ഇരിങ്ങാലക്കുട : കെഎസ്ടിപി യുടെ നേതൃത്വത്തിൽ നടക്കുന്ന തൃശ്ശൂർ – കൊടുങ്ങല്ലൂർ റോഡ് നവീകരണ പ്രവൃത്തിക്ക് ഇരയായി പി എസ് സി പരീക്ഷ എഴുതാൻ പുറപ്പെട്ട യുവാവും. ബുധനാഴ്ച രാവിലെ ആയിരുന്നു സംഭവം. റോഡ് നിർമ്മാണം നടക്കുന്ന പാലയ്ക്കൽ – കണിമംഗലത്തെ ഗതാഗതക്കുരുക്കിൽ രാവിലെ 6.30 മുതൽ 7.05 വരെ കുടുങ്ങിയ ഇരിങ്ങാലക്കുട എടക്കുളം സ്വദേശിയും റിട്ട തഹസിൽദാർ ഐ ജെ മധുസൂദനൻ്റെ മകനുമായ ബാലഭാസ്കറിന് (27 വയസ്സ്) തൃശ്ശൂർ മോഡൽ ബോയ്‌സ് സ്‌കൂളിൽ രാവിലെ നടന്ന ഇറിഗേഷൻ വകുപ്പിലേക്കുള്ള അസി എഞ്ചിനീയർ തസ്തികയിലേക്കുള്ള പരീക്ഷ എഴുതാനുള്ള അവസരം നഷ്ടമാവുകയായിരുന്നു. എഴ് മണിക്കായിരുന്നു പരീക്ഷ നടക്കുന്ന ബോയ്‌സ് സ്‌കൂളിൽ റിപ്പോർട്ട് ചെയ്യേണ്ടിയിരുന്നത്. ഇതേ സമയം ഗതാഗതം നിയന്ത്രിക്കാൻ കെഎസ്ടിപി , പോലീസ് , കരാറുകാരൻ്റെ ജീവനക്കാർ ആരും ഉണ്ടായിരുന്നില്ലെന്ന് തൃശ്ശൂർ റൂറൽ പോലീസ് ഉൾപ്പെടെയുള്ളവർക്ക് നൽകിയ പരാതിയിൽ ചൂണ്ടിക്കാട്ടിയിട്ടുണ്ട്. ഗതാഗത കുരുക്ക് ഉടലെടുത്തതിനെ തുടർന്ന് സ്വകാര്യ ബസ് ജീവനക്കാർ തന്നെ ഗതാഗതം നിയന്ത്രണം എറ്റെടുക്കുകയായിരുന്നു. ഇരിങ്ങാലക്കുട ക്രൈസ്റ്റ് എഞ്ചിനീയറിംഗ് കോളേജിൽ നിന്നും പഠനം പൂർത്തിയാക്കിയ ശേഷം ബാംഗ്ലൂരിൽ ജോലി ചെയ്യുന്ന ബാലഭാസ്കർ പരീക്ഷ എഴുതാൻ മാത്രമായിട്ടാണ് അവധി എടുത്ത് കഴിഞ്ഞ ദിവസം നാട്ടിൽ എത്തിയത്. പരീക്ഷ എഴുതാൻ അവസരം നൽകണമെന്ന് ആവശ്യപ്പെട്ട് ബാലഭാസ്കർ പി എസ് സിക്കും അപേക്ഷ നൽകിയിട്ടുണ്ട്.

ഇരിങ്ങാലക്കുട : മദ്യലഹരിയിൽ അശ്രദ്ധമായി ബസ് ഓടിച്ച ഡ്രൈവറെ ഇരിങ്ങാലക്കുട പോലീസ് അറസ്റ്റ് ചെയ്തു. കൊടുങ്ങല്ലൂർ തൃശ്ശൂർ റൂട്ടിലോടുന്ന തോംസൺ ബസിന്റെ ഡ്രൈവറായ കണിമംഗലം പനമുക്ക് റൈസ് മിൽ സമീപം കുരുതുകുളങ്ങര വീട്ടിൽ സിജിത്ത് (37) എന്നയാളാണ് അറസ്റ്റിലായത്. രാവിലെ 09.05 മണിയോടെയാണ് സംഭവം. കൊടുങ്ങല്ലൂരിൽ നിന്നും തൃശൂർ ഭാഗത്തേക്ക് വരുന്ന തോംസൺ ബസിന്റെ ഡ്രൈവർ മദ്യപിച്ചാണ് വാഹനം ഓടിക്കുന്നതെന്ന് പോലീസിന് രഹസ്യവിവരം ലഭിച്ചിരുന്നു. തുടർന്ന് പോലീസ് സംഘം ഇരിങ്ങാലക്കുട പ്രൈവറ്റ് ബസ് സ്റ്റാൻഡിന് സമീപം വാഹനം തടയാനായി നിൽക്കുന്നതിനിടയിൽ, മനുഷ്യജീവന് അപകടം വരുത്തക്ക വിധം അതിവേഗതയിലും അശ്രദ്ധമായും രഹസ്യ വിവരത്തിൽ പറഞ്ഞ തോംസൺ ബസ് ബസ് സ്റ്റാന്റിലേക്ക് വരികയായിരുന്നു. ഡ്രൈവർ മദ്യലഹരിയിലാണെന്ന് അന്വേഷണത്തിൽ തെളിഞ്ഞതിനെ തുടർന്ന് ബസിലുണ്ടായിരുന്ന യാത്രക്കാർക്ക് പകരം യാത്രാസൗകര്യം ഏർപ്പെടുത്തിയ ശേഷം പ്രതിയെ അറസ്റ്റ് ചെയ്യുകയായിരുന്നു. പ്രതിയുടെ ഡ്രൈവിംഗ് ലൈസൻസ് സസ്പെൻഡ് ചെയ്യുന്നതിനായി മോട്ടോർ വെഹിക്കിൾ ഇൻസ്പെക്ടർക്ക് റിപ്പോർട്ട് നൽകും. എസ് എച്ച് ഒ ദിലീഷ് ടി, സബ് ഇൻസ്പെക്ടർ മനോജ് എം.എൻ, ജി.എസ്.ഐ മുഹമ്മദ് റാഷി, സി.പി.ഒ ജോവിൻ ജോയ് എന്നിവരടങ്ങുന്ന സംഘമാണ് പ്രതിയെ അറസ്റ്റ് ചെയ്തത്.

ഇരിങ്ങാലക്കുട : ഇരിങ്ങാലക്കുട സെൻ്റ് ജോസഫ്സ് കോളേജിൽ നടക്കുന്ന മൂന്നാമത് ‘ഋതു’ അന്താരാഷ്ട്ര പരിസ്ഥിതി ചലച്ചിത്ര മേളയ്ക്ക് ഇന്ന് കൊടിയേറ്റും. മൂന്ന് മണിക്ക് നടക്കുന്ന ചടങ്ങിൽ അഡ്വ തോമസ് ഉണ്ണിയാടൻ എംഎ കൊടിയേറ്റ കർമ്മം നിർവഹിക്കുമെന്ന് കോളേജ് പ്രിൻസിപ്പൽ ഫാ സിസ്റ്റർ ബ്ലെസ്സി, ജനറൽ കൺവീനർ ക്യാപ്റ്റൻ ലിറ്റി ചാക്കോ എന്നിവർ പത്ര സമ്മേളനത്തിൽ അറിയിച്ചു. പരിസ്ഥിതി പ്രമേയമാക്കി വിട പറഞ്ഞ നടൻ സലീംകുമാർ സംവിധാനം ” പൊക്കാളി ” യുടെ പ്രദർശനവും സലീംകുമാർ അനുസ്മരണവും നാളെ കൊടിയേറ്റത്തിന് മുന്നോടിയായി നടക്കും. 24 ന് രാവിലെ 9:30 ന് മാസ്സ് തീയേറ്ററിൽ ഡോ മേതിൽ ദേവികയുടെ ഡോക്യുമെന്ററികളുടെ പ്രദർശനത്തോടെ ചലച്ചിത്ര മേളയ്ക്ക് തുടക്കമാകും. അതേസമയം കോളേജ് ഓഡിറ്റോറിയത്തിൽ തനത് കലാരൂപമായ ‘ചവിട്ടുനാടകം’ അരങ്ങേറും. 11 മണിക്ക് കോളേജിൽ നടക്കുന്ന ചടങ്ങിൽ മേതിൽ ദേവിക മേള ഉദ്ഘാടനം ചെയ്യും.

വിദ്യാർത്ഥികൾ നിർമ്മിച്ച 16 ലധികം പരിസ്ഥിതി ചിത്രങ്ങൾ മേളയിൽ പ്രദർശിപ്പിക്കും. ഉദ്ഘാടനത്തിനു ശേഷം ഹ്രസ്വചിത്ര പ്രദർശനങ്ങൾ, അധ്യാപകർക്കായി ‘തൈര് കടയൽ’ മത്സരം, സ്ക്രിപ്റ്റ് ഗാർഡനിൽ ‘രാഗ ഓപ്പൺ ബാൻഡ്’ , വൈകീട്ട് 6.30 ന് ലൈവ് ബാൻഡ് എന്നിവ നടക്കും.

24 ന് മന്ത്രി ഒ. ജെ. ജനീഷ് ഋതുവേദി സന്ദർശിക്കും. 25 ന് ശനിയാഴ്ച

ചിത്രങ്ങളുടെ പ്രദർശനം തുടരും.

ക്യാമ്പസ്സിൽ പുതുതായി ഒരുക്കിയ ഇക്കോ ഗാർഡനായ ‘ഋതു ഗാർഡൻസ് മന്ത്രി കെ എ തുളസി ഉദ്ഘാടനം ചെയ്യും.

25 ന് രാവിലെ 8.30 ന്

കർക്കടക ‘കുമ്പിളൂട്ട്’ എന്ന മെഗാ പരിപാടിയിൽ കർക്കടക മാസത്തിന്റെ തനിമ വിളിച്ചോതി 2500-ലധികം ആളുകൾക്ക് ചൂടു കഞ്ഞിയും പുഴുക്കും ചമ്മന്തിയും വിതരണം ചെയ്യും.

തനത് നാടൻ രുചികളും വൈവിധ്യമാർന്ന വിഭവങ്ങളും അണിനിരക്കുന്ന 36-ലധികം ഫുഡ് ഫെസ്റ്റുകളും, കരകൗശല-നിർമ്മാണ വൈഭവം വിളിച്ചോതുന്ന മനോഹരമായ കലാകൗശല പ്രദർശനങ്ങളും ക്യാമ്പസ്സിൽ ഒരുക്കിയിട്ടുണ്ട്.

മെഗാ ഫാഷൻ ഷോ & കുക്കിംഗ് ചലഞ്ച്: ഓഡിറ്റോറിയത്തിൽ വെച്ച് എക്കോ-ഫ്രണ്ട്‌ലി ആശയങ്ങൾ ഉൾക്കൊള്ളിച്ചുള്ള ‘ഫാഷൻ ഷോ’യും, പാർക്കിംഗ് ഏരിയയിൽ രക്ഷിതാക്കൾക്കായി പാചക മത്സരവും നടക്കും. മീഡിയ കോർഡിനേറ്റർ ഡോ. അഞ്ജു ആൻ്റണി,സ്റ്റുഡൻ്റ് കോർഡിനേറ്റർമാരായ റെയ്ച്ചൽ റോസ് ,

അരുണിമ സി. യു എന്നിവരും പത്ര സമ്മേളനത്തിൽ പങ്കെടുത്തു. തൃശ്ശൂർ ചലച്ചിത്ര കേന്ദ്ര, ഇരിങ്ങാലക്കുട ഫിലിം സൊസൈറ്റി എന്നിവയുടെ സഹകരണത്തോടെയാണ് പരിപാടി സംഘടിപ്പിക്കുന്നത്

ഇരിങ്ങാലക്കുട :പരീക്ഷാ അട്ടിമറികളുടെ ഉത്തരവാദിത്തം ഏറ്റെടുത്ത് കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെയ്ക്കുക, അഴിമതിയുടെ കേന്ദ്രമായി മാറിയ നാഷണൽ ടെസ്റ്റിംഗ് ഏജൻസി പിരിച്ചുവിടുക, വിദ്യാർത്ഥികൾക്ക് നീതി ഉറപ്പാക്കുക, തടവിലാക്കപ്പെട്ട പ്രമുഖ പരിസ്ഥിതി പ്രവർത്തകൻ സോനം വാങ്ചുക്കിനെ ഉടൻ മോചിപ്പിക്കുക എന്നീ ആവശ്യങ്ങൾ ഉന്നയിച്ചും ഡൽഹിയിൽ നടക്കുന്ന ജനകീയ പ്രക്ഷോഭങ്ങൾക്ക് ഐക്യദാർഢ്യം പ്രഖ്യാപിച്ചും ഈ വിഷയങ്ങളിൽ കേന്ദ്ര സർക്കാർ അനുകൂല നടപടികൾ സ്വീകരിക്കാത്തതിൽ പ്രതിഷേധിച്ചും സി ഐ ടി യു ഇരിങ്ങാലക്കുട ഏരിയ കമ്മിറ്റിയുടെ നേതൃത്വത്തിൽ പ്രതിഷേധം . പുല്ലൂർ സെൻ്ററിൽ നടന്ന പ്രതിഷേധസമരം സിപിഎം ഏരിയ സെക്രട്ടറി വി എ മനോജ് കുമാർ ഉദ്ഘാടനം ചെയ്തു .സി ഐ ടി യു ഏരിയ സെക്രട്ടറി കെ എ ഗോപി അദ്ധ്യക്ഷത വഹിച്ചു. ഏരിയ പ്രസിഡണ്ട് സി ഡി സിജിത്ത് , ജില്ല കമ്മിറ്റി അംഗം അജിത രാജൻ ,ഏരിയ ട്രഷറർ ഇ ആർ വിനോദ് എന്നിവർ സംസാരിച്ചു

ഇരിങ്ങാലക്കുട : ഇരിങ്ങാലക്കുട ടൗൺ സഹകരണ ബാങ്കിലെ പ്രതിസന്ധി പരിഹരിക്കാനും നിക്ഷേപങ്ങൾ തിരിച്ച് ലഭിക്കാനും മുഖ്യമന്ത്രിയുടെ സഹായം തേടി ബാങ്ക് ആക്ഷൻ കമ്മിറ്റി . വിഷയത്തിൽ ഇടപെടണമെന്ന് ആവശ്യപ്പെട്ട് നിക്ഷേപകർ കഴിഞ്ഞ ദിവസങ്ങളിൽ കേന്ദ്ര മന്ത്രി സുരേഷ് ഗോപി, രൂപത ബിഷപ്പ് മാർ പോളി കണ്ണൂക്കാടൻ എന്നിവരെ സമീച്ചിരുന്നു. ഇതിൻ്റെ തുടർച്ചയായിട്ടാണ് കഴിഞ്ഞ ദിവസം സ്ത്രീകൾ ഉൾപ്പെടെയുള്ള നിക്ഷേപക സംഘം ബാങ്ക് ആക്ഷൻ കമ്മിറ്റിയുടെ പേരിൽ മുഖ്യമന്ത്രിക്ക് നിവേദനം നൽകിയത്. എഴായിരത്തോളം വരുന്ന നിക്ഷേപകർക്കായി 600 കോടി രൂപ ലഭിക്കാനുണ്ടെന്നും ക്യാൻസർ രോഗികൾ മുതൽ പാലിയേറ്റീവ് സംരക്ഷണയിൽ കഴിയുന്നവർ വരെ നിക്ഷേപകരുടെ കൂട്ടത്തിൽ ഉണ്ടെന്നും ചികിൽസയ്ക്കായി പണം ലഭിക്കാതെ പന്ത്രണ്ട് പേർ ഇതിനകം മരണമടഞ്ഞതായും യോഗ്യതയില്ലാത്തവരെ ജീവനക്കാരായി നിയമിച്ചതും ക്രമവിരുദ്ധമായി ബ്രാഞ്ചുകൾ ആരംഭിച്ചതും ലോണുകൾ നൽകിയതും ഉൾപ്പെടെയുള്ള ബാങ്ക് ചെയർമാൻ്റെയും ഭരണ സമിതി അംഗങ്ങളുടെയും കെടുകാര്യസ്ഥതയാണ് പ്രതിസന്ധിക്ക് കാരണമായതെന്ന് നിവേദനത്തിൽ വ്യക്തമാക്കുന്നുണ്ട്. ബാങ്ക് ഇപ്പോൾ 185 കോടി രൂപയുടെ നഷ്ടത്തിലാണെന്നും ആർബിഐ യുടെ നിയന്ത്രണം നീളുമെന്നാണ് സൂചനയെന്നും പണം തിരിച്ച് ലഭിക്കാനും കുറ്റവാളികൾക്കെതിരെ ക്രിമിനൽ നിയമ നടപടികൾ സ്വീകരിക്കണമെന്നും നിവേദനത്തിൽ ആവശ്യപ്പെട്ടിട്ടുണ്ട്. വിഷയത്തെക്കുറിച്ച് ധാരണ ഉണ്ടെന്നും ഇരിങ്ങാലക്കുട രൂപത ബിഷപ്പ് ഉൾപ്പെടെയുള്ളവർ ബന്ധപ്പെട്ടിരുന്നുവെന്നും എന്താണ് ചെയ്യാൻ കഴിയുക എന്ന് നോക്കാമെന്നും മുഖ്യമന്ത്രി മറുപടി നൽകി. കഴിഞ്ഞ ദിവസം ആലുവ ദേശത്ത് ഉള്ള വസതിയിൽ വച്ചാണ് നിക്ഷേപക സംഘം മുഖ്യമന്ത്രിയെ കണ്ടത്

ഇരിങ്ങാലക്കുട: പാടശേഖര സമിതികളെയും കൃഷി വകുപ്പ് ഓഫീസർമാരെയും ആദരിച്ച് വിഷൻ ഇരിങ്ങാലക്കുടയുടെ പത്താമത് ഞാറ്റുവേല മഹോത്സവത്തിന്റെ ഭാഗമായി നടന്ന കർഷക സംഗമം കാർഷിക സംസ്കാരത്തിന്റെ പ്രതീകമായ ഞാറ് ഉയർത്തിക്കൊണ്ടായിരുന്നു കർഷക സംഗമത്തിന്റെ ഉദ്ഘാടനം.

ചലച്ചിത്രതാരം സിജി പ്രദീപ്‌ മുഖ്യപ്രഭാഷണം നിർവഹിച്ചു.വിഷൻ ഇരിങ്ങാലക്കുട ചെയർമാൻ ജോസ് ജെ ചിറ്റിലപ്പിള്ളി അധ്യക്ഷത വഹിച്ച ചടങ്ങിൽ

പരിസ്ഥിതി പ്രവർത്തക സിസ്റ്റർ റോസ് ആന്റോ, മുനിസിപ്പാലിറ്റി ആരോഗ്യ സ്റ്റാൻഡിങ് കമ്മിറ്റി ചെയർമാൻ ടി എ പോൾ, ഇരിഞ്ഞാലക്കുട എഡിഎ ഫാജിദ റഹ്മാൻ എന്നിവർ മുഖ്യാതിഥികളായിരുന്നു.

കൃഷി ഓഫിസർമാരായ ഡോ. അഞ്ജു( മുരിയാട് ), അഭയ(പൂമംഗലം ), റുബീന (പടിയൂർ ),

അനഘ (കാറളം ), രേഷ്മ (കാട്ടൂർ ),

അഖിൽ ( പൊറത്തിശേരി ),

തോമസ് (വേളൂക്കര ) അജിത് (ഇരിങ്ങാലക്കുട )

എന്നിവർ ആശംസകൾ നേർന്നു സംസാരിച്ചു.വിഷൻ ഇരിങ്ങാലക്കുട കോർഡിനേറ്റർമാരായ ഷാജി മാസ്റ്റർ സ്വാഗതവും വൃന്ദ അജിത്കുമാർ നന്ദിയും പറഞ്ഞു.

ഇരിങ്ങാലക്കുട : പൊറത്തിശ്ശേരിയിൽ തെരുവുനായയുടെ അക്രമണം. മൂന്ന് പേർക്ക് കടിയേറ്റു. കടിയേറ്റ പൊറത്തിശ്ശേരി സ്വദേശികളായ വിരിപ്പേരി വീട്ടിൽ പ്രജിത്ത് (42) , ചെറു കാലിൽ വീട്ടിൽ സുമോദ് (52 ) എന്നിവരെ ഇരിങ്ങാലക്കുട ജനറൽ ആശുപത്രിയിലും തച്ചപ്പിള്ളി വീട്ടിൽ സുരേഷിനെ (59 ) തൃശ്ശൂർ മെഡിക്കൽ കോളേജ് ആശുപത്രിയിലും പ്രവേശിപ്പിച്ചു. ഉച്ചയക്ക് രണ്ടരയോടെ ആയിരുന്നു സംഭവം. ഭാര്യ നീതുവിനെ കുടുംബശ്രീ യോഗത്തിന് കൊണ്ടാക്കി മടങ്ങുന്ന വഴി പൊറത്തിശ്ശേരി സ്‌കൂളിന് മുന്നിൽ സ്‌കൂട്ടറിൽ നിന്നിരുന്ന തന്നെ ഓടി വന്ന നായ കടിക്കുകയായിരുന്നുവെന്ന് ചികിൽസയിൽ കഴിയുന്ന പ്രജിത്ത് പറഞ്ഞു. അടുത്തുള്ള ഓട്ടോറിക്ഷ ജീവനക്കാരാണ് ആശുപത്രിയിൽ എത്തിച്ചത് . കൗൺസിലർ വിനീത ടി എസ് വിവരമറിയച്ചതിനെ തുടർന്ന് എത്തിയ നഗരസഭ അരോഗ്യ വിഭാഗത്തിൻ്റെ നേതൃത്വത്തിൽ ദീർഘനേരത്തെ ശ്രമത്തിനൊടുവിൽ നായയെ പിടിച്ച് കൂട്ടിലാക്കി മൃഗാശുപത്രിയിൽ നിരീക്ഷണത്തിലാക്കിയിട്ടുണ്ട്.

ഇരിങ്ങാലക്കുട : നാലമ്പലദർശനത്തിന് ഭക്തജന പ്രവാഹം. കൂടൽമാണിക്യം ക്ഷേത്രത്തിൽ ദർശനത്തിനായുള്ള വരി എം ജി ലൈബ്രറി വരെ നീണ്ടപ്പോൾ തിരക്ക് നിയന്ത്രിക്കാൻ പോലീസും വളണ്ടിയർമാരും എറെ ബുദ്ധിമുട്ടി. പുലർച്ചെ നാല് മണിക്ക് തുറന്ന നട നാല് മണിയോടെയാണ് അടച്ചത്. എഴായിരം പേർക്ക് അന്നദാനം നൽകിയതായും അന്യ ജില്ലകളിൽ നിന്നും തമിഴ്നാട്ടിൽ നിന്നും തീർഥാടകർ എത്തിയതായി ദേവസ്വം അധികൃതർ അറിയിച്ചു. അതേ സമയം കഴിഞ്ഞ രാത്രിയിലെ മഴയിൽ പ്രധാന പാർക്കിംഗ് കേന്ദ്രമായ കൊട്ടിലാക്കലിൽ ചെളി നിറഞ്ഞത് സ്ത്രീകൾ അടക്കമുള്ള തീർഥാടകർക്ക് ബുദ്ധിമുട്ടായി . അടുത്ത ശനിയാഴ്ചയോടെ ഇവിടെ ക്വാറി വേസ്റ്റ് അടിക്കുമെന്ന് ദേവസ്വം അറിയിച്ചിട്ടുണ്ട്. പായമ്മൽ ക്ഷേത്രത്തിൽ പുലർച്ചെ അഞ്ച് മണിയോടെ നട തുറന്ന് വൈകീട്ട് മൂന്നരയോടെ അടച്ച് നാലരയ്ക്ക് വീണ്ടും തുറന്നതായും പതിനായിരത്തോളം പേർക്ക് അന്നദാനം നൽകിയതായും ക്ഷേത്ര സമിതി അറിയിച്ചു.

ഇരിങ്ങാലക്കുട : ഇരിങ്ങാലക്കുട ബ്ലോക്ക് പഞ്ചായത്ത് പരിധിയിലെ കാട്ടൂർ, കാറളം, മുരിയാട്, പറപ്പൂക്കര ഗ്രാമ പഞ്ചായത്തുകളിൽ എസ്.എസ്.എൽ.സി പ്ലസ് ടു പരീക്ഷകളിൽ ഉന്നത വിജയം കരസ്ഥമാക്കിയ വിദ്യാർത്ഥികളെയും, 100 % വിജയം കരസ്ഥമാക്കിയ സ്കൂളുകളേയും ആദരിച്ചു. കാട്ടുങ്ങച്ചിറ പി ടി ആർ മഹലിൽ വെച്ച് നടന്ന ചടങ്ങ് ജില്ലാ പഞ്ചായത്ത് പ്രസിഡൻ്റ് മേരി തോമസ് ഉദ്ഘാടനം ചെയ്തു. ബ്ലോക്ക് പഞ്ചായത്ത് പ്രസിഡന്റ് ടി.ജി. ശങ്കരനാരായണൻ അധ്യക്ഷത വഹിച്ചു.

സിനിമാ ആർട്ടിസ്റ്റും നേരമ്പോക്ക് ഫെയിം താരവുമായ രാജേഷ് തമ്പുരു, തൃശൂർ ജില്ലാ പഞ്ചായത്ത് വൈസ് പ്രസിഡന്റ് ടി. കെ. സുധീഷ്, ജില്ലാ പഞ്ചായത്ത് അംഗങ്ങളായ ജോസ് ജെ. ചിറ്റിലപ്പിള്ളി, അമ്പിളി വേണു, എന്നിവർ മുഖ്യാതിഥികളായി പങ്കെടുത്തു. പറപ്പൂക്കര ഗ്രാമപഞ്ചായത്ത് പ്രസിഡന്റ് ബീന സുരേന്ദ്രൻ, മുരിയാട് ഗ്രാമപഞ്ചായത്ത് പ്രസിഡന്റ് സരള വിക്രമൻ, കാറളം ഗ്രാമപഞ്ചായത്ത് പ്രസിഡന്റ് കെ.കെ. ശിവൻകുട്ടി, കാട്ടൂർ ഗ്രാമപഞ്ചായത്ത് പ്രസിഡന്റ് പി.എസ്. മനു, ബ്ലോക്ക് പഞ്ചായത്ത് വൈസ് പ്രസിഡന്റ് നിമിഷ ശ്രീനിവാസൻ,വികസന സ്റ്റാൻഡിംഗ് കമ്മിറ്റി ചെയർപേഴ്സൺ എൻ.ബി. പവിത്രൻ, ക്ഷേമകാര്യ സ്റ്റാന്റിംഗ് കമ്മിറ്റി ചെയർപേഴ്സൺ പി.ഡി.നെൽസൺ, ബ്ലോക്ക് പഞ്ചായത്ത് മെമ്പർമാരായ അംബുജ രാജൻ, അജയൻ തറയിൽ എന്നിവർ പങ്കെടുത്തു.

ബ്ലോക്ക് പഞ്ചായത്ത് ആരോഗ്യ-വിദ്യാഭ്യാസ സ്റ്റാന്റിംഗ് കമ്മിറ്റി ചെയർ പേഴ്സൺ വൃന്ദ അജിത്ത് കുമാർ സ്വാഗതവും ബ്ലോക്ക് പഞ്ചായത്ത് സെക്രട്ടറി കെ.കെ. നിഖിൽ നന്ദിയും പറഞ്ഞു.

ഇരിങ്ങാലക്കുട : സ്വാതന്ത്ര്യസമര സേനാനിയും സിപിഐ നേതാവുമായിരുന്ന ടി എൻ നമ്പൂതിരിയുടെ സ്മരണയ്ക്കായി ഏർപ്പെടുത്തിയിട്ടുള്ള ടി എൻ നമ്പൂതിരി പുരസ്‌കാരം മുടിയേറ്റ കലാകാരൻ കിഴക്കേ വാരനാട്ട് നാരായണക്കുറുപ്പിന് ഡോ വി രാമൻകുട്ടി നമ്മാനിച്ചു. സിപിഐ മണ്ഡലം കമ്മിറ്റിയുടെ നേതൃത്വത്തിൽ ടൗൺ ഹാളിൽ നടന്ന ടി എൻ നമ്പൂതിരി അനുസ്മരണ ചടങ്ങ് ജില്ലാ പഞ്ചായത്ത് വൈസ് പ്രസിഡൻ്റ് ടി കെ സുധീഷ് ഉദ്ഘാടനം ചെയ്തു. മുതിർന്ന നേതാവ് കെ ശ്രീകുമാർ അധ്യക്ഷത വഹിച്ചു . ജില്ലാ എക്സിക്യൂട്ടീവ് അംഗം പി മണി, മണ്ഡലം സെക്രട്ടറി എൻ കെ ഉദയ പ്രകാശ്, അഡ്വ രാജേഷ് തമ്പാൻ തുടങ്ങിയവർ സംസാരിച്ചു.