ഇരിങ്ങാലക്കുട : സെൻ്റ് തോമസ് കത്തീഡ്രൽ എകെസിസിയുടെ നേതൃത്വത്തിൽ മൂന്നാമത് മാർ ജെയിംസ് പഴയാറ്റിൽ മെമ്മോറിയൽ അഖിലകേരള സെവൻസ് ഫുട്ബോൾ ടൂർണ്ണമെൻ്റ് മാർച്ച് 15 മുതൽ 22 വരെ മുൻസിപ്പൽ മൈതാനിയിയിലെ ഫ്ലഡ്ലൈറ്റ് സ്റ്റേഡിയത്തിൽ നടക്കും. 15 ന് വൈകീട്ട് 7 ന് രൂപത ബിഷപ്പ് മാർ പോളി കണ്ണൂക്കാടൻ ടൂർണ്ണമെൻ്റ് ഉദ്ഘാടനം ചെയ്യും. വിവിധ ജില്ലകളിൽ ദേശീയ, അന്തർദേശീയ ഫുട്ബോൾ താരങ്ങൾ അണിനിരക്കുന്ന നിന്നായി 8 ടീമുകൾ ടൂർണ്ണമെൻ്റിൽ പങ്കെടുക്കുമെന്ന് എകെസിസി യൂണിറ്റ് ഡയറക്ടർ ഫാ ഡോ ലാസർ കുറ്റിക്കാടൻ, ജനറൽ കൺവീനർ രഞ്ജി അക്കരക്കാരൻ , ചെയർമാൻ ഷാജു എബ്രഹാം കണ്ടംകുളത്തി എന്നിവർ പത്ര സമ്മേളനത്തിൽ അറിയിച്ചു. 22 ന് നടക്കുന്ന സമാപന സമ്മേളനത്തിൽ ഉന്നത വിദ്യാഭ്യാസ വകുപ്പ് മന്ത്രി ഡോ ആർ ബിന്ദു സമ്മാനദാനം നിർവഹിക്കും. സംഘാടകരായ റോബി കാളിയങ്കര , അഡ്വ ഹോബി ജോളി, ഡേവിസ് ചക്കാലക്കൽ, പി ടി ജോർജ്ജ് , ടെൽസൻ കോട്ടോളി, വർഗ്ഗീസ് ജോൺ തെക്കിനിയത്ത് തുടങ്ങിയവരും പത്ര സമ്മേളനത്തിൽ പങ്കെടുത്തു.

ഇരിങ്ങാലക്കുട :ഇരിങ്ങാലക്കുട ക്രൈസ്റ്റ് കോളേജ് സ്റ്റേഡിയത്തിൽ നടന്ന കണ്ടംകുളത്തി ഫുട്ബോൾ ടൂർണ്ണമെൻ്റിൽ മൂവാറ്റുപുഴ നിർമ്മല കോളേജ് ജേതാക്കൾ. ആവേശകരമായ മത്സരത്തിൽ നിശ്ചിത സമയത്തിൽ 1-1 എന്ന സ്കോറിന് തുല്യത പാലിച്ചതോടെ നടന്ന പെനാൽറ്റിയിലും 4-4 എന്ന സ്കോറിന് ഇരുടീമുകളും തുല്യനിലയിൽ എത്തി. തുടർന്ന് നടന്ന സഡൻ ഡെത്തിൽ 3-2 എന്ന സ്കോറിന് നിർമ്മല ആതിഥേയരായ ക്രൈസ്റ്റിനെ കീഴടക്കുകയായിരുന്നു. സമാപന സമ്മേളനത്തിൽ തൃശ്ശൂർ റൂറൽ ഡിവൈഎസ്പി പി ആർ ബിജോയ് മുഖ്യാതിഥി ആയിരുന്നു. പ്രിൻസിപ്പൽ ഫാ ജോളി ആൻഡ്രൂസ്, മാനേജർ ഫാ ജോയ് പീനിക്കപ്പറമ്പിൽ, കായിക വിഭാഗം മേധാവി ഡോ ബിൻ്റു ടി കല്യാൺ , കണ്ടംകുളത്തി കുടുംബാംഗം ജോസ് ജോൺ , പ്രൊഫ സെബാസ്റ്റ്യൻ കെ എം എന്നിവർ സംസാരിച്ചു.

ഇരിങ്ങാലക്കുട : കണ്ടംകുളത്തി ലോനപ്പൻ മെമ്മോറിയൽ 64- മത് സൗത്ത് ഇന്ത്യൻ ഇൻ്റർകൊളീജിയേറ്റ് ഫുട്ബോൾ ടൂർണ്ണമെൻ്റ് ഇരിങ്ങാലക്കുട ക്രൈസ്റ്റ് കോളേജ് സ്റ്റേഡിയത്തിൽ നാളെ ആരംഭിക്കും. ഫെബ്രുവരി 6 മുതൽ 10 വരെ നടക്കുന്ന ടൂർണ്ണമെൻ്റിൽ കഴിഞ്ഞ വർഷങ്ങളിലെ ജേതാക്കളായ ക്രൈസ്റ്റ് കോളേജ്, തൃശ്ശൂർ കേരളവർമ്മ, സെൻ്റ് തോമസ്, ചങ്ങനാശ്ശേരി എസ് ബി, കോതമംഗലം എം എ , ബാംഗ്ളൂർ ക്രൈസ്റ്റ്, വടക്കാഞ്ചേരി വ്യാസ കോളേജ് ഉൾപ്പെടെ സൗത്ത് ഇന്ത്യയിലെ 16 ടീമുകൾ മാറ്റുരയ്ക്കുമെന്ന് കോളേജ് പ്രിൻസിപ്പൽ ഫാ ഡോ ജോളി ആൻഡ്രൂസ്, മാനേജർ ഫാ ജോയ് പീനിക്കപ്പറമ്പിൽ എന്നിവർ പത്ര സമ്മേളനത്തിൽ അറിയിച്ചു. 7 ന് വൈകീട്ട് 4.30 ന് ഉന്നത വിദ്യാഭ്യാസ വകുപ്പ് മന്ത്രി ഡോ ആർ ബിന്ദു ടൂർണ്ണമെൻ്റ് ഉദ്ഘാടനം ചെയ്യും. 9 ന് വൈകീട്ട് 4.30 ന് കോളേജിൻ്റെ മുൻകാല പ്രതിഭകൾ പങ്കെടുക്കുന്ന പ്രദർശന മൽസരം നടക്കും. 10 ന് വൈകീട്ട് 3 മണിക്കാണ് ഫൈനൽ മത്സരം. കായിക വിഭാഗം മേധാവി ഡോ ബിൻ്റു ടി കല്യാൺ , അധ്യാപകൻ നിധിൻ എന്നിവരും പത്രസമ്മേളനത്തിൽ പങ്കെടുത്തു.

ഇരിങ്ങാലക്കുട : സെന്റ് മേരീസ് സ്കൂളിൽ വെച്ച് കേരള സംസ്ഥാന സ്കേറ്റിങ്ങ് ചാംപ്യൻഷിപ്പിന് തുടക്കമായി.തൃശൂർ ജില്ലാ പഞ്ചായത്ത് വൈസ് പ്രസിഡന്റ് ടി.കെ.സുധിഷ് ഉദ്ഘാടനം ചെയ്തു. സ്കൂൾ മാനേജർ റവ.ഡോ. ഫാ. ലാസർ കുറ്റിക്കാടൻ അധ്യക്ഷത വഹിച്ചു. സ്കൂൾ ഹെഡ് മിസ്ട്രസ് റീജ ജോസ്, ഹയർ സെക്കണ്ടറി പ്രിൻസിപ്പൽ ആൻസൻ ഡൊമിനിക് പി, കത്തീഡ്രൽ ട്രസ്റ്റി തോമസ് തൊകലത്ത്, പി.ടി.എ.പ്രസിഡന്റ് അജോ ജോൺ, ജനറൽ കൺവീനർ ടെൽസൺ കോട്ടോളി, അധ്യപകരായ ജേക്കബ് ആലപ്പാട്ട്, ഡേവിസ് ചിറയത്ത് എന്നിവർ പ്രസംഗിച്ചു. കേരളത്തിന്റെ വിവിധ ജില്ലകളിൽ നിന്നായി 250 ഓളം കുട്ടികൾ മൽസരങ്ങളിൽ പങ്കെടുത്തു.

ഇരിങ്ങാലക്കുട : സെൻ്റ്മേരീസ് ഹയർ സെക്കൻഡറി സ്കൂൾ സംസ്ഥാനതല സ്കേറ്റിംഗ് ചാമ്പ്യൻഷിപ്പിന് വേദിയാകുന്നു. ജനുവരി 31 ന് രാവിലെ ഏഴുമണിക്ക് ആരംഭിക്കുന്ന മത്സരത്തിൽ അമ്പതോളം സ്കൂളുകളിൽ നിന്നായി ഇരുനൂറോളം കുട്ടികൾ 56 കാറ്റഗറികളിലായി നടക്കുന്ന മൽസരങ്ങളിൽ പങ്കെടുക്കുമെന്ന് സ്കൂൾ മാനേജരും കത്തീഡ്രൽ വികാരിയുമായ ഫാ ലാസ്സർ കുറ്റിക്കാടൻ, പ്രധാന അധ്യാപിക റീജ ജോസ് എന്നിവർ പത്രസമ്മേളനത്തിൽ അറിയിച്ചു. ബേസിക് സ്കേറ്റ്സ് ഉള്ള കുട്ടികൾക്കും മൽസരങ്ങളിൽ പങ്കെടുക്കാൻ സാധിക്കും.കത്തീഡ്രൽ ട്രസ്റ്റി തോമസ് തൊകലത്ത്, സ്വാഗത സംഘം ചെയർമാൻ ടെൽസൺ കോട്ടോളി, അധ്യാപകരായ ജേക്കബ് ആലപ്പാട്ട്, ഡേവിസ് ചിറയത്ത്, പി.ടി.എ.പ്രസിഡന്റ് അജോ ജോൺ, സ്വാഗത സംഘം വൈസ് ചെയർമാൻ ഷാജു പാറേക്കാടൻ എന്നിവരും പങ്കെടുത്തു.

ഇരിങ്ങാലക്കുട : ഇരിങ്ങാലക്കുട അയ്യങ്കാവ് മൈതാനത്ത് ഒളിമ്പ്യൻ സ്പോർട്ടിംഗ് എഫ് സി യുടെ നേതൃത്വത്തിൽ നടന്ന പ്രഥമ ഒ ചന്ദ്രശേഖരൻ സ്മാരക ഫുട്ബോൾ ടൂർണ്ണമെൻ്റിൽ ഗോകുലം എഫ് സി കോഴിക്കോട് ജേതാക്കൾ. ഫൈനലിൻ്റെ എല്ലാ ആവേശവും നിറഞ്ഞു നിന്ന മൽസരത്തിൽ 2-1 എന്ന സ്കോറിന് കേരള പോലീസിനെ ഗോകുലം എഫ് സി പരാജയപ്പെടുത്തി. കളിയുടെ ആദ്യ മിനിറ്റിൽ തന്നെ ഗോകുലത്തിന് വേണ്ടി അക്ഷുമ കേരള പോലീസിൻ്റെ വല ചലിപ്പിച്ചു. പത്താം മിനിറ്റിൽ റിഷാദിലൂടെ ഗോകുലം ലീഡ് 2 – 0 ആക്കി ഉയർത്തി. പത്തൊൻപതാം മിനിറ്റിൽ കേരള പോലീസ് ബേബിളിലൂടെ ഒരു ഗോൾ മടക്കി .തുടർന്ന് ഇരു ടീമുകളും മികച്ച നീക്കങ്ങൾ നടത്തിയെങ്കിലും ഫലം കണ്ടില്ല.

സമാപന ചടങ്ങിൽ കേരള സ്പോർട്സ് കൗൺസിൽ പ്രസിഡണ്ടും മുൻ താരവുമായ യു ഷറഫലി മുഖ്യാതിഥി ആയിരുന്നു. മികച്ച ഗോൾ കീപ്പർ ആയി ഗോകുലത്തിൻ്റെ ബിശ്വജിത്ത്, ഡിഫൻണ്ടറായി ഗോകുലത്തിൻ്റെ അതുൽ, മിഡ് ഫീൽഡർ ആയി കേരള പോലീസിൻ്റെ ജംഷദ് , ഫോർവേർഡ് ആയി കേരള പോലീസിൻ്റെ ബേബിൾ, മികച്ച കളിക്കാരനായി ഗോകുലത്തിൻ്റെ മോസ്സസ്, മികച്ച ടീം ആയി പറപ്പൂർ എഫ് സി എന്നിവർ തിരഞ്ഞെടുക്കപ്പെട്ടു. സന്തോഷ് ട്രോഫി മുൻ കോച്ച് പീതാംബരൻ, ക്രൈസ്റ്റ് കോളേജ് മാനേജർ ഫാ ജോയ് പീണിക്കപ്പറമ്പിൽ, ഡിഎഫ് എ സെക്രട്ടറി റോയി കുര്യൻ, ഒളിംപ്യൻ എഫ് സി സെക്രട്ടറി എ വി ജോസഫ്, പ്രസിഡണ്ട് പ്രഹ്ളാദൻ എം കെ , സി പി അശോകൻ തുടങ്ങിയവർ പങ്കെടുത്തു.

ഇരിങ്ങാലക്കുട : ഇരിങ്ങാലക്കുട അയ്യങ്കാവ് മൈതാനിയിൽ നടക്കുന്ന ഒ ചന്ദ്രശേഖരൻ സ്മാരക ഫുട്ബോൾ ടൂർണ്ണമെൻ്റിൻ്റെ രണ്ടാം സെമിയിൽ ഇന്ന്  ഗോകുലം എഫ് സി യും പി എഫ് സി കേരളയും എറ്റുമുട്ടും. വൈകീട്ട് എഴിനാണ് മൽസരം . കാൽപ്പന്ത് കളിയുടെ മുഴുവൻ ലഹരിയും നിറഞ്ഞ് നിന്ന മൽസരത്തിൽ  ഗോകുലം എഫ് സി 4 -1 എന്ന് സ്കോറിന് തൃശ്ശൂരിലെ ടീമായ ന്യൂ ഫുട്ബോൾ കേരളയെ പരാജയപ്പെടുത്തിയാണ് സെമിയിലേക്കുള്ള യോഗ്യത ഉറപ്പാക്കിയത്. ജേതാക്കൾക്ക് വേണ്ടി കെവിൻ സാവിയോ, ജംഷെദ് എന്നിവർ രണ്ട് ഗോളുകൾ വീതം നേടിയപ്പോൾ ന്യൂ ഫുട്ബോളിന് വേണ്ടി പ്രപഞ്ച് ഒരു ഗോൾ നേടി. നാളെത്തെ ജേതാക്കൾ ഞായറാഴ്ച നടക്കുന്ന ഫൈനലിൽ കേരള പോലീസുമായി എറ്റുമുട്ടും.

ഇരിങ്ങാലക്കുട : ഇരിങ്ങാലക്കുട അയ്യങ്കാവ് മൈതാനിയിൽ നടക്കുന്ന ഒളിംപ്യൻ ഒ ചന്ദ്രശേഖരൻ സ്മാരക ഫുട്ബോൾ ടൂർണ്ണമെൻ്റിൽ പി എഫ് സി കേരളയ്ക്ക് ജയം. വൈകീട്ട് നടന്ന ക്വാർട്ടർ ഫൈനൽ മൽസരത്തിൽ 2-1 എന്ന സ്കോറിന് പി എഫ് സി കേരള, റിയൽ മലബാർ യുണൈറ്റഡ് എഫ് സിയെ പരാജയപ്പെടുത്തി. ആവേശകരമായ മൽസരത്തിൽ പി എഫ് സി യ്ക്ക് വേണ്ടി അർഷദ് , അഭിനവ് എന്നിവർ ഓരോ ഗോളുകളും റിയൽ മലബാറിന് വേണ്ടി ഫർഷദും ഗോൾ നേടി . ഇന്ന് വൈകീട്ട് 6.30 ന് നടക്കുന്ന ആദ്യ സെമിയിൽ കേരള പോലീസും ബ്ലാസ്റ്റേർസ് എഫ് സി യും എറ്റുമുട്ടും

ഇരിങ്ങാലക്കുട : കായിക രംഗത്ത് ഇരിങ്ങാലക്കുടയെ അടയാളപ്പെടുത്തിയ ഒളിംപ്യൻ ഒ ചന്ദ്രശേഖരൻ്റെ പേരിൽ നടത്തുന്ന സംസ്ഥാനതല ഇൻവിറ്റേഷൻ ഇൻ്റർക്ലബ് ഫുട്ബോൾ ടൂർണ്ണമെൻ്റിൽ ആദ്യ ജയം കേരള ബ്ലാസ്റ്റേഴ്സിന് . അയ്യങ്കാവ് മൈതാനിയിലെ ഫ്ളഡ്ലിറ്റ് സ്റ്റേഡിയത്തിൽ നടന്ന ആവേശകരമായ മൽസരത്തിൽ ഒന്നിന് എതിരെ രണ്ട് ഗോളുകൾക്ക് കേരള യുണൈറ്റഡ് എഫ് സി യെ ബ്ലാസ്റ്റേഴ്സ് പരാജയപ്പെടുത്തി. ബ്ലാസ്റ്റേഴ്സിന് വേണ്ടി നിഷാൻ, വൈപ്പെ എന്നിവരും യുണൈറ്റഡ് എഫ് സിക്ക് വേണ്ടി അഭിരാമും ഗോളുകൾ നേടി

നേരത്തെ നടന്ന ചടങ്ങിൽ ഉന്നത വിദ്യാഭ്യാസ വകുപ്പ് മന്ത്രി ഡോ ആർ ബിന്ദു ടൂർണ്ണമെൻ്റ് ഉദ്ഘാടനം ചെയ്തു. നഗരസഭ ചെയർമാൻ എം പി ജാക്സൻ അധ്യക്ഷത വഹിച്ചു. ജില്ലാ ഫുട്ബോൾ അസോസിയേഷൻ പ്രസിഡൻ്റ് സി സുമേഷ്, മുൻ അന്താരാഷ്ട്ര ഫുട്ബോൾ താരം ജിജു ജേക്കബ്,ഒളിംപ്യൻ ക്ലബ് പ്രസിഡൻ്റ് എം കെ പ്രഹ്ളാദൻ , സെക്രട്ടറി എ വി ജോസഫ് തുടങ്ങിയവർ സംസാരിച്ചു. നാളെ വൈകീട്ട് 6. 30 ന് നടക്കുന്ന മൽസരത്തിൽ കേരള പോലീസും കൊച്ചിൻ ലോർഡ്സ് എഫ്എ യും എറ്റുമുട്ടും.

ഇരിങ്ങാലക്കുട : തൊഴിലുറപ്പ് പദ്ധതിയിൽ ഉൾപ്പെടുത്തി പടിയൂർ പഞ്ചായത്തിലെ എഴാം വാർഡിൽ നിർമ്മിച്ച വോളിബോൾ കോർട്ടിനെ ഉദ്ഘാടന ചടങ്ങിനെ ചൊല്ലി വിവാദം. എഴാം വാർഡിൽ 2022- 23 വർഷത്തെ പദ്ധതിയിൽ ഉൾപ്പെടുത്തി മനപ്പറമ്പ് ഉന്നതിയിൽ കാട് പിടിച്ച് കിടന്നിരുന്ന 20 സെൻ്റ് സ്ഥലമാണ് മണ്ണടിച്ചും മതിൽ കെട്ടിയും നെറ്റും ലൈറ്റ് അടക്കമുള്ള സംവിധാനങ്ങളുമായി നാല് ലക്ഷത്തോളം രൂപ ചിലവഴിച്ച് നിർമ്മിച്ചിരിക്കുന്നത്. തൊഴിലുറപ്പ് പദ്ധതി പ്രകാരം കേരളത്തിൽ നിർമ്മിച്ച ആദ്യത്തെ വോളിബോൾ കോർട്ടിൻ്റെ ഉദ്ഘാടനം ഒക്ടോബർ 10 ന് 4 മണിക്ക് കേന്ദ്ര മന്ത്രി സുരേഷ് ഗോപി നിർവഹിക്കുമെന്ന അറിയിപ്പ് വാർഡ് മെമ്പർ പ്രഭാത് വെള്ളാപ്പള്ളി നൽകിയതോടെയാണ് വിവാദമായത്. പഞ്ചായത്ത് ഭരണസമിതി ഇക്കാര്യം അറിഞ്ഞിട്ടില്ലെന്നും ഉദ്ഘാടന വിവരം ഭരണസമിതി ചർച്ച ചെയ്ത് തീരുമാനിച്ചിട്ടില്ലെന്നും ഉദ്ഘാടന ചടങ്ങിൽ പങ്കെടുക്കില്ലെന്നും പഞ്ചായത്ത് പ്രസിഡൻ്റ് ലിജി രതീഷ് അറിയിച്ചു. എന്നാൽ കഴിഞ്ഞ ദിവസം നടന്ന ഭരണസമിതി യോഗത്തിൽ വച്ച് പഞ്ചായത്ത് പ്രസിഡണ്ടിനെ ഇക്കാര്യം ധരിപ്പിച്ചിരുന്നുവെന്നും പ്രസിഡൻ്റ് പറഞ്ഞതനുസരിച്ചാണ് ഉദ്ഘാടന ചടങ്ങിൻ്റെ കാര്യങ്ങൾ തീരുമാനിച്ചതെന്നും നാളെ കൃത്യ സമയത്ത് തന്നെ ചടങ്ങ് നടക്കുമെന്നും വാർഡ് മെമ്പറും വ്യക്തമാക്കി. വിവാദങ്ങൾക്കിടയിൽ നാളെ രാവിലെ 10. 30 ന് ഭരണസമിതി യോഗം ചേരുന്നുണ്ട്