ഇരിങ്ങാലക്കുട : വെള്ളാങ്ങല്ലൂർ ബ്ലോക്ക് പഞ്ചായത്ത് എടതിരിഞ്ഞി ഡിവിഷൻ എൽഡിഎഫ് നിലനിറുത്തി. എൽഡിഎഫ് സ്ഥാനാർഥി വി സി രമേഷ് 1247 വോട്ടിൻ്റെ ഭൂരിപക്ഷത്തിന് തിരഞ്ഞെടുക്കപ്പെട്ടതായി റിട്ടേണിംഗ് ഓഫീസും ജില്ലാ പട്ടികജാതി വികസന ഓഫീസറുമായ കെ സന്ധ്യ പ്രഖ്യാപിച്ചു. എൽഡിഎഫിന് 2884 വോട്ടുകളും യുഡിഎഫ് സ്ഥാനാർഥി ഇ എൻ ശ്രീനാഥിന് 924 ഉം എൻഡിഎ സ്ഥാനാർഥി ബിജോയ് കളരിക്കലിന് 1637 വോട്ടുകളുമാണ് ലഭിച്ചത്. എടതിരിഞ്ഞി ഡിവിഷനിൽ നിന്നും തിരഞ്ഞെടുക്കപ്പെട്ട എൽഡിഎഫ് അംഗം ബാബു ചിങ്ങാരത്തിൻ്റെ മരണത്തെ തുടർന്നാണ് തിരഞ്ഞെടുപ്പ് വേണ്ടി വന്നത്. പടിയൂർ പഞ്ചായത്തിലെ 1, 2, 3, 4, 13, 14, 15 വാർഡുകൾ ചേർന്നതാണ് എടതിരിഞ്ഞി ഡിവിഷൻ. എട്ട് ബൂത്തുകളിൽ എഴ് ബൂത്തുകളിലും എൽഡിഎഫ് ലീഡ് നേടി. സിപിഐ പടിയൂർ നോർത്ത് ലോക്കൽ കമ്മിറ്റി സെക്രട്ടറിയും പടിയൂർ പഞ്ചായത്ത് മുൻ ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാനുമാണ് വി ആർ രമേശ്. പതിനാല് അംഗ വെള്ളാങ്ങല്ലൂർ ബ്ലോക്ക് പഞ്ചായത്ത് ഭരണസമിതിയിൽ ഇതോടെ എൽഡിഎഫിന് 12 അംഗങ്ങളായി. യുഡിഎഫിന് രണ്ട് അംഗങ്ങളാണുള്ളത്. തിരഞ്ഞെടുപ്പ് ഫലം നാല് മാസം മാത്രം പിന്നിട്ട സംസ്ഥാന ഭരണത്തിന് എതിരായ ജനവികാരത്തിൻ്റെ പ്രതിഫലനം കൂടിയാണെന്ന് തിരഞ്ഞെടുപ്പ് കമ്മിറ്റി സെക്രട്ടറി പി മണി , വെള്ളാങ്ങല്ലൂർ ബ്ലോക്ക് പഞ്ചായത്ത് പ്രസിഡൻ്റ് വൽസല ബാബു എന്നിവർ പ്രതികരിച്ചു

ഇരിങ്ങാലക്കുട: ഇരിങ്ങാലക്കുട സെന്റ് ജോസഫ്‌സ് കോളേജിന് കാലിക്കറ്റ് സർവകലാശാലയുടെ 2025–26 അധ്യയന വർഷത്തിലെ മികച്ച വനിതാ കായിക കോളേജ് പുരസ്കാരം .

2025–26 അധ്യയന വർഷത്തിൽ കോളേജിൽ നാല് അന്തർദേശീയ താരങ്ങൾ ഉണ്ടായിരുന്നു. ഇവരിൽ സീയ മെൽറ്റിൽഡ ബൈജു പവര്‍ലിഫ്ടിങ്ങില്‍ ഏഷ്യൻ ജൂനിയർ ചാമ്പ്യൻഷിപ്പിൽ മെഡൽ നേടി കോളേജിനും രാജ്യത്തിനും, സംസ്ഥാനത്തിനും അഭിമാനമായി. കൂടാതെ 20 ദേശീയ താരങ്ങൾ, 48 ഇന്റർ യൂണിവേഴ്സിറ്റി താരങ്ങൾ, 17 ഖേലോ ഇന്ത്യ യൂണിവേഴ്സിറ്റി ഗെയിംസ് താരങ്ങൾ എന്നിവരെ വാര്‍ത്തെടുക്കാന്‍ കോളേജിന് കഴിഞ്ഞു.

കാലിക്കറ്റ് യൂണിവേഴ്സിറ്റി ഇൻ്റർ കോളേജ് മത്സരങ്ങളിൽ വിവിധ കായിക ഇനങ്ങളിൽ ഒന്നും, രണ്ടും, മൂന്നും സ്ഥാനങ്ങളിലായി 13 ചാമ്പ്യൻഷിപ്പുകളും കോളേജ് സ്വന്തമാക്കി. കേരള സ്റ്റേറ്റ് സ്പോർട്സ് കൗൺസിലിന്റെ മൂന്ന് അക്കാദമികൾ കോളേജിൽ പ്രവർത്തിക്കുന്നുണ്ട്. ഇന്ത്യയിലെ വിവിധ ഡിപ്പാർട്ട്മെന്റുകളിലായി കോളേജിലെ ധാരാളം കായികതാരങ്ങൾ സ്പോട്ട്സ് കോട്ടയിലൂടെ ജോലി ലഭിച്ചിട്ടുണ്ട്. സർവകലാശാല ആസ്ഥാനത്ത് നടന്ന ചടങ്ങിൽ വൈസ് പ്രിൻസിപ്പൽ സിസ്റ്റർ ക്ലെയർ, കായിക വിഭാഗം മേധാവി പ്രൊഫ സ്‌റ്റാലിൻ റാഫേൽ , കായിക അധ്യാപകർ, വിദ്യാർഥികൾ എന്നിവർ ചേർന്ന് പുരസ്കാരം എറ്റുവാങ്ങി

തൃശ്ശൂർ: കാലിക്കറ്റ് യൂണിവേഴ്സിറ്റി സ്പോർട്സ് ഓവറോൾ ചാമ്പ്യൻഷിപ്പ് തുടർച്ചയായ പത്താം തവണയും ഇരിങ്ങാലക്കുട ക്രൈസ്റ്റ് കോളേജിന് സ്വന്തം. ക്രൈസ്റ്റ് കോളേജിനുവേണ്ടി കായിക താരങ്ങളോടൊപ്പം മാനേജർ ഫാ. ജോയി പീണിക്കപറമ്പിൽ, ഫിസിക്കൽ എഡ്യൂക്കേഷൻ വിഭാഗം മേധാവി ഡോ ബിന്റു ടി കല്യാൺ, അദ്ധ്യാപകരായ ഡോ. സെബാസ്റ്റ്യൻ കെ എം, ഡോ. നിധിൻ, കോച്ചുമാർ, മറ്റ് അധ്യാപകർ എന്നിവർ ചേർന്ന് കായിക കിരീടം സ്പോർട്സ് വകുപ്പ് മന്ത്രി ഒ ജെ ജനീഷിൽ നിന്നും ഏറ്റുവാങ്ങി . കഴിഞ്ഞ വര്‍ഷം ഇന്റര്‍ യൂണിവേഴ്‌സിറ്റി, യൂണിയന്‍ നാഷണല്‍, സീനിയര്‍ നാഷണല്‍ എന്നിങ്ങനെ ദേശീയതലത്തില്‍ 200 താരങ്ങളെയാണ് ക്രൈസ്റ്റ് രംഗത്തിറക്കിയത്. ഇതില്‍ 80 താരങ്ങള്‍ ദേശീയതലത്തില്‍ മെഡല്‍ സ്വന്തമാക്കി. ബാഡ്മിന്റണില്‍ കോളേജിലെ ഒമ്പത് താരങ്ങള്‍ അന്തര്‍ദേശീയ താരങ്ങളായി.

ഓള്‍ ഇന്ത്യ ഇന്റര്‍ യൂണിവേഴ്‌സിറ്റി ഷോട്ട്പുട്ടില്‍ സ്വര്‍ണ്ണമെഡല്‍ നേടിയ വി.എസ്. അനുപ്രിയ, 400 മീറ്റർ ഹാർഡിൽസിൽ സ്വർണം നേടിയ ഡെൽമ ഫിലിപ്പ്, പവര്‍ ലിഫ്റ്റിങ്ങില്‍ സ്വര്‍ണ്ണമെഡല്‍ നേടിയ പ്രതിക്ഷ സജികുമാർ , അതുല്‍ എന്നിവര്‍ ക്രൈസ്റ്റ് കോളേജിലെ താരങ്ങളാണ്. ഖേലോ ഇന്ത്യ വോളിബോള്‍ ടൂര്‍ണ്ണമെന്റില്‍ സ്വര്‍ണ്ണം നേടിയ കാലിക്കറ്റ് യൂണിവേഴ്‌സിറ്റി ടീമിലെ അഞ്ച് താരങ്ങള്‍ ക്രൈസ്റ്റില്‍ നിന്നുള്ളവരാണ് കൂടാതെ റഗ്ബി, ബാഡ്മിന്റൺ, അത്ലറ്റിക്സ്, പഞ്ചഗുസ്‌തി, നെട്ബോൾ, വടം വലി എന്നീ ഇനങ്ങളിലും നാഷണൽ മെഡൽ നേടി.

ഇരിങ്ങാലക്കുട : കാപ്പ നിയമലംഘനം നടത്തിയ കേസിൽ നിരവധി ക്രിമിനൽക്കേസുകളിൽ പ്രതിയും സ്റ്റേഷൻ റൗഡി ലിസ്റ്റിൽ പേരുമുള്ള പടിയൂർ സ്വദേശി കുറ്റിച്ചിറ വീട്ടിൽ അഖിൽ (25) എന്നയാളെ കാട്ടൂർ പോലീസ് അറസ്റ്റ് ചെയ്തു. അഖിൽ കാട്ടൂർ പോലീസ് സ്റ്റേഷൻ പരിധിയിൽ അഞ്ച് അടിപിടിക്കേസുകളിലും മയക്ക് മരുന്ന് ഉപയോഗിച്ച ഒരു കേസിലും, ഏതെങ്കിലും കുറ്റകൃത്യത്തിൽ ഏർപ്പെട്ട് പൊതു സമാധാനം തകർക്കാതിരിക്കാനുള്ള നടപടി സ്വീകരിച്ച കേസിലും അടക്കം ഏഴ് ക്രിമിനൽക്കേസുകളിൽ പ്രതിയാണ്.

കാട്ടൂർ പോലീസ് സ്റ്റേഷൻ എസ് ഐ ഹാഷിഷ്, എസ് ഐ റഫീക്ക് പി കെ, ജി എ എസ് ഐ ജോഷ് ജോസഫ്, ജി എസ് സി പി ഒ കൃഷ്ണദാസ് വി, സി പി ഒ മിഥുൻ എന്നിവർ ചേർന്നാണ് പ്രതിയെ അറസ്റ്റ് ചെയ്തത്.

ഇരിങ്ങാലക്കുട :ലോക പേവിഷബാധ ദിനാചരണത്തിന്റെ ജില്ലാതല ഉദ്ഘാടനം ബോധവത്കരണ റാലി ഫ്ലാഗ് ഓഫ് ചെയ്തുകൊണ്ട് തോമസ് ഉണ്ണിയാടൻ എം.എൽ.എ. നിർവഹിച്ചു. ടൗൺ ഹാളിൽ നടന്ന പരിപാടിയിൽ മുനിസിപ്പാലിറ്റി ആരോഗ്യ സ്റ്റാൻഡിങ് കമ്മിറ്റി ചെയർപേഴ്സൺ ടി.എ. പോൾ അധ്യക്ഷത വഹിച്ചു. ജില്ലാ സർവൈലൻസ് ഓഫീസർ ഡോ. കെ.വി. ഗീത വിഷയാവതരണം നടത്തി. ആനന്ദപുരം ബ്ലോക്ക് കുടുംബാരോഗ്യ കേന്ദ്രം സൂപ്രണ്ട് ഡോ. ശ്രീവത്സൻ പ്രതിജ്ഞ ചൊല്ലിക്കൊടുത്തു. പൊറത്തിശ്ശേരി കുടുംബാരോഗ്യ കേന്ദ്രം മെഡിക്കൽ ഓഫീസർ ഡോ. ഫാരീസ് മുഹമ്മദ് സലാം സ്വാഗതവും ഹെൽത്ത് ഇൻസ്പെക്ടർ അജീഷ് നന്ദിയും പറഞ്ഞു . ഉദ്ഘാടനത്തോടനുബന്ധിച്ച് ഇരിങ്ങാലക്കുട കൂടൽമാണിക്യം ക്ഷേത്ര പരിസരത്തുനിന്ന് ആരംഭിച്ച ബോധവൽക്കരണ റാലി ടൗൺഹാളിൽ സമാപിച്ചു. പരിപാടികളിൽ ജനപ്രതിനിധികൾ, ആശ- ആരോഗ്യപ്രവർത്തകർ, എൻ.എസ്.എസ്. വളണ്ടിയർമാർ, സ്കൗട്ട് ആൻഡ് ഗൈഡ്, എൻ.സി.സി. കേഡറ്റുകൾ, വിദ്യാർഥികൾ എന്നിവർ പങ്കെടുത്തു.

ഇരിങ്ങാലക്കുട : നടപടികളുടെ പേരിൽ ഇഡി 2021 ൽ കൊണ്ട് പോയ ഫയലുകൾ തിരിച്ച് നൽകാത്തതും വായ്പകൾ തിരിച്ച് പിടിക്കാൻ സെയിൽ ഓഫീസർമാർ ഇല്ലാത്തതും തിരിച്ചടിയായെന്ന് വിശദീകരിച്ച് കരുവന്നൂർ ബാങ്ക് ഭരണസമിതി . ഇഡിയുടെ കൈവശമുള്ള വായ്പ ഫയലുകളിൽ 60 % പേരും തിരിച്ചടവിന് തയ്യാർ ആയി നിൽക്കുകയാണെന്നും ഇത് സംബന്ധിച്ച് ഇഡി ക്ക് വീണ്ടും കത്ത് നൽകിയിട്ടുണ്ടെന്നും വാർഷികയോഗത്തിൽ ഭരണ സമിതി വ്യക്തമാക്കി. കഴിഞ്ഞ സർക്കാരിൻ്റെ കാലത്ത് വായ്പകൾ തിരിച്ച് പിടിക്കാൻ നാല് സെയിൽ ഓഫീസർമാരാണ് പ്രവർത്തിച്ചിരുന്നത്. ഇന്ന് 15 സംഘങ്ങൾക്ക് ഒരു ഇൻസ്പെക്ടർ മാത്രമാണ് ഡ്യൂട്ടിയിൽ ഉള്ളത്. പ്രതിസന്ധിക്കൾക്കിടയിലും 165 കോടി തിരിച്ച് പിടിക്കാനും 175 കോടി രൂപ നിക്ഷേപകർക്ക് നൽകാനും കഴിഞ്ഞതായും സംസ്ഥാനത്ത് 366 സംഘങ്ങളുടെ പ്രവർത്തനം നിലച്ചപ്പോൾ ഒരു ദിവസം പോലും കരുവന്നൂർ സർവ്വീസ് സഹകരണ ബാങ്ക് പ്രവർത്തിക്കാതിരുന്നിട്ടില്ലെന്ന് യോഗത്തിൽ അധ്യക്ഷത വഹിച്ച ഭരണ സമിതി പ്രസിഡണ്ട് ആർ എൽ ശ്രീലാൽ അറിയിച്ചു. മാപ്രാണം ചാത്തൻ മാസ്റ്റർ ഹാളിൽ നടന്ന യോഗത്തിൽ അസി സെക്രട്ടറി ഇ എസ് ശ്രീകല, ഭരണ സമിതി അംഗങ്ങൾ ജീവനക്കാർ തുടങ്ങിയവർ സംസാരിച്ചു. വൈസ് പ്രസിഡൻ്റ് പി കെ വൽസൻ സ്വാഗതവും പി സി രഘു നന്ദിയും പറഞ്ഞു

അതേ സമയം ഹാളിന് മുന്നിൽ നിക്ഷേപങ്ങൾ തിരിച്ച് നൽകണമെന്ന് ആവശ്യപ്പെട്ട് നിക്ഷേപകരുടെ വായ്മൂടിക്കെട്ടിയുള്ള പ്രതിഷേധം അരങ്ങേറി. ” നിക്ഷേപങ്ങൾ തിരിച്ച് നൽകുക ” , ” മുതലും പലിശയും ഇല്ല ” , ” കരുവന്നൂർ ബാങ്ക് വിഷയത്തിൽ സർക്കാർ ഇടപെടുക ” തുടങ്ങിയ മുദ്രാവാക്യങ്ങൾ അടങ്ങിയ പ്ലാക്കാർഡുകളും ഉയർത്തിയായിരുന്നു പ്രതിഷേധം.

ഇരിങ്ങാലക്കുട : കാറളം പഞ്ചായത്ത് നാലാം വാർഡിൽ ചെമ്മണ്ട നാല് സെൻ്റ് ഉന്നതിയിൽ സമീപത്തുള്ള വീടുകൾക്ക് അപകട ഭീഷണിയായി നിലകൊളളുന്ന കിണർ മൂടാൻ ഇനിയും നടപടിയായില്ല. കിണറിന് അടുത്ത് ഗർത്തം രൂപം കൊണ്ടതോടെ മൂന്ന് വീട്ടുകാർ ഇവിടെ നിന്നും ഒഴിഞ്ഞ് പോയിരുന്നു. ഭരണസമിതിയുടെ അപേക്ഷയെ തുടർന്ന് കിണർ മണ്ണിട്ട് മൂടാൻ ജില്ലാ ഭരണകൂടം ജൂലൈ മാസം അനുമതി നൽകിയിരുന്നു . ഇതുമായി ബന്ധപ്പെട്ട് റവന്യൂ അധികൃതരും സ്ഥലം സന്ദർശിച്ചിരുന്നു. കിണർ മണ്ണിട്ട് മൂടാൻ രണ്ട് ലക്ഷം രൂപ വകയിരുത്തിയിട്ടുണ്ടെന്നും ഓണത്തിന് മുൻപായി പ്രവ്യത്തി പൂർത്തിയാക്കുമെന്നും പഞ്ചായത്ത് അധിക്യതർ വ്യക്തമാക്കിയിരുന്നു. മുകുന്ദപുരം താലൂക്ക് വികസന സമിതിയും വിഷയം ഉയർന്നിരുന്നു. നടപടികൾ നീളുന്നതിൽ പ്രതിഷേധിച്ചും കിണർ അടിയന്തരമായി മണ്ണിട്ട് മൂടണമെന്ന് ആവശ്യപ്പെട്ടും ബിജെപി പ്രവർത്തകർ രംഗത്ത് എത്തി. ബൂത്ത് കമ്മിറ്റിയുടെ നേതൃത്വത്തിൽ നടത്തിയ പ്രതിഷേധസമരം ജില്ലാ ജനറൽ സെക്രട്ടറി ക്യപേഷ് ചെമ്മണ്ട ഉദ്ഘാടനം ചെയ്തു. ബൂത്ത് പ്രസിഡണ്ട് സാജൻ തച്ചറാട്ടിൽ അധ്യക്ഷത വഹിച്ചു

ഇരിങ്ങാലക്കുട: ഡിജിറ്റൽ മാധ്യമങ്ങളുടെ അമിതമായ സ്വാധീനം ഭാഷയുടെ സ്വാഭാവികമായ ഉപയോഗത്തെ ബാധിക്കുന്നതായി എഴുത്തുകാരൻ സുഭാഷ് ചന്ദ്രൻ.

പുതിയ തലമുറയിൽ മലയാള ഭാഷയോടും സാഹിത്യത്തോടുമുള്ള ബന്ധം കുറയുന്നതിൽ ആശങ്കയുണ്ടെന്നും അദ്ദേഹം പറഞ്ഞു .

ഇരിങ്ങാലക്കുട സെന്റ് ജോസഫ്‌സ് കോളേജ് കോളേജ് യൂണിയൻ്റെ കോളേജ് മാഗസിൻ്റെ പ്രകാശനം ചെയ്ത് സംസാരിക്കുകയായിരുന്നു അദ്ദേഹം.കോളേജ് പ്രിൻസിപ്പൽ ഡോ. സിസ്റ്റർ ബ്ലെസ്സി യോഗത്തിൽ അധ്യക്ഷത വഹിച്ചു. സ്റ്റാഫ് എഡിറ്റർ ഡോ. ജെൻസി , സ്റ്റുഡന്റ് എഡിറ്റർ സന സാബു തട്ടിൽ എന്നിവർ സംസാരിച്ചു.

ഇരിങ്ങാലക്കുട : ഇരിങ്ങാലക്കുട പ്രസ്സ് ക്ലബിൻ്റെ ആഭിമുഖ്യത്തിൽ ബോയ്സ് ഹയർ സെക്കൻഡറി സ്കൂളിൽ എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർഥികളെ ആദരിച്ചു. സ്കൂൾ ഓഡിറ്റോറിയത്തിൽ നടന്ന ആദരണ സമ്മേളനം അഡ്വ തോമസ് ഉണ്ണിയാടൻ എംഎൽഎ ഉദ്ഘാടനം ചെയ്തു. പ്രസ്സ് ക്ലബ് പ്രസിഡൻ്റ് വി ആർ സുകുമാരൻ അധ്യക്ഷത വഹിച്ചു. ഹൈസ്‌കൂൾ വിഭാഗത്തിൽ വി ബി ബിജിത്തും , ഹയർ സെക്കൻഡറി വിഭാഗത്തിൽ ജ്വാക്‌ലിൻ ജെ മെൻ്റസും വിഎച്ച്എസ്ഇ വിഭാഗത്തിൽ അനന്യ എം എസുമാണ് പുരസ്‌കാരങ്ങൾ നേടിയത് . പ്രിൻസിപ്പാൾ എം കെ മുരളി, വി എച്ച് എസ് സി പ്രിൻസിപ്പാൾ സൂരജ് ശങ്കർ, പി ടി എ പ്രസിഡൻ്റ് വി ഭക്ത വത്സലൻ , വിദ്യാർത്ഥി പ്രതിനിധി റെബേക്ക കുര്യക്കോസ് എന്നിവർ ആശംസകൾ നേർന്നു . ക്ലബ്ബ് സെക്രട്ടറി ടി ജി സിബിൻ സ്വാഗതവും ട്രഷറർ രാഹുൽ അശോകൻ നന്ദിയും പറഞ്ഞു.

ഇരിങ്ങാലക്കുട : നിഷ്ക്രിയ ആസ്‌തികളുടെ വർധനവിനെ തുടർന്ന് ആർബിഐയുടെ നിയന്ത്രണത്തിൽ തുടരുന്ന ഇരിങ്ങാലക്കുട ടൗൺ സഹകരണ ബാങ്കിൻ്റെ ഭാവിയെക്കുറിച്ച് വ്യക്തമായ ചിത്രം നൽകാൻ കഴിയാതെ അഡ്മിനിസ്ട്രേറ്റീവ് കമ്മിറ്റി . ബാങ്കിൻ്റെ 108- മത് വാർഷിക പൊതുയോഗത്തിൽ ഉയർന്ന ചോദ്യങ്ങൾക്കുള്ള മറുപടികളിലാണ് വായ്പ തിരിച്ചടവുകൾ മന്ദഗതിയിലാണെന്നും ഓഹരി മൂലധനം അനിവാര്യമാണെന്നും റിയൽ എസ്റ്റേറ്റ് രംഗത്തെ മാന്ദ്യവും ഗൾഫ് യുദ്ധം സൃഷ്ടിച്ച പ്രതിസന്ധികളും ബാങ്കിൻ്റെ തിരിച്ച് വരവിന് പ്രതികൂലമായി മാറിയതായും അറിയിച്ചത്. മറ്റ് ബാങ്കുകളുമായി ലയിപ്പിക്കാനുള്ള ശ്രമങ്ങൾ നടത്തുന്നുണ്ടെങ്കിലും തീരുമാനങ്ങൾ ആയിട്ടില്ല. സൊസൈറ്റിയായി മാറ്റണമെങ്കിൽ സംസ്ഥാന സർക്കാരിൻ്റെ അനുമതി വേണം. ബാങ്കിനെ ലിക്വിഡേറ്റ് ചെയ്യാൻ ശുപാർശ ചെയ്യില്ലെന്നും പുനരുജ്ജീവിപ്പിക്കാൻ തന്നെയാണ് ശ്രമിക്കുന്നതെന്നും യോഗത്തിൽ അധ്യക്ഷത വഹിച്ച അഡ്മിനിസ്ട്രേറ്റർ സി ആർ ഗോപീകൃഷ്ണൻ വ്യക്തമാക്കി. ബ്രാഞ്ചുകൾ കുറയ്ക്കാൻ തീരുമാനമുണ്ടെന്നും ജീവനക്കാരെ പിരിച്ചുവിടാൻ കമ്മിറ്റിയ്ക്ക് അധികാരമില്ലെന്നും ഫൊറൻസിക് ഓഡിറ്റ് നടക്കുന്നുണ്ടെന്നും അഡ്മിനിസ്ട്രേറ്റർ അറിയിച്ചു.

വിഷയത്തിൽ എംപി ഇടപെടുക, അഴിമതിക്കാരായ മാനേജർമാരെയും ജീവനക്കാരെയും പിരിച്ച് വിടുക, നിക്ഷേപകരിലെ രോഗികളെയും വയോധികരെയും സഹായിക്കുക, കമ്മീഷൻ ഇടപാടുകൾ നിർത്തുക തുടങ്ങിയ മുദ്രാവാക്യങ്ങൾ അടങ്ങിയ പ്ലാക്കാർഡുകളുമായി നിക്ഷേപക കൂട്ടായ്മയുടെ നേതൃത്വത്തിൽ ബാങ്കിന് മുന്നിൽ പ്രതിഷേധ സമരവും അരങ്ങേറി.