ഇരിങ്ങാലക്കുട :കേരളത്തെ ഇരുട്ടിലാഴ്ത്തിയ യുഡിഎഫ് സർക്കാരിൻ്റെ ജനവിരുദ്ധ വൈദ്യുതി നയത്തിനെതിരെ സിപിഐ സംസ്ഥാന കൗൺസിൽ ആഹ്വാനപ്രകാരം സംസ്ഥാനത്തെ മുഴുവൻ വൈദ്യുതി ഓഫീസുകളിലേക്കും മാർച്ചുമായി സിപിഐ പ്രവർത്തകർ. ഇരിങ്ങാലക്കുട മണ്ഡലം കമ്മിറ്റിയുടെ നേതൃത്വത്തിൽ വൈദ്യുതി ഭവന് മുന്നിലേക്ക് നടന്ന മാർച്ച് സിപിഐ ജില്ലാ എക്സിക്യൂട്ടീവ് അംഗം പി മണി ഉദ്ഘാടനം ചെയ്തു. മണ്ഡലം സെക്രട്ടറി എൻ കെ.ഉദയപ്രകാശ് അദ്ധ്യക്ഷത വഹിച്ചു കെ എസ് പ്രസാദ്,എം ബി.ലത്തീഫ്,അൽഫോൻസാ തോമസ്,പി ആർ.സുന്ദരൻ,ടി സി.അർജ്ജുനൻ,ജോജോ തട്ടിൽ,മുരളി മണക്കാട്ട്പടി,എം.സുധീർദാസ്,സി.സുരേഷ് എന്നിവർ സംസാരിച്ചു.

ഇരിങ്ങാലക്കുട : 2022 ഡിസംബറിൽ തദ്ദേശ വകുപ്പ് മന്ത്രി ഉദ്ഘാടനം ചെയ്യുകയും പിന്നീട് ദീർഘകാലം ഏറ്റെടുക്കാൻ ആരുമില്ലാതെ അടച്ചിടുകയും തുടർന്ന് നഗരസഭയിലെ താത്കാലിക ജീവനക്കാരൻ്റെ ബന്ധു അഞ്ച് മാസത്തോളം തട്ടുകട ശൈലിയിൽ നടത്തി പൂട്ടിടുകയും ഒടുവിൽ കണ്ടിജൻ്റ് ജീവനക്കാരനെ വച്ച് ടോയ്ലറ്റ് സേവനങ്ങൾ മാത്രമായി നഗരസഭ നേരിട്ട് നടത്തിയ ” ടേക്ക് എ ബ്രേക്ക് ” പദ്ധതിക്ക് വീണ്ടും ബ്രേക്ക്. ദേശീയ സംസ്ഥാന പാതയോരങ്ങളിലൂടെ കുടുംബസമേതം യാത്ര ചെയ്യുന്നവർക്ക് സുരക്ഷിതവും ഉന്നത നിലവാരമുള്ളതുമായ ശുചി മുറികൾ ലഭ്യമാക്കുക എന്ന സംസ്ഥാന സർക്കാരിൻ്റെ തന്നെ കാഴ്ചപ്പാടിൻ്റെ ഭാഗമായിട്ടാണ് ഇരുപത് ലക്ഷത്തോളം രൂപ ചിലവഴിച്ച് എഴ് ടോയ്ലറ്റുകളും ബാത്ത്റൂമും വിശ്രമമുറിയുമടങ്ങുന്ന കെട്ടിടം ഠാണാവിൽ പൂതംക്കുളത്തിന് സമീപത്തായി നിർമ്മിച്ചത്. കോഫി ഷോപ്പും റിഫ്രഷ്മെൻ്റ് സൗകര്യങ്ങളും പദ്ധതിയുടെ ഭാഗമായി ലക്ഷ്യമിട്ടിരുന്നു. ശുചീകരണ സംവിധാനങ്ങൾക്കായി ടാങ്കുകൾ സ്ഥാപിക്കാൻ 2023-24 വർഷത്തിൽ നാല് ലക്ഷം രൂപ കൂടി നഗരസഭ ചിലവഴിച്ചു. 2024 ൽ നഗരസഭയിലെ താത്കാലിക ജീവനക്കാരൻ്റെ ബന്ധു 4.5 ലക്ഷം രൂപ വാടകയ്ക്ക് എറ്റെടുത്ത് പ്രവർത്തനം ആരംഭിച്ചെങ്കിലും അഞ്ച് മാസം മാത്രമാണ് ബ്രേക്ക് ഇല്ലാതെ പ്രവർത്തിച്ചത്. വിമർശനങ്ങൾ ഉയർന്നതിനെ തുടർന്നാണ് 4000 രൂപ പ്രതിമാസ വാടകയ്ക്ക് കുടുംബശ്രീ സിഡിഎസിനെ നടത്തിപ്പ് എല്പിക്കാൻ നഗരസഭ കൗൺസിൽ തീരുമാനിച്ചത്. എന്നാൽ ചായയും ചെറുകടികളും മിഠായിയും മാത്രമേ വില്ക്കാൻ പാടുള്ളൂവെന്നും കെട്ടിടത്തിൻ്റെ അറ്റകുറ്റപ്പണികൾ സിഡിഎസ് തന്നെ ചെയ്യണമെന്നും വീട്ടിൽ നിന്ന് പോലും ഭക്ഷണം ഉണ്ടാക്കി കൊണ്ട് വന്ന് നൽകാൻ കഴിയില്ലെന്നുമുള്ള നിബന്ധനകൾ അംഗീകരിക്കാൻ കഴിയില്ലെന്നും ലാഭകരമായി നടത്താൻ കഴിയില്ലെന്നും കുടുംബശ്രീ സിഡിഎസും അറിയിച്ചതോടെ കണ്ടിജൻ്റ് ജീവനക്കാരനെ വച്ച് ടോയ്‌ലറ്റ് സൗകര്യങ്ങൾ മാത്രമായി പദ്ധതി നഗരസഭ നേരിട്ട് ഉന്തി തള്ളുകയായിരുന്നു. പദ്ധതിയുടെ നടത്തിപ്പ് പൊറത്തിശ്ശേരി സ്വദേശി ലേലത്തിലൂടെ 25000 രൂപ അഡ്വാൻസും 10500 രൂപ പ്രതിമാസ വാടകയും എന്ന വ്യവസ്ഥകളിൽ ഏറ്റെടുത്തതോടെയാണ് അറ്റകുറ്റപ്പണികൾക്കായി നാല് വർഷം മുമ്പ് മാത്രം ഉദ്ഘാടനം ചെയ്ത കെട്ടിടം അടച്ചിട്ടിരിക്കുന്നത്.

ഇരിങ്ങാലക്കുട: സംസ്ഥാന അധ്യാപക അവാര്‍ഡ് നേടിയ ഇരിങ്ങാലക്കുട സ്വദേശിയും തലോർ സെൻ്റ് തെരസിറ്റാസ് സ്‌കൂൾ അധ്യാപകനുമായ ജെനില്‍ ജോണിന് മാതൃവിദ്യാലയമായ സെന്റ് മേരീസ് ഹൈസ്‌കൂളില്‍ സ്വീകരണം നല്‍കി. സ്‌കൂള്‍ മാനേജര്‍ ഫാ ലാസര്‍ കുറ്റിക്കാടന്‍ സ്വീകരണ സമ്മേളനം ഉദ്ഘാടനം ചെയ്തു. പിടിഎ പ്രസിഡന്റ് ബൈജു കൂവപ്പറമ്പില്‍ അധ്യക്ഷത വഹിച്ചു. ഫാ ലാസര്‍ കുറ്റിക്കാടന്‍ ജെനില്‍ ജോണിന് ഉപഹാരം സമ്മാനിച്ചു. കത്തീഡ്രല്‍ ട്രസ്റ്റി ഷോബി പോള്‍ പൊന്നാട അണിയിച്ച് ആദരിച്ചു. പ്രധാന അധ്യാപിക റീജ ജോസ്,മുന്‍ കായിക അധ്യാപിക കെ.വി. ഇന്ദിരാമണി, ഫസ്റ്റ് അസിസ്റ്റന്റ് കെ.പി. ലിറ്റ, അധ്യാപക പ്രതിനിധി സി.എസ്. നാന്‍സി തുടങ്ങിയവർ സംസാരിച്ചു.

ഇരിങ്ങാലക്കുട : ഇരിങ്ങാലക്കുടയിലേക്ക് വീണ്ടും സംസ്ഥാന അധ്യാപക അവാർഡ്. ഇരിങ്ങാലക്കുട മടത്തിക്കര സ്വദേശി യും ക്രൈസ്റ്റ് കോളേജ് റിട്ട സൂപ്രണ്ട് ജോണിൻ്റെ മകനുമായ മടത്തിക്കര കിഴക്കേ വീട്ടിൽ ജെനിൽ ജോണിനെ തേടിയാണ് സംസ്ഥാനതലത്തിലുള്ള അംഗീകാരം എത്തിയിരിക്കുന്നത്. വിദ്യാഭ്യാസ, ആരോഗ്യ ,കായിക മേഖലകളിൽ നടത്തിയ ഇടപെടലുകളാണ് തലോർ സെൻ്റ് തെരസിറ്റാസ് യുപി സ്‌കൂളിലെ കായികവിഭാഗം അധ്യാപകനായ ജെനിൽ ജോണിന് പുരസ്‌കാരം നേടികൊടുത്തിരിക്കുന്നത്. വിദ്യാർഥികളിൽ ജലപാനശീലം വളർത്തുകയെന്ന ലക്ഷ്യത്തോടെ 2016 ൽ ജെനിൽ ആവിഷ്ക്കരിച്ച വാട്ടർബെൽ പദ്ധതി ദേശീയതലത്തിൽ ശ്രദ്ധ നേടി. ഉപജില്ല കായിക മേളയിൽ തലോർ സ്‌കൂളിനെ കഴിഞ്ഞ 14 വർഷങ്ങളിലും ജേതാക്കൾ ആക്കുന്നതിൽ നിർണ്ണായക പങ്ക് വഹിച്ചു. കോവിഡ് ഘട്ടത്തിൽ ഓൺലൈൻ പഠനം സംബന്ധിച്ച സംസ്ഥാനതല കമ്മിറ്റിയിൽ അംഗമായിരുന്നു. ഇന്ത്യൻ ഹാൻഡ് ബോൾ ടീം അംഗമായി നാല് അന്താരാഷ്ട്ര മൽസരങ്ങളിൽ കളിച്ചിട്ടുള്ള ജെനിൽ ജോൺ ഡൽഹിയിൽ നടന്ന അന്താരാഷ്ട്ര നാടകോൽസവത്തിൽ പങ്കെടുത്തിട്ടുണ്ട്. കേശദാനത്തിൻ്റെ പ്രാധാന്യം എടുത്ത് പറയുന്ന ” മൊട്ടത്തലച്ചി ” ഉൾപ്പെടെ 25 ഓളം ഷോർട്ട് ഫിലിമുകൾ നിർമ്മിച്ചിട്ടുണ്ട്. സ്പോർട്സ് സൈക്കോളജിയുമായി ബന്ധപ്പെട്ട് അന്താരാഷ്ട്ര കനേഡിയൻ ജേണലിൽ ലേഖനം പ്രസിദ്ധീകരിച്ചിട്ടുണ്ട്. 2010 ൽ ചേലക്കര പങ്ങാരപ്പിള്ളി സെൻ്റ് ജോസഫ് യു പി സ്‌കൂളിൽ നിന്നാണ് അധ്യാപക ജീവിതം ആരംഭിച്ചത്. നേരത്തെ ക്രൈസ്റ്റ് കോളേജിലും മാള ബിഎഡ് കോളേജിലും ഗസ്റ്റ് അധ്യാപകനായി പ്രവർത്തിച്ചിട്ടുണ്ട്. ഫിസിക്കൽ എഡ്യൂക്കേഷനിൽ എം ജി സർവകലാശാലയിൽ നിന്നും എം ഫിൽ ബിരുദം നേടിയിട്ടുള്ള ജെനിൽ ജോൺ സ്പോർട്സ് സൈക്കോളജിയിൽ നടത്തുന്ന ഗവേഷണത്തിൻ്റെ അവസാനഘട്ടത്തിലാണ്. എസ്ബിഐ ഉദ്യോഗസ്ഥയായ സോണിയയാണ് ഭാര്യ. ജോവന്ന , ഡൊമിനിക് എന്നിവർ മക്കളാണ്. സംസ്ഥാനതലത്തിലുള്ള അംഗീകാരം നേടിയ അധ്യാപകനെ അഡ്വ തോമസ് ഉണ്ണിയാടൻ എംഎൽഎ, വാർഡ് കൗൺസിലർ എം എസ് ദാസൻ തുടങ്ങിയവർ വീട്ടിലെത്തി അഭിനന്ദിച്ചു.

ഇരിങ്ങാലക്കുട: ഇരിങ്ങാലക്കുട ഡോൺ ബോസ്കോ സെൻട്രൽ സ്‌കൂളിൽ നടന്ന ദേശീയ ടേബിൾ ടെന്നീസ് ചാമ്പ്യൻഷിപ്പിൽ 31 പോയിൻ്റ് നേടി തമിഴ്നാട്, പുതുച്ചേരി ആൻ്റ് ആൻഡമാൻ നിക്കോബാർ ഐലൻ്റ് റീജിയൺ ജേതാക്കളായി. രാജ്യത്തെ 16 റീജിയണുകളിൽ നിന്നായി 250-ഓളം കായികതാരങ്ങൾ പങ്കെടുത്ത ചാമ്പ്യൻഷിപ്പിന്റെ സമാപനച്ചടങ്ങിൽ ആർ ഡി ഒ ഷിബു പോൾ മുഖ്യാതിഥിയായി.

അണ്ടർ 14 വിഭാഗത്തിൽ മഹാരാഷ്ട്രയും അണ്ടർ 17 വിഭാഗത്തിൽ ഉത്തർപ്രദേശും അണ്ടർ 19 വിഭാഗത്തിൽ വെസ്റ്റ് ബംഗാളും ഒന്നാം സ്ഥാനം കരസ്ഥമാക്കി.

അണ്ടർ 14,അണ്ടർ 17,അണ്ടർ 19 വിഭാഗങ്ങളിൽ തമിഴ്നാട്, പുതുച്ചേരി & ആൻഡമാൻ നിക്കോബാർ ഐലന്റ് രണ്ടാം സ്ഥാനത്ത് എത്തിയപ്പോൾ അണ്ടർ 14, അണ്ടർ 17 വിഭാഗങ്ങളിൽ കർണാടക & ഗോവയും അണ്ടർ 19 വിഭാഗത്തിൽ ആന്ധ്രപ്രദേശും യഥാക്രമം മൂന്നാം സ്ഥാനം കരസ്ഥമാക്കി. അണ്ടർ 14 വ്യക്തിഗത വിഭാഗത്തിൽ മഹാരാഷ്ട്രയുടെ ധന്യശ്രീ ദത്താത്രേ താർഡേയും അണ്ടർ 17, അണ്ടർ 19 വിഭാഗങ്ങളിൽ തമിഴ്നാട്, പുതുച്ചേരി & ആൻഡമാൻ നിക്കോബാർ ഐലന്റ് റീജിയന്റെ ഇനിയയും , ഡോണിയയും വ്യക്തിഗത ചാമ്പ്യന്മാരായി. റെക്ടർ ഫാ ഇമ്മാനുവേൽ വട്ടക്കുന്നേൽ, ഫാ. ഷിനോ കളപ്പുരയ്ക്കൽ , ഫാ. ജിതിൻ മൈക്കിൾ ,ഫാ. ഷിബു ഡേവിസ്, ഫാ. സെബാസ്റ്റ്യൻ ഒറ്റപ്ലാക്കൽ, ശാരിക ശിവപ്രസാദ് , തോമസ് എം.ടി, ബിന്ദു ബാബു, സോമു ബാനർജി ,ജിതിൻ രാജ് എന്നിവർ പങ്കെടുത്തു.

ഇരിങ്ങാലക്കുട : നീതിക്ക് വേണ്ടിയുള്ള സമരം ഇരിങ്ങാലക്കുട നഗരസഭ ചെയർമാൻ്റെ വസതിയുടെ മുമ്പിലേക്കും വ്യാപിപ്പിച്ച് ടൗൺ ബാങ്ക് നിക്ഷേപകർ. ബാങ്കിന് മുന്നിൽ നടത്തിയ പട്ടിണി സമരത്തിൽ പങ്കെടുക്കാൻ എത്തിയ സ്ത്രീകൾ അടക്കം ഒരു വിഭാഗമാണ് ബാങ്ക് ഭരണസമിതി ചെയർമാൻ കൂടിയായിരുന്ന എം പി ജാക്സൻ്റെ മെയിൻ റോഡിലുള്ള വസതിയുടെ മുമ്പിൽ പ്രതിഷേധവുമായി ഒത്തുചേർന്നത്.

ബാങ്കിന് മുന്നിലെ സമരക്കാർക്ക് അഭിവാദ്യം അർപ്പിച്ച് എൽഡിഎഫ് പാർലമെൻ്ററി പാർട്ടി ലീഡർ പി വി ശിവകകുമാർ, ബിജെപി ജില്ലാ ജനറൽ സെക്രട്ടറി ക്യപേഷ് ചെമ്മണ്ടയുടെ നേതൃത്വത്തിലുള്ള സംഘം എന്നിവരും എത്തി. മൂന്ന് തവണ കേന്ദ്രമന്ത്രിയും എം പി യുമായ സുരേഷ് ഗോപിയുമായി വിഷയത്തിൽ ചർച്ച പൂർത്തിയാക്കിയതായും നിക്ഷേപകരുടെ പരാതികളുടെ അടിസ്ഥാനത്തിൽ വിവിധ പോലീസ് സ്റ്റേഷനുകളിൽ എഫ്ഐആർ ഇടുന്നതോടെ ഇ ഡി യുടെ അന്വേഷണത്തിനുളള നടപടി സ്വീകരിക്കാമെന്ന് കേന്ദ്രമന്ത്രി അറിയിച്ചതായും സമരസമിതി നേതാക്കൾ വെളിപ്പെടുത്തി. നിക്ഷേപങ്ങൾ സമാഹരിച്ച ഭരണ സമിതി അംഗങ്ങൾ, ജീവനക്കാർ എന്നിവരുടെ പേരിൽ ഉടൻ പരാതികൾ നൽകി തുടങ്ങുമെന്നും ഇവർ അറിയിച്ചു.

ഇരിങ്ങാലക്കുട : ഇരിങ്ങാലക്കുട ടൗൺ ബാങ്ക് നിക്ഷേപകരുടെ പട്ടിണി സമരം തുടങ്ങി. നിക്ഷേപകരുടെ പണം തിരിച്ച് ലഭിക്കാൻ കേന്ദ്ര-സംസ്ഥാന സർക്കാരുകളും ഇരിങ്ങാലക്കുട നഗരസഭയും ജനങ്ങളോടൊപ്പം അണിനിരക്കണമെന്നും ബാങ്കിലെ സാമ്പത്തിക ക്രമക്കേടുകൾ ഇഡി അന്വേഷിക്കണമെന്നും ജീവനക്കാരുടെ ശമ്പളം വെട്ടികുറയ്ക്കണമെന്നും ലോണുകൾ തിരിച്ച് പിടിക്കണമെന്നും ആവശ്യപ്പെട്ടാണ് തിരുവോണ നാളിൽ ബാങ്കിന് മുന്നിൽ പട്ടിണി സമരം ആരംഭിച്ചിരിക്കുന്നത്.പ്രതിഷേധസ്വരങ്ങൾ ഒഴിവാക്കാൻ പിരിച്ച് ഒരു വിഭാഗം ജീവനക്കാരുടെ നേതൃത്വത്തിൽ ബാങ്കിന് മുന്നിൽ താത്കാലിക മതിൽ നിർമ്മിച്ചതോടെ മതിലിന് മുന്നിൽ റോഡിനോട് ചേർന്നാണ് കുടകളുമേന്തി നിന്ന് കൊണ്ട് സമരം ആരംഭിച്ചിരിക്കുന്നത്. ഐടിയു ബാങ്ക് നിക്ഷേപക കൂട്ടായ്മയുടെ നേതൃത്വത്തിലാണ് സമരം നടക്കുന്നത്. താത്കാലിക മതിൽ നിർമ്മിച്ചത് ജീവനക്കാരുടെ ധാർഷ്ട്യത്തിൻ്റെ പ്രകടനമാണെന്ന് സമര സമിതി നേതാക്കൾ വിമർശിച്ചു.

ഇരിങ്ങാലക്കുട : സർക്കാരിൻ്റെ പ്രിയദർശിനി സൗജന്യ പദ്ധതിയിൽ നിന്നും സർക്കാർ ജീവനക്കാരെയും സ്വകാര്യ സ്ഥാപനങ്ങളിലെ അനർഹരെയും ഒഴിവാക്കണമെന്ന് തൃശ്ശൂർ ജില്ല പ്രൈവറ്റ് ബസ് ഓപ്പറേറ്റേഴ്സ് അസോസിയേഷൻ ഇരിങ്ങാലക്കുട യൂണിറ്റ് വാർഷിക പൊതുയോഗം ആവശ്യപ്പെട്ടു. പ്രിയ ഹാളിൽ നടന്ന യോഗം ജില്ലാ പ്രസിഡണ്ട് എം എസ് പ്രേംകുമാർ ഉദ്ഘാടനം ചെയ്തു. യൂണിറ്റ് പ്രസിഡണ്ട് കെ ജെ ജോൺസ് അധ്യക്ഷത വഹിച്ചു. ജില്ലാ ജനറൽ സെക്രട്ടറി കെ കെ സേതുമാധവൻ, ജില്ലാ ട്രഷറർ രാധാകൃഷ്ണൻ, യൂണിറ്റ് സെക്രട്ടറി വി വി അനിൽകുമാർ , ട്രഷറർ കെ നന്ദകുമാർ എന്നിവർ സംസാരിച്ചു.

ഇരിങ്ങാലക്കുട : ലെജന്റ്‌സ് ഓഫ് ഇരിങ്ങാലക്കുടയുടെ ആഭിമുഖ്യത്തില്‍ ഇരിങ്ങാലക്കുടയില്‍ തിരുവോണ പിറ്റേന്ന് എട്ടാമത് പുലിക്കളി ആഘോഷം നടക്കും . 27ന് ഉച്ചതിരിഞ്ഞ് രണ്ടരമണിക്ക് ടൗണ്‍ഹാള്‍ പരിസരത്ത് നിന്നും ആരംഭിക്കുന്ന പുലിക്കളി ഘോഷയാത്ര അഡ്വ. തോമസ് ഉണ്ണിയാടന്‍ എം.എല്‍.എ, നഗരസഭ ചെയര്‍മാന്‍ എം.പി ജാക്‌സന്‍, എയ്മർ ഹോസ്പിറ്റൽ മാനേജിംഗ് ഡയറക്ടർ അബിത് അക്ബർ, ജൂനിയര്‍ ഇന്നസെന്റ് എന്നിവര്‍ ചേര്‍ന്ന് ഫ്‌ളാഗ് ഓഫ് ചെയ്യും. പുലികളും പുലിമേളവും ശിങ്കാരിമേളവും കാവടികളും തംബോലവും വീരനാട്യവും അടക്കം 250 ല്‍പരം കലാകാരന്മാര്‍ അണി നിരക്കുന്ന വര്‍ണ്ണാഭമായ പുലിക്കളി ആഘോഷ ഘോഷയാത്ര വൈകിട്ട് 6.30ഓടെ നഗരസഭ മൈതാനത്ത് എത്തിച്ചേരും. പുലിക്കളി ആഘോഷ സമാപന സമ്മേളനം സ്‌പോര്‍ട്‌സ്, യൂത്ത് വെല്‍ഫെയര്‍, രജിസ്‌ട്രേഷന്‍ വകുപ്പ് മന്ത്രി ഒ.ജെ ജെനീഷ് ഉദ്ഘാടനം ചെയ്യും. പത്രസമ്മേളനത്തില്‍ ലെജന്റ്‌സ് ഓഫ് ഇരിങ്ങാലക്കുട പ്രസിഡണ്ട് ലിയോ താണിശ്ശേരിക്കാരന്‍, സെക്രട്ടറി ലൈജു വര്‍ഗ്ഗീസ്, ജനറല്‍ കണ്‍വീനര്‍ ഷാജന്‍ ചക്കാലക്കല്‍, കണ്‍വീനര്‍ സൈഗണ്‍ തയ്യില്‍ ഭാരവാഹികളായ ബിബിന്‍ രവി, മയൂഫ് കെ.എച്ച്, സെന്റില്‍ എം.വി, നിധീഷ് കാട്ടില്‍ എന്നിവര്‍ പത്രസമ്മേളനത്തില്‍ പങ്കെടുത്തു.

ഇരിങ്ങാലക്കുട: ഇരിങ്ങാലക്കുട ഡോൺ ബോസ്കോ സ്കൂളിൽ നടന്ന ദേശീയ ടേബിൾ ടെന്നീസ് ബോയ്‌സ് വിഭാഗത്തിൽ ചാമ്പ്യൻഷിപ്പിൽ കർണാടക – ഗോവ റീജിയൺ ജേതാക്കളായി. സമാപനച്ചടങ്ങിൽ അഡ്വ. തോമസ് ഉണ്ണിയാടൻ എംഎൽഎ മുഖ്യാതിഥി ആയിരുന്നു. അണ്ടർ 14 വിഭാഗത്തിൽ മഹാരാഷ്ട്രയും അണ്ടർ 17 വിഭാഗത്തിൽ കർണാടക & ഗോവയും അണ്ടർ 19 വിഭാഗത്തിൽ നോർത്ത് ഈസ്റ്റും ഒന്നാം സ്ഥാനം കരസ്ഥമാക്കി.ഫാ. ഷിനോ കളപ്പുരയ്ക്കൽ ഫാ. ജിതിൻ മൈക്കിൾ, ഫാ. ഷിബു ഡേവിസ് , ഫാ. സെബാസ്റ്റ്യൻ ഒറ്റപ്ലാക്കൽ , ശാരിക ശിവപ്രസാദ് ,ബിന്ദു ബാബു, സോമു ബാനർജി തുടങ്ങിയവർ പങ്കെടുത്തു. പെൺകുട്ടികളുടെ വിഭാഗം ദേശീയതല ടേബിൾ ടെന്നീസ് ചാമ്പ്യൻഷിപ്പിന്റെ ഉദ്ഘാടനം ആഗസ്റ്റ് 29-ന് രാവിലെ 11 മണിക്ക് കേരള സർക്കാർ പട്ടികജാതി-പട്ടികവർഗ ക്ഷേമ വകുപ്പ് മന്ത്രി കെ. എ. തുളസി നിർവഹിക്കും.