ഇരിങ്ങാലക്കുട : ക്രൈസ്റ്റ് കോളേജിലെ സാമൂഹിക സേവന സംഘടനയായ തവനിഷിൻ്റെ നേതൃത്വത്തിൽ ” തണൽ ” പദ്ധതിയുടെ ഭാഗമായി ജി ടി എസ് രണ്ടു കൈ സ്‌കൂളിലെ വിദ്യാർഥികൾക്ക് പഠനോപകരണങ്ങൾ ചെയ്തു.

ചടങ്ങിൽ ജി ടി എസ് രണ്ടുകൈ സ്കൂൾ സീനിയർ അധ്യാപിക ജോഫിയ ടീച്ചർ സ്വാഗതവും സുമി ടീച്ചർ നന്ദിയും പറഞ്ഞു.സീനിയർ അധ്യാപിക ജോഫിയ, പി ടി എ പ്രസിഡന്റ്‌ ഹണി റിൻസൺ എന്നിവർ തവനിഷ് സ്റ്റാഫ്‌ കോർഡിനേറ്റർ ഡോക്ടർ മുവിഷ് മുരളിയിൽ നിന്ന് പഠനോപകരങ്ങൾ ഏറ്റുവാങ്ങി. അധ്യാപിക ജിഷ ടീച്ചർ , പി ടി എ പ്രതിനിധി സ്വപ്ന രമേഷ് ,തവനിഷ് പ്രസിഡന്റ്‌ നിമിഷ കെ കെ, സെക്രട്ടറി അഭിഷേക് ടി എം, ജോയിന്റ് സെക്രട്ടറിമാരായ ജിസ്മരിയ ജോമി, അശ്വന്ത് ബാബു,തവനിഷ് ട്രഷറർ ഐശ്വര്യ പ്രവീൺ ജോയിന്റ് ട്രഷറർ ശ്വേത ഐ എ എന്നിവരും മറ്റു തവനിഷ് പ്രവർത്തകരും പങ്കെടുത്തു

ഇരിങ്ങാലക്കുട: ആർട്ടിഫിഷ്യൽ ഇന്റലിജൻസ് സാങ്കേതികവിദ്യയുടെ സഹായത്തോടെ കാലാവസ്ഥാ വ്യതിയാനങ്ങൾ മുൻകൂട്ടി തിരിച്ചറിയാനും പരിസ്ഥിതി മാറ്റങ്ങൾ കൃത്യമായി നിരീക്ഷിക്കാനും കഴിയുന്ന ഇലക്ട്രോണിക് എൻവയോൺമെന്റൽ മോണിറ്ററിംഗ് ഉപകരണത്തിൻ്റെ മാതൃക വികസിപ്പിച്ചതിന് ക്രൈസ്റ്റ് ഓട്ടോണോമസ് കോളേജിലെ ഗവേഷകർക്ക് അന്താരാഷ്ട്ര പേറ്റന്റ് ലഭിച്ചു.

പെട്ടെന്നുണ്ടാകുന്ന കാലാവസ്ഥാ വ്യതിയാനങ്ങൾ, അന്തരീക്ഷത്തിലെ മലിനീകരണ നില, താപനില വ്യതിയാനങ്ങൾ, ഈർപ്പം തുടങ്ങിയ പരിസ്ഥിതി ഘടകങ്ങൾ കൃത്യമായി നിരീക്ഷിച്ച് മുൻകരുതൽ നടപടികൾ സ്വീകരിക്കാൻ ഈ ഉപകരണം സഹായകരമാകുമെന്ന് ഗവേഷകർ അറിയിച്ചു. ആർട്ടിഫിഷ്യൽ ഇന്റലിജൻസ് അധിഷ്ഠിത വിവര വിശകലന സംവിധാനമാണ് ഉപകരണത്തിന്റെ പ്രത്യേകത. ഇതിലൂടെ ലഭിക്കുന്ന വിവരങ്ങൾ ഭാവിയിലെ പരിസ്ഥിതി വെല്ലുവിളികളെ മുൻകൂട്ടി മനസ്സിലാക്കുന്നതിനും ദുരന്തനിവാരണ പ്രവർത്തനങ്ങൾ കൂടുതൽ കാര്യക്ഷമമാക്കുന്നതിനും സഹായകരമാകും.

ഡോ. ജിൻസ് മോൻ സിറിയക് (സെന്റ് ജോസഫ് കോളേജ്, ദേവഗിരി, കോഴിക്കോട്), ഡോ. ടോം ചെറിയാൻ, ഡോ. സുബിൻ കെ ജോസ്, ഫാ. സിബി ഫ്രാൻസിസ്, ഫാ. ഡോ. വിൻസെന്റ് എൻ. എസ്., ഫാ. ഡോ. ജോളി ആൻഡ്രൂസ് എന്നിവർ ചേർന്നാണ് ഈ നൂതന സാങ്കേതികവിദ്യ വികസിപ്പിച്ചെടുത്തത്.

ക്രൈസ്റ്റ് കോളേജിൽ പ്രവർത്തിക്കുന്ന ക്രൈസ്റ്റ് ഇന്നോവേഷൻ പാർക്ക് , അക്വാ റിസർച്ച് ലാബ് എന്നിവയുടെ നേതൃത്വത്തിലാണ് ഗവേഷണവും ഉപകരണ വികസനവും നടന്നത്.

ഇരിങ്ങാലക്കുട : മണപ്പുറം ഫൗണ്ടേഷൻ്റെ കീഴിൽ പ്രവർത്തിക്കുന്ന മുകുന്ദപുരം പബ്ലിക് സ്കൂളിൽ മദ്രാസ് ഐഐടി യുടെ ഔട്ട്റീച്ച് പദ്ധതിയുമായി സഹകരിച്ച് സർട്ടിഫിക്കറ്റ് കോഴ്സ് ആരംഭിക്കുന്നു. പത്ത് മുതൽ പന്ത്രണ്ട് ക്ലാസ് വരെുള്ള കുട്ടികൾക്ക് ഡാറ്റാ സയൻസ്, എയ്റോസ്പേസ്, ഇലക്ട്രോണിക്സ്, ബയോടെക്നോളജി, ഇക്കണോമിക്സ്, ലോ, മോളികുളാർ എഞ്ചിനീയറിംഗ് തുടങ്ങിയ ആധുനിക വിദ്യാഭ്യാസ മേഖലകളിൽ പ്രാഥമിക പരിചയം നൽകാനാണ് ലക്ഷ്യമിടുന്നതെന്ന് മണപ്പുറം ഫൗണ്ടേഷൻ സിഇഒ ജോർജ്ജ് ഡി ദാസ്, സ്കൂൾ പ്രിൻസിപ്പൽ ജിജി കൃഷ്ണ എന്നിവർ പത്രസമ്മേളനത്തിൽ അറിയിച്ചു. എട്ട് ആഴ്ചകളിലായി നൽകുന്ന കോഴ്സ് എപ്രിൽ ആദ്യവാരം ആരംഭിക്കും. രജിസ്ട്രേഷൻ ഫീസ് ആയ 500 രൂപ മാത്രമാണ് വിദ്യാർഥികളിൽ നിന്നും കോഴ്സ് ഫീ ആയി ഈടാക്കുകയെന്നും സ്കൂൾ അധികൃതർ അറിയിച്ചു.

ഇരിങ്ങാലക്കുട : ഫാ. ഡോ. ജോസ് തെക്കൻ ഓൾ ഇന്ത്യ ബെസ്റ്റ് ടീച്ചർ അവാർഡ് കൂത്തുപറമ്പ് നിർമ്മലഗിരി കോളേജിലെ രസതന്ത്ര വിഭാഗം മേധാവിയും ഗവേഷകനുമായ ഡോ. നൈജിൽ തോമസിന് സമ്മാനിച്ചു.

ഇരിങ്ങാലക്കുട ക്രൈസ്റ്റ് കോളേജ് മുൻ പ്രിൻസിപ്പൽ ആയിരുന്ന ഫാ. ഡോ. ജോസ് തെക്കൻ്റെ സ്മരണാർത്ഥം മികച്ച കോളേജ് അധ്യാപകർക്കായി ഏർപ്പെടുത്തിയ പുരസ്കാരത്തിനാണ് ഡോ. നൈജിൽ തോമസ് അർഹനായത്. 50,000 രൂപയും അവാർഡ് ഫലകവും പ്രശസ്തി പത്രവും അടങ്ങുന്നതാണ് അവാർഡ്. കോളേജ് പ്രിൻസിപ്പൽ ഫാ. ഡോ. ജോളി ആൻഡ്രൂസ് അധ്യക്ഷത വഹിച്ച ചടങ്ങിൽ തുഞ്ചത്ത് എഴുത്തച്ചൻ മലയാളം സർവകലാശാലയുടെ വൈസ് ചാൻസലർ പ്രൊഫ. ഡോ. സി. ആർ. പ്രസാദ് പുരസ്കാരം സമ്മാനിച്ചു. ക്രൈസ്റ്റ് കോളേജ് മാനേജർ ഫാ. ജോയ് പീണിക്കപറമ്പിൽ അനുഗ്രഹ പ്രഭാഷണം നടത്തി.

ഇരിങ്ങാലക്കുട : തുടർച്ചയായി മൂന്നാം തവണയും കാലിക്കറ്റ്‌ യൂണിവേഴ്സിറ്റി ഡിസോൺ കലോത്സവകിരീടം സ്വന്തമാക്കി ക്രൈസ്റ്റ് കോളേജ്. പെരുമ്പിലാവ് അൻസാർ വിമൻസ് കോളേജിൽ നടന്ന ഡിസോണിൽ ദഫ് മുട്ട്, മാർഗംകളി, നാടകം എന്നീ ഇനങ്ങൾക്ക് രണ്ടാം സ്ഥാനവും പങ്കെടുത്ത മറ്റെല്ലാ ഓൺസ്റ്റേജ് മത്സരങ്ങളിലും ഒന്നാം സ്ഥാനവും, ഓഫ്‌ സ്റ്റേജ് മത്സരങ്ങളിൽ മികച്ച പ്രകടനവും കാഴ്ച വച്ച ക്രൈസ്റ്റ് കലോത്സവ വേദിയിലെ ഏറ്റവും ഉയർന്ന ലീഡായ 319 പോയിന്റുകൾ നേടിക്കൊണ്ടാണ് കലാകിരീടം നേടിയത്. മലയാളം നാടകത്തിൽ മികച്ച നടിയായി തിരഞ്ഞെടുത്തതും രണ്ടാം സ്ഥാനം ലഭിച്ച ക്രൈസ്റ്റിന്റെ ‘നായാട്ട്’ എന്ന നാടകത്തിലെ അലീന സേവിയറിനെ ആണ്. ഡിസോൺ കലോത്സവ ചരിത്രത്തിലെ തന്നെ ഏറ്റവും മികച്ച പ്രകടനമാണ് ക്രൈസ്റ്റ് കോളേജ് കാഴ്ച വച്ചത്.

ഇരിങ്ങാലക്കുട : പെരുമ്പിലാവ് അൻസാർ വിമൻസ് കോളേജിൽ നടന്ന കാലിക്കറ്റ് സർവകലാശാല ഡി സോൺ കലോൽസവത്തിൽ ഇരിങ്ങാലക്കുട സെൻ്റ് ജോസഫ്സ് കോളേജിന് 155 പോയൻ്റോടെ മൂന്നാം സ്ഥാനവും ഏറ്റവും മികച്ച വനിതാ കലാലയത്തിനുള്ള പുരസ്കാരവും. പങ്കെടുത്ത നാലിനങ്ങളിലും ഒന്നാം സ്ഥാനം നേടിയ ഇംഗ്ലീഷ് രണ്ടാം വർഷ ബിരുദ വിദ്യാർത്ഥിനി നിരഞ്ജൻ ശ്രീലക്ഷ്മി കലാതിലകപ്പട്ടം നേടി.

മാർഗം കളി, ഒപ്പന, കവിതാരചന (തമിഴ്), സംസ്കൃതം കഥാരചന, പ്രബന്ധ രചന, കവിതാലാപനം, രംഗോലി, ദേശഭക്തി ഗാനം, സംഘഗാനം, മോഹിനിയാട്ടം, കുച്ചുപ്പുഡി, കേരളനടനം തുടങ്ങിയവയിൽ ഒന്നാം സ്ഥാനവും മാപ്പിളപ്പാട്ട്, കഥകളി സംഗീതം, ഫോക് ഡാൻസ്, സ്കിറ്റ്, മലയാളം കവിതാരചന, അക്ഷരശ്ലോകം ഇംഗ്ലീഷ് കവിതാരചന എന്നിവയിൽ രണ്ടാം സ്ഥാനവും വെസ്റ്റേൺ മ്യൂസിക്, കഥകളി സംഗീതം, മോഹിനിയാട്ടം, ലളിതഗാനം, ശാസ്ത്രീയ സംഗീതം, ഭരതനാട്യം, മോഹിനിയാട്ടം, കവിതാരചന, മൈം , കാർട്ടൂൺ, കാവ്യകേളി, തമിഴ് പ്രബന്ധ രചന തുടങ്ങിയവയിൽ മൂന്നാം സ്ഥാനവും നേടിയാണ് സെൻ്റ് ജോസഫ്സ് കോളജ് മികച്ച നേട്ടം സ്വന്തമാക്കിയത്. തുടർച്ചയായ രണ്ടാം വർഷമാണ് സെൻ്റ് ജോസഫ്സ് കോളജ് ഡി സോണിലെ മികച്ച വനിതാ കലാലയമായി തെരഞ്ഞെടുക്കപ്പെടുന്നത്.

ഇരിങ്ങാലക്കുട: കേരള അഡ്മിനിസ്‌ട്രേറ്റീവ് സർവീസ് പരീക്ഷയിൽ മൂന്നാം റാങ്ക് നേടിയ അഫീന ഗുലാമിനെ മുൻ സർക്കാർ ചീഫ് വിപ് തോമസ് ഉണ്ണിയാടൻ അഭിനന്ദിച്ചു. റിട്ട. ഹയർ സെക്കണ്ടറി സ്കൂൾ അധ്യാപകൻ ഗുലാം മുഹമ്മദിന്റെയും തൃശൂർ മോഡൽ ഗേൾസ് വി എച്ച് എസ് ഇ പ്രിൻസിപ്പൽ എം എ അനിതയുടെയും മകളാണ്.

ഇരിങ്ങാലക്കുട : എഴാമത് ഇരിങ്ങാലക്കുട അന്തർദേശീയ ചലച്ചിത്രമേളയുടെ പങ്കാളികളായി ഇക്കുറി ക്രൈസ്റ്റ് ഓട്ടോണമസ് കോളേജിലെ കൊട്ടക ഫിലിം ക്ലബും . അഞ്ഞൂറോളം അംഗങ്ങളുള്ള ക്ലബിൽ നിന്നുള്ള വിദ്യാർഥികൾ ചലച്ചിത്രമേളയുടെ സംഘാടകരായും കാണികളായും രംഗത്തെത്തും. കോളേജിലെ കോൺഫ്രറൻസ് ഹാളിൽ നടന്ന ചടങ്ങിൽ ഫെസ്റ്റിവൽ പോസ്റ്ററും ഡെലഗേറ്റ് പാസും കോളേജ് യൂണിയൻ ചെയർപേഴ്സൺ ഫാത്തിമയ്ക്ക് നൽകി ചലച്ചിത്രതാരം അനുമോൾ പ്രകാശനം ചെയ്തു. മികച്ച ആസ്വാദകസംസ്കാരം രൂപപ്പെടുത്താൻ ചലച്ചിത്രമേളകളും വായനയും അനിവാര്യമാണെന്ന് അനുമോൾ ചൂണ്ടിക്കാട്ടി. കോളേജ് പ്രിൻസിപ്പൽ ഫാ ഡോ ജോളി ആൻഡ്രൂസ് അധ്യക്ഷത വഹിച്ചു. ഫിലിം സൊനൈറ്റി രക്ഷാധികാരി പി കെ ഭരതൻമാസ്റ്റർ, പ്രസിഡണ്ട് മനീഷ് വർഗ്ഗീസ്, കാലിക്കറ്റ് സർവകലാശാല സെനറ്റ് അംഗം പ്രൊഫ മൂവീഷ് മുരളി, കൊട്ടക ഫിലിം ക്ലബ് കോർഡിനേറ്റർ പ്രൊഫ ബിബിൻ തോമസ്, മാധ്യമ പ്രവർത്തകർ, ഫിലിം സൊസൈറ്റി, കൊട്ടക ക്ലബ് അംഗങ്ങൾ തുടങ്ങിയവർ പങ്കെടുത്തു. 2026 ഫെബ്രുവരി 21 മുതൽ 28 വരെ ഇരിങ്ങാലക്കുട മാസ് മൂവീസിലും റോട്ടറി ക്ലബ് ഹാളിലുമായി ഡോക്യുമെൻ്ററികൾ അടക്കം വിവിധ ഭാഷകളിൽ നിന്നുള്ള 23 ചിത്രങ്ങളാണ് മേളയിൽ പ്രദർശിപ്പിക്കുന്നത്.

ഇരിങ്ങാലക്കുട : പൊതുവിദ്യാഭ്യാസ വകുപ്പിന്റെ പ്ലാൻ ഫണ്ട് ഉപയോഗപ്പെടുത്തി ഇരിങ്ങാലക്കുട ബോയ്സ് ഹയർ സെക്കൻഡറി സ്കൂളിൽ നിർമിക്കുന്ന ലാബ് കെട്ടിടത്തിന്റെ നിർമ്മാണ പ്രവർത്തനങ്ങൾക്ക് തുടക്കമായി. സ്കൂളിൽ നടന്ന ചടങ്ങിൽ ഉന്നത വിദ്യാഭ്യാസ വകുപ്പ് മന്ത്രി മന്ത്രി ഡോ ആർ ബിന്ദു നിർമ്മാണോദ്ഘാടനം നിർവഹിച്ചു. സർക്കാർ വിദ്യാലയങ്ങളോടൊപ്പം എയ്ഡഡ് വിദ്യാഭ്യാസ സ്ഥാപനങ്ങൾക്കും ആവശ്യമായ സഹായങ്ങൾ നൽകാൻ എം എൽ എ എന്ന നിലയിൽ സാധിച്ചിട്ടുണ്ടെന്ന് മന്ത്രി ആർ ബിന്ദു പറഞ്ഞു. വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ പ്രവീൺസ് ഞാറ്റുവെട്ടി ചടങ്ങിൽ അധ്യക്ഷത വഹിച്ചു. പ്രിൻസിപ്പാൾ എം കെ മുരളി, കൗൺസിലർ ഡെലി സിജു യോഹന്നാൻ, വി ഭക്തവത്സലൻ, സൂരജ് ശങ്കർ ,പൊതുമരാമത്ത് വകുപ്പ് എക്സിക്യൂട്ടീവ് എഞ്ചിനീയർ നിമേഷ് പുഷ്പൻ തുടങ്ങിയവർ സംസാരിച്ചു

ഇരിങ്ങാക്കുട : ഭാരതീയ വിദ്യാഭവന്റെ 34-മത് വാർഷികാഘോഷത്തിൻ്റെ ഉദ്ഘാടനം വേളൂക്കര പഞ്ചായത്ത് പ്രസിഡന്റ് ഷീജ ഉണ്ണികൃഷ്ണൻ ഉദ്ഘാടനം നിർവഹിച്ചു. കൂടിയാട്ടം കലാകാരി അപർണ നങ്ങ്യാർ വിശിഷ്ടാതിഥിയായിരുന്നു. ചെയർമാൻ ടി എ നായർ അധ്യക്ഷത വഹിച്ചു. പ്രിൻസിപ്പൽ ബിജു ഗീവർഗീസ് വാർഷിക റിപ്പോർട്ട് അവതരിപ്പിച്ചു.ഭാരതീയ വിദ്യാഭവൻ കൊച്ചി കേന്ദ്ര ഡയറക്ടർ ഇ. രാമൻകുട്ടി സ്കൂൾ മാഗസിൻ പ്രകാശനം നിർവഹിച്ചു. വേളൂക്കര ഗ്രാമപഞ്ചായത്ത് അംഗംബിനോയ് അക്കരപറമ്പിൽ, എക്സിക്യൂട്ടീവ് വൈസ് ചെയർമാൻ സി നന്ദകുമാർ, സെക്രട്ടറി വി രാജൻ, വൈസ് പ്രിൻസിപ്പൽമാരായ സുജാത രാമനാഥൻ, ഗിരിജ മേനോൻ, പിടിഎ വൈസ് പ്രസിഡണ്ട്എം കെ പരമേശ്വരൻ, സ്കൂൾ ലീഡർ ദിയ പ്രദീപ് എന്നിവർ സംസാരിച്ചു. ഈ വർഷം വിരമിക്കുന്ന അധ്യാപകരായ ഇ. ബാലചന്ദ്രിക, ഇന്ദിര അജിത് കുമാർ, രജിസ്ട്രാർ ശ്രീകുമാർ എന്നിവരെയും 25 വർഷത്തെ സേവനം പൂർത്തിയാക്കിയ വൈസ് പ്രിൻസിപ്പൽ ഗിരിജ മേനോൻ, ഓഫീസ് സ്റ്റാഫ്അനീഷ് കുമാർ എന്നിവരെയും ചടങ്ങിൽ ആദരിച്ചു. തുടർന്ന് വിദ്യാർത്ഥികൾ അവതരിപ്പിച്ച വിവിധ കലാപരിപാടികൾ അരങ്ങേറി.