജോൺ തെക്കിനിയത്ത് തുടങ്ങിയവരും പത്ര സമ്മേളനത്തിൽ പങ്കെടുത്തു.

ഇരിങ്ങാലക്കുട :ഇരിങ്ങാലക്കുട ക്രൈസ്റ്റ് കോളേജ് സ്റ്റേഡിയത്തിൽ നടന്ന കണ്ടംകുളത്തി ഫുട്ബോൾ ടൂർണ്ണമെൻ്റിൽ മൂവാറ്റുപുഴ നിർമ്മല കോളേജ് ജേതാക്കൾ. ആവേശകരമായ മത്സരത്തിൽ നിശ്ചിത സമയത്തിൽ 1-1 എന്ന സ്കോറിന് തുല്യത പാലിച്ചതോടെ നടന്ന പെനാൽറ്റിയിലും 4-4 എന്ന സ്കോറിന് ഇരുടീമുകളും തുല്യനിലയിൽ എത്തി. തുടർന്ന് നടന്ന സഡൻ ഡെത്തിൽ 3-2 എന്ന സ്കോറിന് നിർമ്മല ആതിഥേയരായ ക്രൈസ്റ്റിനെ കീഴടക്കുകയായിരുന്നു. സമാപന സമ്മേളനത്തിൽ തൃശ്ശൂർ റൂറൽ ഡിവൈഎസ്പി പി ആർ ബിജോയ് മുഖ്യാതിഥി ആയിരുന്നു. പ്രിൻസിപ്പൽ ഫാ ജോളി ആൻഡ്രൂസ്, മാനേജർ ഫാ ജോയ് പീനിക്കപ്പറമ്പിൽ, കായിക വിഭാഗം മേധാവി ഡോ ബിൻ്റു ടി കല്യാൺ , കണ്ടംകുളത്തി കുടുംബാംഗം ജോസ് ജോൺ , പ്രൊഫ സെബാസ്റ്റ്യൻ കെ എം എന്നിവർ സംസാരിച്ചു.

ഇരിങ്ങാലക്കുട : കണ്ടംകുളത്തി ലോനപ്പൻ മെമ്മോറിയൽ 64- മത് സൗത്ത് ഇന്ത്യൻ ഇൻ്റർകൊളീജിയേറ്റ് ഫുട്ബോൾ ടൂർണ്ണമെൻ്റ് ഇരിങ്ങാലക്കുട ക്രൈസ്റ്റ് കോളേജ് സ്റ്റേഡിയത്തിൽ നാളെ ആരംഭിക്കും. ഫെബ്രുവരി 6 മുതൽ 10 വരെ നടക്കുന്ന ടൂർണ്ണമെൻ്റിൽ കഴിഞ്ഞ വർഷങ്ങളിലെ ജേതാക്കളായ ക്രൈസ്റ്റ് കോളേജ്, തൃശ്ശൂർ കേരളവർമ്മ, സെൻ്റ് തോമസ്, ചങ്ങനാശ്ശേരി എസ് ബി, കോതമംഗലം എം എ , ബാംഗ്ളൂർ ക്രൈസ്റ്റ്, വടക്കാഞ്ചേരി വ്യാസ കോളേജ് ഉൾപ്പെടെ സൗത്ത് ഇന്ത്യയിലെ 16 ടീമുകൾ മാറ്റുരയ്ക്കുമെന്ന് കോളേജ് പ്രിൻസിപ്പൽ ഫാ ഡോ ജോളി ആൻഡ്രൂസ്, മാനേജർ ഫാ ജോയ് പീനിക്കപ്പറമ്പിൽ എന്നിവർ പത്ര സമ്മേളനത്തിൽ അറിയിച്ചു. 7 ന് വൈകീട്ട് 4.30 ന് ഉന്നത വിദ്യാഭ്യാസ വകുപ്പ് മന്ത്രി ഡോ ആർ ബിന്ദു ടൂർണ്ണമെൻ്റ് ഉദ്ഘാടനം ചെയ്യും. 9 ന് വൈകീട്ട് 4.30 ന് കോളേജിൻ്റെ മുൻകാല പ്രതിഭകൾ പങ്കെടുക്കുന്ന പ്രദർശന മൽസരം നടക്കും. 10 ന് വൈകീട്ട് 3 മണിക്കാണ് ഫൈനൽ മത്സരം. കായിക വിഭാഗം മേധാവി ഡോ ബിൻ്റു ടി കല്യാൺ , അധ്യാപകൻ നിധിൻ എന്നിവരും പത്രസമ്മേളനത്തിൽ പങ്കെടുത്തു.

ഇരിങ്ങാലക്കുട : സെന്റ് മേരീസ് സ്കൂളിൽ വെച്ച് കേരള സംസ്ഥാന സ്കേറ്റിങ്ങ് ചാംപ്യൻഷിപ്പിന് തുടക്കമായി.തൃശൂർ ജില്ലാ പഞ്ചായത്ത് വൈസ് പ്രസിഡന്റ് ടി.കെ.സുധിഷ് ഉദ്ഘാടനം ചെയ്തു. സ്കൂൾ മാനേജർ റവ.ഡോ. ഫാ. ലാസർ കുറ്റിക്കാടൻ അധ്യക്ഷത വഹിച്ചു. സ്കൂൾ ഹെഡ് മിസ്ട്രസ് റീജ ജോസ്, ഹയർ സെക്കണ്ടറി പ്രിൻസിപ്പൽ ആൻസൻ ഡൊമിനിക് പി, കത്തീഡ്രൽ ട്രസ്റ്റി തോമസ് തൊകലത്ത്, പി.ടി.എ.പ്രസിഡന്റ് അജോ ജോൺ, ജനറൽ കൺവീനർ ടെൽസൺ കോട്ടോളി, അധ്യപകരായ ജേക്കബ് ആലപ്പാട്ട്, ഡേവിസ് ചിറയത്ത് എന്നിവർ പ്രസംഗിച്ചു. കേരളത്തിന്റെ വിവിധ ജില്ലകളിൽ നിന്നായി 250 ഓളം കുട്ടികൾ മൽസരങ്ങളിൽ പങ്കെടുത്തു.